LESSON 11
Si Henn Kshrivva Veyyich da Jesus
Saynsht du di mennah in’s piktah?— Si sinn da Matthäus, da Markus, da Lukas, da Johannes, da Petrus, da James, da Judas, un da Paulus. Dee mennah henn awl glaybt in di saym zeit es da Jesus hott, un si henn kshrivva veyyich da Jesus. Vella may lanna veyyich si.
Vass vaysht du veyyich dee mennah?
Drei funna voahra aposhtla es als mitt da Jesus ganga sinn breddicha. Vaysht du velli drei?— Da Matthäus, da Johannes, un da Petrus. Da Matthäus un da Johannes henn da Jesus goot gekend, un henn awl zvay en buch kshrivva in di Bivvel veyyich da Jesus sei layva. Da Johannes hott aw en buch kshrivva es Di Offenbarung hayst, un aw drei breefa es haysa, Eahsht, Zvett, un Dritt Johannes. Da Petrus hott zvay funn di breefa kshrivva es in di Bivvel sinn. Selli haysa Eahsht un Zvett Petrus. In sei zveddah breef, hott da Petrus kshrivva veyyich vo Jehova kshvetzt hott funn da himmel un hott ksawt veyyich da Jesus: ‘Dess is mei sohn. Ich habb leevi fa een, un eah macht mich reeli haebbi.’
Di anri mennah in’s piktah lanna uns aw veyyich da Jesus in di bichah es si kshrivva henn. Ayns funna is da Markus. Eah voah andem datt vo si da Jesus vekk gnumma henn un hott alles ksenna es kaebbend hott. Noch aynah is da Lukas. Eah voah en doktah un hott andem gland veyyich da Jesus noch es da Jesus kshtauva is.
Zvay funn di anri mennah in’s piktah es kolfa henn di Bivvel shreiva, voahra da Jesus sei yingahri breedah. Vaysht du vi si kaysa henn?— Si henn James un Judas kaysa. Ay zeit, henn si nett geglawbt an da Jesus. Si henn even gmaynd eah voah aus sei kobb. Avvah si henn no shpaydah geglawbt an da Jesus.
Da letsht mann es du saynsht in’s piktah is da Paulus, eah hott aw kolfa di Bivvel shreiva. Eb eah geglawbt hott an da Jesus, hott eah Saul kaysa. Eah hott leit kast es geglawbt henn an da Jesus un voah veesht zu si. Vaysht du vass da Paulus gmacht hott glawva an da Jesus?— Ay dawk voah da Paulus uf da vayk zu Damascus, un yusht vi sell, hott eah ebbah keaht shvetza zu een funn da himmel! Es voah da Jesus! Eah hott da Paulus kfrohkt: ‘Favass bisht du so veesht zu selli vo glawva an mich?’ Noch sell, hott da Paulus sei layva getshaynsht un hott geglawbt an da Jesus. Da Paulus hott 14 bichah funn di Bivvel kshrivva, Römer zu Hebräer.
Miah laysa di Bivvel alli dawk, doon ma nett?— Bei di Bivvel laysa, lanna miah feel sacha veyyich da Jesus. Vetsht du may lanna veyyich da Jesus?—
