1. Waut wenscht jieda eena sikj, un waut es doa aules met en?

WOO feelst du die, wan wäa, waut du kjanst un väl räakjenst, dienen Nomen vejat ooda die nich mol mea kjant? Soont kaun eenem mootloos moaken. Wuarom? Wiels jieda Mensch wenscht sikj, daut aundre am jleichen. Wie wellen nich bloos, daut aundre ons biem Nomen kjanen, oba uk daut dee weeten, waut fa een Mensch wie sent un waut wie volbrocht haben (4. Mo. 11:16; Hiob 31:6).

2-3. Woo kaun daut bat doa komen, daut wie too sea doaropp bedocht sent, daut aundre ons jleichen sellen? (See daut Bilt aum Aunfank.)

² Oba wiels wie onvolkomen sent, kaun daut leicht bat doa komen, daut wie too sea doaropp bedocht sent, daut aundre ons jleichen sellen. Dän Soton siene Welt well ons enbillen, daut wie motten sea bekaunt sennen un jeieet woaren, om ons doavon auftolenkjen, daut wie onsen himlischen Voda Jehova Gott de Iea un Aunbädunk jäwen, waut am traft (Opb. 4:11).

³ En Jesus siene Tiet wieren eenje Gloowesleidasch nich  rajcht enjestalt. Jesus säd to siene Nofolja: “Wäat junt fa de Schreftjelieede, dee jieren en lange Kjleeda romgonen un opp däm Moakjtplauz wellen bejreest woaren, un jieren dän basten Setplauz en äare Schoolen un opp äare Fastlichkjeiten haben”. Hee säd uk: “Dee woaren doafäa sooväl schwanda vedaumt woaren” (Luk. 20:46-47). Oba Jesus lowd eene oame Wätfru, waut een bät waut enläd, woomäajlich onen daut aundre daut oppfoll (Luk. 21:1-4). Doaraun es to seenen, daut Jesus gaunz aundasch docht äwa aunjeseenen sennen. Dis Artikjel woat ons halpen, soo äwa Iea un Aunseenen to denkjen, aus Jehova Gott daut haben well.

4. Waut es de jratste Iea, un wuarom?

⁴ Waut es de jratste Iea fa ons? Daut es nich de Iea ooda Aunseenen, no dee de Menschen sträwen, wan see sikj huach utlieren wellen, enne Oabeit wiedakomen wellen ooda wan see wellen wiet un breet bekaunt sennen. Paulus läd daut ut, woont de jratste Iea wia. Hee säd: “Nu oba, daut jie Gott haben kjanenjelieet, ooda bäta jesajcht, daut hee junt jefungen [ooda kjanen jelieet] haft, wuarom well jie nu trigj gonen un junt aun daut vesklowen loten, wuavon jie . . . frie jeworden sent?” (Gal. 4:9). Es daut nich eene besondre Iea, daut de Hechsta äwa Himmel un Ieed ons kjant? Jehova weet krakjt, wäa wie sent. Hee leeft ons un well, daut wie siene Frind sent. Jehova haft ons jemoakt, daut wie met am Frind sennen kjennen (Liera 12:13-14).

5. Woo kjenn wie met Gott Frind sennen?

⁵ Moses wia Jehova sien Frint. Aus hee Jehova prachad: “Lot mie . . . weeten, waut diene Wäaj sent”, säd Jehova to dän: “Dit krakjt, no waut du jefroacht hast, woa ekj die jäwen, wiels ekj die en goode Gonsten hool, un ekj die biem Nomen kjan” (2. Mo. 33:12-17). Wie kjennen uk väl goodet kjrieen, wan Jehova ons kjant. Waut mott wie doonen toom met Jehova Frind sennen? Wie motten am leewen un ons am hanjäwen (läs 1. Korinta 8:3).

6-7. Woo kaun daut bat doa komen, daut wie nich mea Frind met Jehova sennen kjennen?

