De Schreft rät bloos eemol von Tatos un daut es en 3. Mose 19:28 (PB). Doa sajcht daut: “Jie sellen … kjeene Tieekjens en june Hut nenmoaken.” Gott jeef de Israeliten dit Jeboot, wäajens dee sikj nich sullen Tatos ooda Tieekjens enne Hut nenmoaken, soo aus de aundre Velkja daut deeden fa äare Jetta (5. Mose 14:2). Wan de Christen uk nich unja dit Jesaz sent, sellen dee doa oba äwa nodenkjen, woo daut wiest, woo Gott äwa soont aus dit denkjt.

Wudd een Christ sikj sellen loten Tatos ooda Tieekjens em Kjarpa nenmoaken?

 Unjasto die mol dise Bibelvarzhen un daut woat die halpen:

•   “Frues sellen sikj aunstendich [oppstraumen] un schmock kjleeden” (1. Timotäus 2:9, PB). Waut dis Varsch sajcht, paust fa beid: fa Frues uk fa Mana. Soo, een Christ wudd sellen doano seenen, daut am nich soo leet, daut aundre daut stieed. Un dee wudd uk nich sellen bloos doano ut sennen, daut de Menschen sullen no am kjikjen.

•   Eenje Menschen doonen sikj loten Tatos moaken toom wiesen, daut see to eene Sort ooda eene Grupp Menschen jehieren. Un aundre doonen daut, wäajens dee wiesen wellen, daut see daut Rajcht haben, met äaren Kjarpa daut to doonen, waut see wellen. Oba de Schreft rot de Christen too, “[äaren] Kjarpa Gott to jäwen aus een heiljet, läwendjet Opfa, daut Gott aunnämen kaun. Lot daut jun jeistlicha Gottesdeenst sennen” (Reema 12:1, PB). Soo, bedenkjt daut, wuarom du die west loten Tatos moaken. Wan du daut west, wäajens daut jroz Mood es ooda wäajens du daut west wiesen, daut du to eene Grupp jehieescht, dan denkj doaraun, daut du lota veleicht woascht diene Meenunk endren. Oba daut Tato woat doa emma bliewen. Doa ieescht äwa notodenkjen, wuarom du daut west, kaun die halpen, daut rajchte to entscheiden (Spricha 4:7).

•   “Väasechtich plonen, brinjt eenem Vedeenst, soo secha aus aufbrutschen [ooda bloos haustich waut doonen], Oamoot brinjt” (Spricha 21:5, PB). De Menschen woaren sikj foaken haustich eenich, daut dee sikj wellen loten een Tato moaken. Oba wan dee daut Tato ieescht haben, dan woaren de Menschen aundasch äwa dee denkjen un daut kaun dan uk schwoa sennen, eene Oabeit to finjen. Tatos loten wajchmoaken, kaun sea dia komen un uk väl Weedoag brinjen. Soo aus se rutjefungen haben, un waut soone sajen, waut Tatos wajchmoaken, beschoden väl Menschen daut, daut see sikj haben loten Tatos moaken.