Hast du daut jewist?
Jeft daut noch mea Bewies buta en de Schreft, daut de Israeliten Sklowen en Ägipten wieren?
De Schreft rät doavon, daut Josef met no Ägipten jenomen wort un daut sien Voda Jakob lota met siene Famielje toop von Kanaan no Ägipten trock. Doa siedelden dee en de Goschen-Jäajent aun, wua de Niel-Riefa em Mäa nenschäld (1. Mo. 47:1, 6). De Israeliten “vemeade sich en worde sea, sea stoatj” un doawäajen kjrieejen de Ägipta Angst un muaken an to Sklowen (2. Mo. 1:7, Friesenbibel; 1:8-14).
En onse Tiet haben eenje Jelieede doajäajen jerät un jesajcht, daut et bloos utjedocht es. Un doch jeft et Bewies doafäa, daut et ieeschtemma Sklowen en Ägipten jeef, waut von Sem * siene Nokomen wieren.
Biejlikj haben Jeschichtsforscha em Nuaden von Ägipten Jebieda von de ieeschtemmasche Tiet väajegroft. De Bibeljelieeda John Bimson sajcht, daut et doa oppet weinichste 20 Städen jeft, wua mol waut von Sem siene Nokomen läwden. James K. Hoffmeier, waut väl äwa Ägipten studieet, sajcht: “Väle, waut soo räden deeden aus Sem siene Nokomen, trocken von de Wastkaunt Asien [wua Jakob siene Famielje häakjeem] no Ägipten. Un daut wia ojjefäa tweschen 1800 un 1540 v. Chr. . . . Rom dise Tiet sullen Abraham, Isaak un Jakob jeläft haben, un daut stemt met daut toop, waut 1. Mose äwa jane Tiet un Omstend sajcht.”
Oba daut jeft noch mea Bewies. Opp een Biet Papierus (ojjefäa von 2000 bat 1600 v. Chr. jeschräwen) sent de Nomes von Sklowen bowen, waut em Sieden von Ägipten en een Hus schauften. Mea aus 40 von dee hauden krakjt soone Nomes, aus Sem siene Nokomen jeweenlich hauden. Dee deeden biejlikj Zeich moaken, Äten reedmoaken, em Hus schaufen un aundre schwoare Oabeiten. De Forscha Hoffmeier sajcht: “Wan von aul dee, waut bie dit Hus schauften . . ., äwa 40 von Sem siene Nokomen wieren, dan kaun daut sennen, daut et en daut gaunze Launt sea väl von Sem siene Nokomen jeef – besonda en de Jäajent, wua de Niel-Riefa em Mäa nenschäld.”
De Jeschichtsforscha David Rohl schrift, daut eenje von de Nomes opp dise List sikj krakjt soo hieren, “aus wudd eena en de Schreft läsen”. Opp daut Biet Papierus stonen biejlikj soone Nomes bowen aus Isachar, Asser un Schifra (2. Mo. 1:3-4, 15). David Rohl sajcht: “Daut es een kloara Bewies, daut de Israeliten en Ägipten Sklowen wieren”.
John Bimson sajcht noch: “Daut, waut de Schreft äwa de Sklowarie en Ägipten sajcht un woo daut Volkj lota von doa veleet, stemt krakjt met daut, waut de Jeschichtsforscha rutjefungen haben.”
^ Varsch 4 Sem wia eent von Noah siene dree Säns. Von am staumden veschiedne Velkja auf. Mank dee wieren woomäajlich de Elamita, de Assiera, de ieeschte Chaldäa, de Israeliten, de Siera un uk veschiedne arabische Stam.