⁶ Oba wie motten uk doano seenen, daut wie Frind bliewen met onsen himlischen Voda. Soo aus de Christen en Galatien mott wie oppaussen, daut wie ons nich wada aun de “schwake en oame Dinje” en dise Welt vesklowen loten, biejlikj doaderch, daut wie en de Welt no Iea sträwen (Gal. 4:9, Reimerbibel). De Christen en Paulus siene Tiet wieren aul soo wiet jekomen, daut Gott an kjand. Oba nu jinjen see wada trigj no Sachen, waut nuscht enhilden. Doawäajen fruach Paulus dee soo to sajen: “Wuarom well jie nu trigjgonen un junt wada aun de onnutzboare Dinj vesklowen loten?”

⁷ Kaun ons daut uk passieren? Jo, daut kaun. Aus wie Jehova kjanen lieeden, hieed wie veleicht krakjt soo aus Paulus opp, doaropp to schaufen, en dän Soton siene Welt aunjeseenen to sennen (läs Filippa 3:7-8). Veleicht leet wie ons nich huach utlieren, säden eene goode Oabeit auf ooda sträwden nich mea doano rikj to woaren. Ooda wie hauden kunt een deel Jelt vedeenen, wäajen wie fein sinjen, Musikj spälen ooda Sport moaken kunnen, oba wie leeten daut toch (Heb. 11:24-27). Daut wudd nich kluak sennen, wan wie dise goode Entscheidungen nu beschoden  wudden un denkjen wudden, daut wie ons waut goodet derchgonen leeten. Daut kaun ons bat doa brinjen, wada trigjtogonen no de “schwake en oame Dinje” en dise Welt, waut wie aul haben trigjeloten. *

8. Waut kaun ons halpen, daut wie wellen bie Jehova goot aunjeseenen sennen?

⁸ Waut kaun ons halpen, daut wie wellen bie Jehova goot aunjeseenen sennen un nich bie de Welt? Doatoo mott wie tweeatlei em Denkj hoolen. Daut ieeschte es, daut Jehova emma deejanje beloont, waut am tru deenen (läs Hebräa 6:10; 11:6). Hee räakjent jieda eenen von siene true Deena sea väl un hee wudd daut fa “ojjerajcht” talen, eenen von dee to vejäten. Jehova “kjant de sienje” emma (2. Tim. 2:19). Hee “woakt äwa de jerajchte äaren Wajch” un weet, woo hee dee ut Vesieekjungen raden kaun (Psa. 1:6; 2. Pet. 2:9).

9. Aun waut wia daut ieeschtemma to seenen, daut Jehova aun sien Volkj eenen Jefaulen haud? Jeff Biespels.

⁹ Eenjemol wees Jehova daut sea dietlich, daut hee aun siene Deena eenen Jefaulen haud (2. Chr. 20:20, 29). Soo wia daut biejlikj bie daut Roode Mäa, aus hee sien Volkj raden deed fa dän Farao siene stoakje Soldoten (2. Mo. 14:21-30; Psa. 106:9-11). Daut wia soo besonda, daut de Menschen en dee Jäajent doa noch 40 Joa lota von räden (Jos. 2:9-11). Wan wie em Denkj hoolen, woo väl Leew un Krauft Jehova haft un woo hee sien Volkj ieeschtemma rad, dan woat ons daut Moot jäwen, wan Gog von Magog boolt jäajen ons komen woat (Hes. 38:8-12). Dan woa wie sea dankboa sennen, daut wie doano jekjikjt haben, bie Jehova goot aunjeseenen to sennen un nich bie de Welt.

10. Waut sell wie noch em Denkj hoolen?

¹⁰ Daut tweede, waut wie em Denkj hoolen sellen, es: Jehova kaun ons opp soone Wajch beloonen, waut wie kjeenmol jedocht hauden. Deejanje, waut bloos goodet doonen toom daut aundre daut seenen sellen, woat Jehova nich beloonen. Wuarom nich? Jesus säd, dee äa Loon wia, daut aundre an doafäa lowden (läs Matäus 6:1-5). Oba Jehova, “dee en daut Jeheemnis sitt”, kjikjt no dee, waut goodet doonen, onen daut dee doa waut fäa kjrieen. Hee sitt, waut dee doonen, un säajent dee doafäa. Un eenjemol beloont Jehova dee opp soone Wajch, wua dee kjeenmol aun jedocht hauden. See wie mol eenje Biespels.

