Soo aus wie en dän väajen Artikjel jelieet haben, jinkj daut bie Jesus om eene wichtje Sach: Hee “prädijd daut Evangelium vom Gottesrikj” (Lukas 8:1, PB). Hee reisd hundade Kilomeeta en daut Launt Israel toom de Menschen von Gott sien Kjennichrikj lieren. Jesus sien Deenst es en de vea Evangelium oppjeschräwen: Matäus, Markus, Lukas un Johanes. Doa rät daut äwa 100 Mol von Gott sien Kjennichrikj. Un de mieeschte Tiet räd Jesus selfst doavon. Secha haft hee uk noch väl mea von Gott sien Kjennichrikj jesajcht (Johanes 21:25).

Woosoo wia Gott sien Kjennichrikj fa Jesus soo wichtich, aus hee oppe Ieed wia? Eene Uasoak wia, wiels Jesus wist, daut Gott am utjewält haud toom en daut Kjennichrikj rejieren (Jesaja 9:5; Lukas 22:28-30). Oba bie Jesus jinkj daut nich doarom, daut hee wull Macht kjrieen ooda aunjeseenen sennen. Hee deed daut Kjennichrikj nich unjastetten, wiels hee doa selfst waut bie haud (Matäus 11:29; Markus 10:17-18). De wichtichste Uasoak, wuarom Jesus daut Kjennichrikj unjastett es, wiels hee sienen himlischen Voda un siene true Nofolja leeft.

Jesus räakjent sienen himlischen Voda sea väl (Spricha 8:30; Johanes 14:31). Hee must daut bewundren, woo sien Voda wia, soo aus siene Leew, sien Metleet un siene Jerajchtichkjeit (5. Mose 32:4; Jesaja 49:15; 1. Johanes 4:8). Jesus mott daut secha schlajcht lieden kjennen, wan se äwa sienen Voda Läajes vetalen, soo aus daut Gott doa nuscht om romjeft, wan wie lieden motten ooda daut hee daut mau rajcht well, daut wie lieden sellen. Krakjt doawäajen jroz deed Jesus sea Fliet “un prädijd daut Evangelium vom Rikj”. Hee wist, daut derch dit Rikj wudd daut kloa woaren, waut de Woarheit äwa sien Voda es (Matäus 4:23, PB; 6:9-10). Woo woat daut Kjennichrikj dit doonen?

Derch daut Kjennichrikj woat Jehova eene groote Endanis moaken fa de Menschen. Gott woat siene Deena “aule Tronen von de Uagen weschen”. Hee woat daut wajchnämen, waut ons Tronen jeft, wiels “doa woat kjeen Doot ooda Trua ooda Hielen ooda Weedoag mea sennen” (Openboarunk 21:3-4, PB). Derch daut Kjennichrikj, woat Gott de Menschen äa Lieden aula wajchnämen. *

Wäajen Gott sien Kjennichrikj soo väl doonen woat, wundat ons daut nich, woosoo Jesus soo sea väl von daut Kjennichrikj vetald. Hee wist daut, daut dit Kjennichrikj daut wudd openboaren, woo väl Macht sien himlischa Voda haft un woo metliedent dee werkjlich es (Jakobus 5:11). Jesus wist daut uk, daut daut Kjennichrikj noch aundre wudd halpen: Menschen, waut Gott jehorchen.

Noch lang ea Jesus no de Ieed kjeem, läwd hee aul em Himmel met sienen Voda toop. De Voda brukt sienen Sän toom aules moaken: dän schmocken Stiernhimmel un uk de schmocke Ieed met de Tieren un Plaunten (Kolossa 1:15-16). Von aul dit haud Jesus besonda aun de Menschheit “eenen Jefaulen” (Spricha 8:31, PB).

Aus Jesus oppe Ieed wia, wees hee siene Leew fa de Menschen. Von fuaz aun muak hee daut kloa, daut hee jekomen wia, om dee Menschen, waut daut aun Help fäld, “daut Evangelium to prädjen” (Lukas 4:18, PB). Oba Jesus räd nich bloos von Menschen halpen, hee bewees siene Leew fa de Menschen. Soo wia daut eemol, aus eene groote Häad Menschen am hieed räden. Jesus “jaumad daut äwa an, un hee heeld de kranke” (Matäus 14:14, PB). Aus doa eemol een Maun met eene schlemme Krankheit em Gloowen no Jesus kjeem un fruach, aus dee am heelen wull, säd Jesus: “Ekj well; sie jereinicht!” Jesus heeld dän Maun ut Leew un Metjefeel (Lukas 5:12-13, JHF). Aus Jesus sach, woo siene Frindin Maria truaren deed, wäajen äa Brooda Lazarus jestorwen wia, wort Jesus “en sienem Jeist sea oppjeräacht un am foll daut sea schwoa” un “Jesus hield” (Johanes 11:32-36, PB). Dan deed Jesus waut, wua se nich met jeräakjent hauden: Hee wuak Lazarus vom Doot opp, wan dee uk aul fa vea Doag doot jewast wia! (Johanes 11:38-44).

