Vi feel leit kensht du es Jehova Sei Witnesses sinn? Dayl funn uns sinn fleicht ebbah es du shafsht mitt, dei classmates, adda dei nochbahra. Fleicht henn miah shund kshvetzt zu dich veyyich di Bivvel. Avvah, veah reeli sinn miah, un favass doon miah shvetza zu anri veyyich vass miah glawva?

Miah sinn yusht kammini leit. Miah sinn funn alli sadda leit, un sinn diffandi vayya ufgvaxa. Dayl sinn oahm un dayl sinn reich. Dayl kumma funn anri religions, un samm henn nett geglawbt an Gott. Avvah, eb miah ayns funn Jehova Sei Witnesses vadda sinn, henn miah awl zeit gnumma fa lanna vass di Bivvel aekshli teetsht. (Apostelgeschichte 17:11) Miah henn agreet mitt vass miah gland henn, un no henn miah selvaht diseiyt fa Jehova deena.

Es helft uns fa di Bivvel shtodya. Yusht vi alli-ebbah shunsht, miah deela aw mitt problems un anri sacha koss miah sinn nett pirfikt. Avvah bei boviahra du vass di Bivvel sawkt in unsah layva, hott’s uns kolfa en bessah layva havva. (Psalm 128:1, 2) Sell is ayns funn di reesins es miah di goodi sacha es miah gland henn funn di Bivvel sherra mitt anri.

Miah layva bei vass di Bivvel sawkt. Sell helft em goot feela, haebbi sei, un respekt havva fa anri. Es helft uns aw fa honest un goot-maynich sei. Es kann em helfa healthy sei, helft em willing sei fa di laws heicha, un fa hatt shaffa un goot du zu anri. Es helft families fa goot-along kumma mitt-nannah un fa goodi gedanka havva. Miah vissa es “Gott dutt nett dayl leit haychah hayva es anri,” so miah sinn vi en grohsi family ivvah di gans eaht, aynich in da saym vayk funn glawva. Miah sinn funn alli sadda leit avvah es dutt uns doch nett diveiyda. Miah sinn en organization es raus shtayt, avvah es ufgmacht is mitt yusht kammini leit.​—Apostelgeschichte 4:13; 10:34, 35.

• Vi sinn Jehova Sei Witnesses yusht saym es alli-ebbah shunsht?

• Vass fa goodi sacha henn Jehova Sei Witnesses gland funn di Bivvel shtodya?