11. Woo säajend Jehova Maria?

¹¹ Aus daut bat doa wia, daut Gott sien Sän sull aus Mensch to Welt komen, wäld Jehova eene deemootje Mejal ut, waut Maria heet, toom Jesus siene Mame sennen. Maria wond en de kjliene Staut Nazaret, waut wiet auf von Jerusalem un dän scheenen Tempel wia (läs Lukas 1:26-33). Wuarom wäld Jehova Maria? De Enjel Gabriel säd to ar, daut see “bie Gott Jnod jefungen [haud]”. Aun daut, waut Maria lota to Elisabet säd, waut met ar em Frintschoft wia, wia to seenen, woo jeistlich see wia (Luk. 1:46-55). Jehova haud Maria beoobacht un wäajen see soo tru wia, wäld hee ar fa dise besondre Oppgow, wua see newers aun jedocht haud.

12-13. Woo wort Jesus jeieet, aus hee jebuaren wia un aus hee 40 Doag lota nom Tempel jebrocht wort?

 ¹² Aus Jesus dan jebuaren wia, leet Jehova daut nich de Huachbeaumte un Harscha en Jerusalem un Betlehem weeten. Enne Städ daut schekjt hee Enjel no eefache Hoads, waut butakaunt Betlehem äare Schop heeden deeden (Luk. 2:8-14). Dise Hoads jinjen dan no daut kjliene Bäbe kjikjen (Luk. 2:15-17). Secha wundaden un freiden Maria un Josef sikj, daut Jesus opp soone Wajch jeieet wort. Waut Jehova doa deed, wia gaunz aundasch aus daut, waut de Fient deed. Aus de Soton de Stiernforscha no Jesus un siene Elren schekjt, hieeden aule en Jerusalem von Jesus siene Jeburt un daut jeef eene groote Oppräajunk (Mat. 2:3). Un doaderch kjeem daut bat doa, daut lota väl kjliene Kjinja dootjemoakt worden (Mat. 2:16).

¹³ Daut Jesaz Moses säd, daut eene Mutta 40 Doag nodäm daut see een Kjint haud een Opfa brinjen must. Doawäajen reisden Maria un Josef un Jesus no dän Tempel en Jerusalem, waut ojjefäa 9 Kilomeeta (6 Miel) auf von Betlehem wia (Luk. 2:22-24). Maria wundad woomäajlich, aus de Priesta doa wudd irjentwaut besondret doonen, wäajen Jesus de Messias sennen wudd. Jesus wort doa uk jeieet, oba nich soo, aus Maria sikj daut veleicht haud väajestalt. Jehova brukt dän frommen Maun Simeon, waut “Gott ferchten deed”, un de Profeetin Hana, waut eene 84-joasche Wätfru wia, toom bekauntmoaken, daut Jesus wudd de vesproakna Messias, ooda Christus, sennen (Luk. 2:25-38).

14. Woo wort Maria von Jehova beloont?

¹⁴ Woo jinkj daut met Maria wieda? Deed Jehova ar wieda beloonen un ieren, wiels see sikj om Jesus kjemmad un dän opptrock? Jo. Gott leet biejlikj en de Bibel oppschriewen, waut see säd un deed. Woomäajlich kunn Maria en de dreeunhaulf Joa, waut Jesus prädijd, nich met dän toop reisen. Veleicht must see en Nazaret bliewen, wiels see eene Wätfru wia. See kunn nich bie aules bie sennen, waut Jesus un siene Jinja beläwden, oba see kunn doa sennen, aus hee storf (Joh. 19:26). Un ver Pinjsten wia Maria met de Jinja toop en Jerusalem, aus de heilja Jeist utjegoten wort (Apj. 1:13-14). Secha wort see uk met dän heiljen Jeist jesaulft, soo aus de aundre Jinja. Daut wudd bedieden, daut see de Jeläajenheit kjrieech, fa eewich met Jesus toop em Himmel to sennen. Es daut nich eene wundascheene Beloonunk fa äaren truen Deenst?