Jesus wia sikj em kloaren, daut de Help, waut hee de Menschen jeef, nich wudd fa lang sennen: Deejanje, waut hee haud jeheelt, wudden irjentwanea wada krank woaren. Un dee, waut hee haud vom Doot oppjewakjt, wudden wada stoawen. Oba hee wist daut uk, daut Gott sien Kjennichrikj aul dit schwoare wudd fa emma oppriemen. Krakjt doawäajen jroz deed Jesus nich bloos Wunda; hee deed flietich “von Gott sien Rikj” prädjen (Matäus 9:35, PB). De Wunda, waut hee deed, weesen noch mau een kjlienet Poat von aul daut, waut Gott sien Kjennichrikj aulawäajen oppe Welt doonen wudd. Unjasto wie ons daut mol, waut de Schreft von dee Tiet sajcht.

• Kjeena woat mea krank woaren

  “Dee, dee blint sent, woaren dan met äare Uagen seenen kjennen, un dee, dee doof sent, woaren de Uaren opgonen. Dee, dee lom sent, woaren aus een Ree sprinjen, un dee, waut nu stomm sent, woaren met freid sinjen.” Un “kjeena von june Menschen woat sajen: ‘Ekj sie nich jesunt’” (Jesaja 33:24; 35:5-6; PB).

• Kjeena woat mea stoawen

  “De jerajchte woaren daut Launt oawen un eewich doabennen bliewen” (Psalm 37:29, PB; von ons dunkel jemoakt).

  “De HAR woat opp emma dän Doot wajchnämen. Hee woat aulem en sien Volkj de Tronen wajchweschen” (Jesaja 25:8, PB).

• De Menschen woaren vom Doot oppstonen

  “De Tiet kjemt, daut aul dee, dee en de Jräwa ligjen, siene Stemm hieren woaren. See woaren dan verendach komen” (Johanes 5:28-29, PB).

  De Menschen woaren “vom Doot oppstonen” (Aposteljeschicht 24:15, PB).

• Kjeena woat onen Hus ooda onen Oabeit sennen

  “Dee woaren Hiesa buen un en dee wonen; see woaren Wiengoades aunplaunten un von de Frucht äten. Dee woaren nich buen un een aundra doabennen wonen; dee woaren nich aunplaunten un een aundra daut äten. . . . Waut miene jewälde buen, woaren see lang goot brucken kjennen” (Jesaja 65:21-22, PB).

• Doa woat kjeen Kjrich mea sennen

  Gott woat “en aule Welt met aulem Kjrich een Enj [moaken]” (Psalm 46:10, PB).

  “Doa woat kjeen Launt jäajen daut aundre, siene Schwieed opphäwen; dee woaren nich mea toom Kjrich reedmoaken” (Jesaja 2:4, PB).

• Kjeena woat mea knaup to äten haben

  “De Ieed woat äare Arnt jäwen; Gott, ons Gott, woat ons säajnen” (Psalm 67:6, NW).

  “Doa [woat] jenuach Jeträajd em Launt sennen, un de Boaj bat bowen dicht voll stonen” (Psalm 72:16, PB).

• Doa woat kjeena mea oam sennen

  “Hee woat de oame nich gaunz vejäten” (Psalm 9:19, PB).

  “Hee woat de oame raden wan dee schrieen, uk de unjadrekjte, dee kjeenen Helpa haben. Hee woat äwa de schwake un oame Metleet haben, un de oame woat hee vom Doot raden” (Psalm 72:12-13, PB).

Wan wie äwa de Vespräakjungen nojreblen, waut Gott sien Kjennichrikj brinjen woat, es ons daut dan dietlich, wuarom Gott sien Kjennichrikj fa Jesus soo wichtich es? Aus hee oppe Ieed wia, räd hee flietich to aulem von daut Kjennichrikj, wäaemma doa horcht. Hee wist, daut dit Kjennichrikj met aule Trubbels wudd een Enj moaken, waut et vondoag dän Dach jeft.

Freist du die doa aul too, waut de Schreft sajcht, waut dit Kjennichrikj aules doonen woat? Wan jo, woo kaust du dan noch mea von dit Kjennichrikj lieren? Waut motst du doonen, daut du daut uk beläwen kaust, waut dit Kjennichrikj aules brinjen woat? Daut woat daut latste Poat von dise Artikjels ons sajen.