SEL MCHUIU aika el eru el tekoi, e ngera er ngii a soam? A rebetok a sorir a tekingel a Saulus er a Tarsus el dirrek el okedongall el apostol el Paulus. (Rellir 17:26, 27) Me a Biblia a dirrek el mesaod a lmuut el bebil er a osisiu el tekoi el mengelaod a rengud. El ua tiang, a nglunguchel a Jesus a dirrek el mengelaod er kid er a lolengit me bo el sebechir a rultirakl er ngii el mo ungil el medengelii a Dios me bo lomekngeltengat er tir.​—Johanes 17:3.

Me nguaisei, engdi a rechad el ua Philo a kuk ngodech a uldesuir. Te oumerang el kmo ngkmal diak el sebeched el mo ungil el medengelii a Dios. Me ngera klemerang el tekoi?

A Biblia a bleketakl el smodii el kmo ngar er ngii a bebil el tekoi el kirel a Dios el meringel er a rechad el mo medengei. El ua tiang, ngdiak dodengelii a uchelel ngika el Ulemeob. Me a klungel a uldesuel me a delechel a llemesel a rengul a diak el sebechel el medebodeb e lemochur. Aika el tekoi a engelakl er sel klemedengei er kid a rechad. Me nguaisei, engdi aikang a diak lerellid me bo lak a techelled el mo medengelii a Dios. Sel dolebedebek ngii el tekoi e ngrullid el mo kmeed er Ngii. (Jakobus 4:8) Mada me bo dosaod a bebil er aika el tekoi el meringel er kid el mo medengei. E bo domes aike el kuk blekerdelel a Dios el sebeched el mo medengei.

A DIOS EL DIAK A UCHELEL ME A ULEBENGELEL: A Biblia a olisechakl el kmo a Dios a ‘diak a ulebengelel, el diak a uchelel.’ (Psalm 90:2) Me ngbleketakl el kmo ngdiak dodengelii a uchelel, e Ngii a di ngar er ngii el mo cherechar. Me a rechad a ‘diak el sebechir el mo cherrungel el medengelii a klengarbab er ngii, ma lechub e le bechur a rekil.’​—Job 36:26.

A klungiolem: A Dios a tibir a diak a ulebengelel el klengar el kirem a lsekum ke mo ungil el medengelii. (Johanes 17:3) Kede mekerang e mo ultuil er tia el telbiil oleko Dios a diak el sebechel el melemolem el ngar el mo cherechar? Ngdi ngike el “King el diak a uchelel ma ulebengelel” a sebechel el otutii tia el telbiil.​—1 Timothy 1:17.

A ULDESUEL A DIOS: A Biblia a olisechakl el kmo “Ng diak a chad el mtab a uldesuel” a Dios, e le uldesuel a kuk ngarbab er a uldesued. (Isaia 40:28; 55:9) Sei a uchul me a Biblia a oker er a ker el kmo: “Ng techa medenge ngar a rengul a Dios? Ma techa sebechel el olisechakl er ngii?”​—1 Korinth 2:16.

A klungiolem: A Dios a sebechel el orrenges a nglunguchir a rebetok el miliol el chad er a ta el taem. (Psalm 65:2) Ngdirrek el kmal medengelii a chimo el sisebangiau a lerebet er a chutem. Me tia el uldesuel a Dios, ngsebechel el mo mui me ngmo diak lesekau e lerengesii a nglunguchem? Ngkmal diak leuaisei, e le uldesuel a diak a telkelel. Me a lmuut el tang, kau a lmuut el ngaruchei er a rengul a Dios er a betok el chesisebangiau!​—Mateus 10:29, 31.

A ROLEL ER A DIOS: A Biblia a olisechakl el kmo a rechad a kmal diak el sebechir el mo “cherrungel el omtab” a loruul. (Olisechakl 3:11) Me ngkmal diak el sebeched el mo medengei a rokui el tekoi el kirel a Dios. A llemesel a rengul a Dios a loruul a tekoi a diak el sebechir a rechad el mtebengii. (Rom 11:33) Me nguaisei, engdi a Dios a kongei el ocholt a loruul el mo er tirke el sorir el oldeu er a rengul.​—Amos 3:7.

A klungiolem: A bek el taem el monguiu e mosuub er a Biblia e ke suub a beches el tekoi el kirel a Dios me a rolel. Me ngbelkul a kmo ngsebeched el olekeed er kid er a Demad el ngar er a eanged el diak a ulebengelel.

Me kid el diak el sebeched el mo cherrungel el medengei a bebil el blekerdelel a Dios a diak lebelkul a kmo ngdiak el sebeched el mo ungil el medengelii. A Biblia a ngar er ngii a betok el omesodel a tekoi er a chelsel el sebechel el ngosukid el mo ungil el medengelii a Dios. Me bo dosaod a bebil er ngii.

