MILLIONENDE Christen sent sikj eenich jeworden, nich Wienachten to fieren. Woo denkjen dee äwa dise Entscheidunk? Denkjen dee, daut an daut aun waut fält? Denkjen dee äare Kjinja, daut dee waut goodet vespält gonen? See mol, waut Jehova siene Zeijen von veschiedne Lenda doaräwa sajen.

Aun Jesus Christus denkjen: “Ea ekj eent von Jehova siene Zeijen wia, wankt ekj selden mol no de Kjoakj. Un wan ekj deed, wia daut aun Wienachten ooda Oostren. Oba nich mol dan docht ekj sea aun Jesus Christus. Ekj fia nich mea Wienachten, oba ekj wank nu tweemol de Wäakj no christelje Toopkomes un doo mau rajcht aundre von de Schreft lieren, waut dee äwa Jesus sajcht!”(EVE, AUSTRALIEN).

De Freid, aundre waut to schenkjen: “Ekj jleich daut sea, wan Menschen mie onverhofs een Jeschenkj jäwen. Mie freit daut, wan se mie äwarauschen! Ekj jleich uk Koaten to moaken un Bilda to molen fa aundre, wiels daut moakt dee een beskje schaftja un daut moakt mie uk schaftich”(REUBEN, NUAD-IRLAUNT).

Aundre uthalpen: “Wie jleichen daut sea, kranke Menschen eene Moltiet to brinjen; ooda dee Bloomen brinjen ooda eenen Kjieekj ooda irjenteen kjlienet Jeschenkj toom dee oppmuntren. Un wie jleichen daut, wäajens wie kjennen dise Menschen irjenteene Tiet em Joa besieekjen”(EMILY, AUSTRALIEN).

Met de Famielje toopkomen: “Wan wie Famieljentoopkomen haben, dan kjennen onse Kjinja äare Onkels un Tauntes, äare Grootelren un äare Nichten un Vadasch bäta kjanen lieren un dee jeit daut scheen. Onse Famielje weet, daut wie dee besieekjen, wäajens wie dee väl räakjnen un nich wäajen wie bemott sent, wiels daut irjenteen Heljedach es”(WENDY, CAYMAN-INSLEN).

Fräd: “Rom Wienachten sent aula emma soo drock, daut mau weinich Menschen aun Fräd denkjen. Oba daut, waut de Schreft fa de Menschen vesprakjt, jeft mie Fräd. Ekj weet, daut miene Kjinja noch mol woaren en eene bätre Welt kjennen läwen”(SANDRA, SPAUNIEN).