De Schreft sajcht, daut et Gott sien Wellen es, daut de Menschen sikj “von aule Huararie friehoolen” (1. Tessalonicha 4:3, PB). Wan de Schreft von “Huararie” rät, dan es doa soont met en aus Ehebruch uk wan Mana met Mana ooda Frues met Frues doonen ooda wan een Maun un eene Fru Sex haben, waut nich befriet sent.

•  Woosoo es Gott daut wichtich, aus een Poa sikj befriet ooda nich?

•  Waut, wan een Poa toopläft, ea dee befriet sent, toom seenen, aus dee tooppaussen?

•  Woo kaun een Poa eene stoakje Ehe haben?

•   Gott es dee, dee dän Ehestaunt enjerecht haft. Hee recht dän don en, aus hee daut ieeschte Poa toopbrocht (1. Mose 2:22-24). Gott haud daut soo jeplont, daut een Maun un eene Fru sikj befrieden un sikj unjarenaunda tru wieren un nich, daut dee bloos fa een Stootje toopläwden.

•   Gott weet, waut daut baste es fa de Menschen. Hee muak dän Ehestaunt soo, daut dee sull fa emma sennen, wiels hee wist, daut et fa jiedrem eenen en de Famielje wudd goot sennen. Denkj mol aun dit: Toom een Meebelstekj rajcht toopstalen mott eena de Aunwiesungen nokomen von dänjanjen, waut daut jemoakt haft. Un Gott siene Aunwiesungen wiesen ons, woo wie kjennen eenen gooden Ehestaunt un eene goode Famielje haben (Jesaja 48:17-18).

•   Butarem Ehestaunt Sex haben, kaun schlemme Foljen haben. Biejlikj kaun eena schwanga woaren, onen daut to wellen, ooda sikj Krankheiten oppschlapen un daut kaun äwajens uk aundre Sorjen met sikj brinjen.

•   Gott jeef Mana un Frues de Mäajlichkjeit, Kjinja to kjrieen derch Sex haben. Gott talt daut Läwen fa heilich un Kjinja to haben es een besondret Jeschenkj von am. Gott well haben, daut wie bloos sellen em Ehestaunt Sex haben. Wan wie am jehuarsom sent, dan wies wie, daut wie daut Jeschenkj von daut Läwen schazen (Hebräa 13:4).

 Toom eenen gooden Ehestaunt haben, es daut nich needich, verem befrieen fa eene Tiet tooptoläwen un daut een jiedra dan veloten kaun, wan dee well. Enne Städ daut es daut väl bäta, wan dee sikj eenich sent, tooptobliewen un tooptoschaufen toom äare Trubbels leesen. a Een befriedet Ehepoa haft sikj een Vespräakjen jejäft un daut woat dee mau rajcht halpen tooptobliewen (Matäus 19:6).

 Daut jeft kjeenen volkomnen Ehestaunt, oba Ehepoaren kjennen eene stoakje Ehe haben, wan dee dän Rot von de Schreft nokomen. Hia es eenjet, waut dee halpen kaun:

•   Sie dolla om dienen Ehepoatna bekjemmat aus om die selfst (1. Korinta 7:3-5; Filippa 2:3-4).

•   Leeft un respakjt junt unjarenaunda (Efeesa 5:25, 33).

•   Lia, die em räden to kontrollen (Spricha 12:18).

•   Sie jeduldich un reed, fuaz to vejäwen (Kolossa 3:13-14).