LESSON 3
Di Rahab Hott Geglawbt an Jehova
Vass vann miah in di shtatt funn Jericho veahra? Dee shtatt is in Kanaan, vo leit nett glawva an Jehova. En maydel es Rahab hayst voond do.
Vo di Rahab en maytli voah, hott see shtoahris keaht vi da Mosi da Roht Say fadayld hott un di Kinnah-Israel aus Egypta gebrocht. See hott aw keaht vi Jehova si raus kolfa hott vo iahra enemies geyyich si kfochta henn. Nau heaht see es di Kinnah-Israel nayksht an Jericho sinn!
Di Rahab hott di speiys sayf kalda koss see hott geglawbt an Jehova
Ay ohvet, shneeka zvay Israeliddah zu Jericho fa di shtatt austshekka. Si kumma zu di Rahab iahra haus. See hayst si fa rei kumma un datt bleiva. Deich di nacht hott da kaynich funn Jericho auskfunna es di speiys in di shtatt sinn, un es si zu di Rahab iahra haus ganga sinn. So, da kaynich shikt mennah fa gay si greeya. Di Rahab fashtekkeld di zvay speiys uf’s flaett dach funn iahra haus. No, sawkt see zu da kaynich sei mennah: ‘Di speiys voahra do avvah si sinn shund aus di shtatt ganga. Vann diah dabbah gaynd, kenna diah si noch fanga!’ Vaysht du favass di Rahab am di speiys sayf halda is?— Koss see glawbt an Jehova un vayst es eah’s land funn Kanaan zu di Kinnah-Israel gevva zayld.
Eb di speiys gayn, henn si di Rahab un iahra gansi family fashprocha es si sayf sei zayla vann Jericho nunnah ksmaesht vatt. Vaysht du vass di speiys see sawwa fa du?— Si sawwa: ‘Nemm deah roht shtrikk, un loss’n aus dei fenshtah henka. Vann du dusht, zayld alli-ebbah in dei haus sayf sei.’ Di Rahab dutt grawt vass di speiys see sawwa fa du. Vaysht du vass’s neksht haebbend?—
Jehova hott di Rahab un iahra family sayf kalda
Poah dawk shpaydah, lawfa di Kinnah-Israel gans aus di shtatt rumm, un sawwa goah nix. Fa sex dawk, lawfa si ay moll da dawk aus di shtatt rumm. Avvah, uf da sivvet dawk, lawfa si sivva moll aus rumm. No greisha si awl reeli laut, un Jehova macht di shtatt vanda runnah kumma mitt en kraesh. Avvah’s haus mitt da roht shtrikk in’s fenshtah bleibt shtay! Kansht du’s sayna in’s piktah?— Di Rahab un iahra family sinn sayf!
Vass kansht du lanna funn di Rahab?— Di Rahab hott geglawbt an Jehova koss funn awl di goodi sacha es si gland hott veyyich een. Du bisht aw am feel goodi sacha lanna veyyich Jehova. Dusht du aw glawva an een vi di Rahab hott?— Miah vissa es du dusht!