15. Woo wees Jehova, daut hee eenen Jefaulen aun sienen Sän haud, aus dee oppe Ieed wia?

¹⁵ Aus Jesus oppe Ieed wia, wia hee nich doano hinjaraun, bie de Gloowesleidasch ooda Harscha aunjeseenen to sennen. Oba secha jeef am daut väl Moot, daut Jehova dreemol vom Himmel to am räd un am wees, daut hee am leewd. Nodäm aus Jesus sikj em Jordan-Riefa deepen leet, säd Jehova: “Dit es mien leewa Sän, met däm ekj sea tofräd sie” (Mat. 3:17). Woomäajlich hieeden daut bloos Jesus un Johanes de Deepa. Lota, ojjefäa een Joa ver sienen Doot, hieeden dree von siene Apostel, waut Jehova von Jesus säd. Hee säd: “Dit es mien leewa Sän, met däm ekj sea tofräd sie. Horcht no am!” (Mat. 17:5). Un jroz een poa Doag ea Jesus storf, räd Jehova  noch eemol vom Himmel to am (Joh. 12:28).

16-17. Met waut ieed Jehova Jesus, wua kjeena aun jedocht haud?

¹⁶ Jesus wist, daut see am beschuljen wudden Gott to lastren un daut see am hanrechten wudden, wan hee uk nuscht orrajchtet jedonen haud. Oba doawäajen bäd hee noch, daut Jehova sien Wellen sull jedonen woaren un nich sien ieejna (Mat. 26:39, 42). “Hee neem daut lieden aum Kjriez [ooda Pol] opp sikj, un de Schaund”, wiels hee nich en de Welt wull huach aunjeseenen sennen, oba bie sienen Voda (Heb. 12:2). Woo ieed Jehova am dan?

¹⁷ Aus Jesus oppe Ieed wia, fruach hee sienen Voda doano, daut hee am wada de Harlichkjeit jeef, waut hee ea em Himmel haud (Joh. 17:5). De Bibel rät noanich doavon, daut hee noch mea haben wull. Hee velangd nich eene besondre Beloonunk doafäa, daut hee Gott sienen Wellen jedonen haud. Oba waut deed Jehova? Hee ieed am met waut, wua kjeena aun jedocht haud. Jehova wuak Jesus vom Doot opp un jeef am een huaget Aumt em Himmel un uk onstoafeljet Läwen, waut ea noch kjeena jekjräajen haud (Filip. 2:9; 1. Tim. 6:16). * Jesus kjrieech werkjlich eene besondre Beloonunk, wäajen hee tru bleef.

18. Waut woat ons halpen, nich Iea en dise Welt to sieekjen?

¹⁸ Waut woat ons halpen, nich Iea en dise Welt to sieekjen? Wie sellen em Denkj hoolen, daut Jehova siene true Deena emma ieet un beloont, un daut dee daut foaken opp eene Wajch deit, wua wie nich aun jedocht haben. Veleicht woa wie noch mol väl dolla beloont woaren, aus wie ons daut nu väastalen kjennen. Nu hab wie noch väl Trubbels un Schwierichkjeiten en dise schlajchte Welt, oba wie motten nich vejäten, daut dee vegonen woat un uk aul de Iea un daut Aunseenen, waut dee ons jäwen kaun (1. Joh. 2:17). Ons leeftolja Voda Jehova “es nich ojjerajcht, daut hee . . . [onse] Woakjen un . . . [onse] Leew vejäten deit, dee . . . [wie] en sienen Nomen beweesen” (Heb. 6:10). Hee woat ons opp iernst beloonen un veleicht opp soone Wajch, waut wie ons nu noch nich mol väastalen kjennen.