Ich voah geboahra inna glenni shtatt in Saxony. An selli zeit voah’s part funn di German Democratic Republic (GDR). Ich binn ufgvaxa in en lovingi family, un mei eldra henn mich gland fa en goodah person sei. Religion voah nett importand zu’s mensht leit, koss di GDR voah en Communist state. Ich habb nett geglawbt in Gott. In di eahshti 18 yoah funn mei layva, henn di ideas veyyich nett glawva in Gott un Communism mei layva influenced.

Favass havvich Communism geglicha? Koss ich habb da idea geglicha es alli-ebbah da saym vayk getreet vatt. Ich habb aw gedenkt es awl’s shtoft sett feah uf-diveiyt sei, so es nett samm leit reeli reich sinn un anri reeli oahm. So ich habb kshteaht shaffa fa en Communist youth organization. Vann ich 14 voah, havvich en latt zeit kshpend helfa mitt en paper recycling project. Leit in di shtatt voahra so haebbi mitt vass ich am du voah es di authorities henn mich en award gevva. Ich voah noch nett oahrich ald avvah ich habb gland fa dayl importandi leaders kenna. Ich habb kshpiaht vi ich’s recht ding am du voah fa en goodah future havva.

Awl ufamoll hott alles getshaynsht. In 1989 is di Berlin Wall kfalla, un Communism hott kshteaht fafalla. ’S voah ay disappointment nohch da neksht. Ich habb gmaynd alli-ebbah voah feah am getreet vadda, avvah ich habb glei auskfunna sell is nett voah. Fa’n example, leit es nett Communism support henn, voahra nunnah gegukt druff. Vi kend sell possible sei? Henn miah nett geglawbt es alli-ebbah da saym vayk getreet sei sett? Hott Communism doch nett kshaft? Dess hott mich reeli anxious gmacht.

So ich habb diseiyt fa mei zeit shpenda uf music un paynda. Ich voah able fa zu en music shool gay un habb kfikkaht on gay zu en university. Ich habb koft fa en living macha mitt music shpeela un paynda. Ich habb mei bukkel gedrayt zu vass mei eldra mich gland henn. Vass nau importand voah zu mich, voah fa en goodi zeit havva, un fa edlichi girlfriends havva ufamoll voah part difunn. Avvah music, paynda, un deah vayk funn layva hott nett mei anxiety bessah gmacht. Even di piktahs es ich gepaynd habb henn gvissa vass fa’n fear es ich katt habb. Vass zayld haebna in da future? Un favass sinn miah do?

Di ensahs es ich endlich kfunna habb, henn mich surprised. Ay ohvet an di music shool, voah ich am shvetza mitt anri students veyyich da future. Di Mandy * voah aw zu di music shool am gay un voah ayns funn Jehova Sei Witnesses. Sellah ohvet hott see mich goot advice gevva. See hott ksawt: “Andreas, vann du ensahs vitt zu dei questions veyyich layva un veyyich da future, dann setsht du di Bivvel shtodya.”

Ich voah nett gans shuah veyyich dess, avvah ich habb diseiyt fa gukka fa di ensahs in di Bivvel. Di Mandy hott mich ksawt fa Daniel chapter 2 laysa, un vass ich gland habb hott mich surprised. Deah prophecy shvetzt veyyich diffandi roolahs funn di veld es leit affect even nunnah biss unsah dawk. Di Mandy hott mich aw anri prophecies gvissa in di Bivvel es shvetza veyyich da future. Ich voah endlich ensahs am finna zu mei questions! Avvah, veah hott selli prophecies kshrivva, un veah hett alli detail recht greeya kenda? Kend’s sei es’s aekshli en Gott is?

Di Mandy hott en mann un fraw, da Horst un di Angelika, kfrohkt fa mich helfa di Bivvel bessah fashtay. Es hott nett lang gnumma biss ich gland habb es Jehova Sei Witnesses di aynsisht religion is es Gott sei nohma, Jehova, yoosa un anri lanna diveyya. (Psalm 83:18; Matthäus 6:9) Ich habb gland es Jehova, mensha di gleyyaheit gebt fa layva fa’immah inna paradise uf di eaht. Psalm 37:9 sawkt, “Selli es voahra uf da HAH, zayla’s land eahva.” Ich voah reeli haebbi fa vissa es alli-ebbah es dutt vass recht is in Gott sei awwa selli gleyyaheit hott.

‘S voah hatt fa boviahra layva in en vayk es Gott pleest. Koss’s ich am goot du voah mitt mei music un payndes hott’s mich proud gmacht, so ich habb seahsht lanna missa fa humble sei. ’S voah nett eesi fa mei aldah vayk funn layva ufgevva es ich so oahrich geglicha habb. Ich binn so frohwa es Jehova patient un understanding is zu selli es iahra besht am boviahra sinn fa layva bei vass di Bivvel sawkt!

Nett glawva in Gott un Communism, henn di eahshti 18 yoah funn mei layva influenced, avvah siddah sell is di Bivvel am ohhalda mei layva bessah macha. Vass ich gland habb macht es ich nett anxious binn veyyich da future un gebt mei layva en rechti mayning. In 1993 binn ich gedawft vadda es ayns funn Jehova Sei Witnesses, un in 2000 havvich di Tabitha keiyaht, en shveshtah es alles dutt fa Jehova es see kann. Miah shpenda so feel zeit es miah kenna fa anri helfa lanna vass di Bivvel sawkt. En latt funn di leit es miah shvetza mitt sinn influenced bei di ideas es ich gvest voah, nett glawva in Gott un Communism. Es macht mich so haebbi fa si helfa lanna Jehova kenna.

Vann ich seahsht kshteaht habb shtodya mitt Jehova Sei Witnesses, voahra mei eldra goah nett haebbi. Avvah siddah sell, henn si ksenna vi di Bivvel shtodya mei layva bessah gmacht hott. Es gebt mich so feel joy es si nau di Bivvel laysa un gayn zu fasamlinga funn Jehova Sei Witnesses.

Mich un di Tabitha enjoya en goot keiyaht layva koss miah boviahra du vass di Bivvel sawkt. Fa’n example, es macht unsah keiyaht layva shtaudah vann miah doon vass Gott sawkt veyyich faythfel bleiva zu nannah.​—Hebräer 13:4.

Nau binn ich nimmi anxious veyyich vass haebna zayld in da future. Ich binn nau part funn en worldwide family, ayni es recht peace un unity hott. In dee family alli-ebbah vatt feah getreet. Sell is vass ich habb vella mei gans layva lang.