A NGKLEL A DIOS: A Biblia a ouchais er kid el kmo a Dios a ngar er ngii a ngakl el lousbech er ngii. Ngdmu el kmo: “Ngak, el di ngak el tang, a RUBAK el Dios.” * E tia el ngakl a llechukl el bekord el 7,000 el taem er a chelsel a Biblia. Ngkuk betok er a ngii di el ngakl el ngar er a Biblia.​—Isaia 42:8.

A klungiolem: A Jesus a dilu el kmo: “Ng ua tiakid cho moluluuch: ‘Demmam el ngar a eanged: Bo le modanges a chedaol ngklem.” (Mateus 6:9) Me kau, ke ousbech er tia el ngklel a Dios sel moluluuch? A Jehovah a kongei el olsobel er tirke el rokui el olecholt a omengull el mo er tia el ngklel.​—Rom 10:13.

A DELENGCHEKLEL A DIOS: A Biblia a olisechakl el kmo ngar er ngii a eru el basio, e aikang a chutem el ngii a beluulechad me a melidiul el ngii a eanged el lekiei er ngii a rediak lemeues el anghel. (Johanes 8:23; 1 Korinth 15:44) Me ngar er a Biblia e a tekoi el “eanged” a blechoel el mesaod er a basio el diak el sebeched el mesang. Me a delengcheklel ngika el Ulemeob er kid a ngar er a “eanged.”​—1 King 8:43.

 A klungiolem: Ngmeketeklii a uldesuem el kirel a Dios. Ngika el Ulemeob a diak el klisiich el di mekelekelii a beluulechad me a rokui el tekoi er a chelsel. A Jehovah a mera el Dios el ngar er ngii a ulterekokl el delengcheklel. Me nguaisei engdi “ng diak a ngeral sebechel el obart” er a osengel.​—Hebru 4:13.

A BLEKERDELEL A DIOS: A Biblia a olisechakl el kmo a Jehovah a ngar er ngii a kmal ungil el blekerdelel. A “Dios a bltikerreng.” (1 Johanes 4:8) ‘A Dios a diak lomulak.’ (Titus 1:2) Ngdiak longetukel, e chubechubechad, e dirrek el meoud el ngmasech a rengul. (Exodus 34:6; Rellir 10:34) E a ta er a blekerdelel el betok el chad a diak lodengelii a kmo, ngika el Ulemeob a kmal semeriar el mo ‘sechelirir tirkel meluu er ngii.’​—Psalm 25:14.

A klungiolem: Me ngkmal sebechem el mo sechelil a Jehovah. (Jakobus 2:23) Me sel bo modengei a blekerdelel a Jehovah e ke lmuut el mo ungil el medengei a belkul a cheldecheduch er a Biblia.

A Biblia a bleketakl a omesodel el kirel a Jehovah el Dios. E ngika el Ulemeob a kmal soal a bo dungil el medengelii. Me a Tekingel el Biblia a tibir el kmo: “A lsekum kom osiik er ngii, e kom metik er ngii.” (2 Kronika 15:2) Me ngdiak el soam el mo medengelii a Dios el okiu sel monguiu e molebedebek a cheldecheduch er a Biblia? A lsekum ngsoam, e a Biblia a tibir el kmo a Dios a mo ‘olekeed er ngii’ er kau.​—Jakobus 4:8.

Me ke locha mo melatk el kmo, ‘Me a lsekum ngmeringel er ngak el mo medengei a rokui el tekoi el kirel ngika el Ulemeob, e ngmekera e sebechek el mo sechelil?’ Me ka molatk er tiang: A chad el mo kot el kmeed el sechelil a toktang er a botk, ngkirel el mo tuobed er a skuul er a tekoi er a ukeruul? Ngkmal diak leuaisei! Ngulterekokl el kuk ngodech a tekoi el lemeduch er ngii, engdi ngsebechir el mo kmes a deleuill er tir el terung. A klou a ultutelel el tekoi a kmo ngika el sechelil a toktang a ungil el medengei a blekerdelel a toktang me aike el soal me a chetil el tekoi. Me ngdi osisiu, ngsebechem el mesuub er a Biblia e mo medengei el kmo ngua techa el Dios a Jehovah. E tiaikid a rolel el ngsebechem el mekur a klausechelei er kau me Ngii.

A Biblia a kmal bleketakl a omesodel el kirel a rolel e ngsebeched el mo ungil el medengelii a Dios. Me kau, ngdiak el soam el mesuub a lmuut el betok el kirel a Jehovah el Dios? A Resioning er a Jehovah a mengetmokl a diak el locheraol el omesubel a Biblia er a blirir a rederta el chad. Me a lsekum e ngsoam e bo mongedecheduch er a Resioning el ngar er a beluam me a lechub e momes er a website er kemam el, www.ps8318.com.