OMESODEL A SUOBEL ER A MEDAL TIA EL BABIER | NGUA NGERA ULDESUEL A DIOS EL KIREL A MEKEMAD?

A Uldesuel a Dios el Kirel a Mekemad er a Taem er a Rekot el Kristiano

A rechad er a Judea a kmal mle chuarm. Te di ua rechederir er a irechar el millemolem el meluluuch el olengit a ngeso er a Dios, e le rechad er a Rom a kmal ulemekringel er tir. Seikid el taem e te rirenges a chisel a Jesus. Me ngikang, ngike el mo Mesias? Te betok a “millatk el kmo ngii ngikel mo osebelii a Israel” er a rechad er a Rom. (Lukas 24:21) Engdi ngdimlak a ngosuterir, e bai ngar er a rak er a 70 e a resoldau er a Rom a siliseb er a Jerusalem el tomellii a beluu me a templo er ngii.

Me ngera me ngmlo uaisei? Ngera uchul me a Dios a dikea loumekemad el kirir a rechad er a Judea el ua ngar er a mong? Ngera uchul me ngdimlak lekengei er tir el mo oumekemad me bo lemimokl? A Dios, ngmla mengodech a uldesuel el kirel a mekemad? Ngdiak, ngbai ngar er ngii a mla mengodech el blekerdelir a rechad er a Judea. Te mla otngeklii a Ngelekel a Dios el Jesus el ngii a Mesias. (Rellir 2:36) Me tia el renged a mla oridii sel ileakl el deleuill er tir me a Dios.​—Mateus 23:37, 38.

Me a Dios a dikea lomekerreu er a rechad er a Judea me a belurir el Beluu er a Nglat. Me tir a dikea lsebechir el lmuut el nguu a kengei er a Dios sel bo loumekemad. Me ngua ledilu a Jesus el kmo, a klengeltengat me a kengei er a Dios a dikea lebo er tir e ngbai mo er a beches el renged el Biblia a omekedong er ngii el “Israel ra Dios.” (Galatia 6:16, BT; Mateus 21:43) Me a ongdibel er a rengellitel el Kristiano a toketekii tia el “Israel ra Dios.” E le sel taem er a rekot el Kristiano e te mlo medengei el kmo: “Kemiu a ngellitel el . . . chedal a Dios.”​—1 Petrus 2:9, 10.

Me a Dios ngmlo oumekemad el kirir a Rekristiano me bo lak lomekcharm er tir a rechad er a Rom? Me a lechub e ngkilengei er tir me te mo oumekemad er a recherrouir? Ngdimlak loruul el uaisei. E ngera uchul? Ngdi ta el Dios a sebechel el kongei me ngmo er ngii a mekemad, e di ngii el tang a melilt el kmo ngoingerang e ngmo er ngii a mekemad el ua dulsaod er sel mlo merek el suobel. A Dios a dimlak loumekemad el kirir a rekot el Kristiano me a lechub e lekilengei er tir el mo oumekemad. Me ngbleketakl el kmo sel taem e ngdimlak el temel a Dios el mo oumekemad el olekngemed a chelebirukel me a ringel.

Me tirka el Kristiano a di ua rechedal a Dios er a irechar el kirir el mengiil el mo lmuut er sel ungil el temel er a Dios e ngmo okngemedii a chelebirukel me a ringel. Me ngmo lmuut er seikid el taem e ngdimlak el kirir el mo oumekemad el omtok er a recherrouir. A Jesus a mileketeklii tiang el okiu a osisecheklel. El ua tiang, ngdimlak lolisechakl er a rulebengekel el mo teloi a mekemad, e ngbai dilu er tir el kmo: “Bo le betik a rengmiu er a re cherrouiu e moluluuch el kirir a ruldechelakl er kemiu.” (Mateus 5:44) Me sera lomlaoch el kirel a odelecheklel a Rom el mo er a Jerusalem, e a Jesus a milengelechel er a redisaiplo er ngii el kmo ngdiak el kirir el kiei e oumekemad, e ngbai mle kirir el chemiis me te chiliis.​—Lukas 21:20, 21.

Me a lmuut el tang, a apostol el Paulus a mlukrael el mo meluches el kmo: “Lak molaitechei, . . . ele Chedaol Llechukl a kmo, ‘A omelaitechei a ngar ngak, mak mo melaitechei, ng dmu Rubak.’” (Rom 12:19) A Paulus a milsaod a tekingel a Dios el ledilung er a betok el rak er a uchei el ngii a llechukl er a Levitikus 19:18 me a Duteronomi 32:35. Me a ta er a rolel e a Dios a melaitechei el kirir a rechedal er a irechar a okiu sel lolengeseu er tir el oumekemad er a recherrouir. Me a tekingel  a Paulus a ochotii el kmo a uldesuel a Dios el kirel a mekemad a dirkak lemengodech. Sel taem er a rekot el Kristiano e ngdirk mle osisiu a uldesuel el kirel a mekemad el melaitechei el kirir a rechedal me a okngemedel a chelebirukel me a ringel. Me nguaisei, engdi ngdi Ngii el tang a melilt el kmo ngoingerang e ngmo er ngii a mekemad e melilt er a remo oumekemad.

Me ngbleketakl el kmo a Dios a dimlak lekengei er a rekot el Kristiano me bo loumekemad. E kuk ngua ngera er chelechang? A Dios, ngkongei a ngii di el cheldebechel er a rechad er chelechang me te mo oumekemad? Me a lechub e ngmla mo temel a Dios el mo oumekemad el kirir a rechedal? Ngua ngera uldesuel el kirel a mekemad er chelechang? A ongingil el suobel a mo onger aika el ker.