Hast du daut jewist?
Wuarom wia daut goot, daut Jehova Turtelduwen un aundre Duwen aus een Opfa aunneem?
DAUT Jesaz leet daut too, daut se Jehova kunnen Turtelduwen un aundre Duwen opfren. En de Jesazen von de Opfa wort emma von de beid Sorten Duwen jerät. Wan eena de eene Sort nich haud, kunn eena de aundre Sort brucken (3. Mo. 1:14; 12:8; 14:30). Wuarom wia daut toom gooden? Eent wia, wäajen de Turtelduwen nich emma to haben wieren. Wuarom nich?
Turtelduw
De Turtelduwen sent en de woame Tiet en daut gaunze Launt Israel. Oba em Oktooba flieejen dee emma nom Sieden no de woamre Lenda un em Farjoa komen dee wada trigj no Israel (Leet 2:11-12, JHF; Jer. 8:7, JHF). Doawäajen wia daut fa de Israeliten ieeschtemma schwoa em Winta Opfa to brinjen von Turtelduwen.
Steen-Duw
Oba de aundre Duwen fluagen nich fa eene jewesse Tiet wajch; dee bleewen daut gaunze Joa äwa en Israel. Buta daut wieren dit uk noch tome Duwen (see uk Johanes 2:14, 16). En daut Buak Bible Plants and Animals sajcht daut: “En Palestina hauden de Menschen en aule Darpa un Städa tome Duwen. Jieda Noba haud een Duwenhuskje ooda een Loch enne Waunt, wua de Duwen bennen läwen kunnen” (see uk Jesaja 60:8).
Duw em Duwenhuskje
Doaderch, daut de Israeliten soone Duwen opfren kunnen, waut daut gaunze Joa äwa doa wieren, wia to seenen, daut Jehova leeftolich wia un Vestentnis haud.
