Ekj woss en Los Angeles, Kalifornien, en de Stäts opp en eene sea schlajchte Jäajent, waut bekaunt wia fa Droggs un Baunden. Onse Elren hauden sas Kjinja un ekj wia de tweeda.

Onse Mame wankt emma no de evangelische Kjoakj un neem ons uk met. Oba aus Jugentlicha jeef ekj bloos väa, een goodet Läwen to fieren. Aum Sindach wia ekj en de Kjoakj un wia doa een Sinja un enne Wäakj jleicht ekj Fasten, Droggs un deed Huararie driewen.

Ekj wia een sea Wutja un deed aundre hunjsch behaundlen. Ekj brukt daut, waut ekj to hoolen kjrieech toom jewennen. Waut ekj bie de Kjoakj lieed, deed nuscht aun mie. Ekj säd emma: “Rach eewen es dän Harn siene Sach un hee brukt mie doatoo!” Aus ekj hinjen en de 1960ja Joaren en de Huachschool wia, haud ekj väl met eene polietische Grupp to doonen, waut met Jewault fa de Menschen äare Rajchten strieden deed. Ekj stunt mie met eene Grupp Schiela toop un wie deeden uk fa de Menschenrajchten strieden. Un jiedatsmol, wan wie daut deeden, musten se fa een Stootje de School toomoaken.

Bloos soo aus dit jäajenaun to sennen, wia mie noch nich jenuach, wiels ekj sea kortnatuarich wia. Soo dan funk ekj aun, ut Hauss, aundre Menschen to veschlonen. Biejlikj wankten ekj un miene Frind mol eenen Film kjikjen un en disen Film weesen see, daut de afrikaunische Sklowen enne Stäts sea lieden musten. Un wäajen wie soo oppjeräacht wieren äwa dise Ojjerajchtichkjeit, fung wie fuaz aun, de witte junge Menschen doa to vekjielen. Un dan wankt wie uk noch no eene Städ, wua witte Menschen wonden, wäajen wie wullen noch mea veschlonen.

Ekj wia noch nich mol twintich Joa, dan worden ekj un miene Breeda aul fa grausome Vebräakja jetalt. Wie kjeemen em Trubbel met de Poliezen. Eent von miene jinjre Breeda wia Poat von eene sea bekaunde Baund un ekj stunt mie uk met dee toop. Met mien Läwen jinkj daut Loch en.

Eent von miene Frind siene Elren wieren Jehova siene Zeijen. Un dee kroagden mie no een Toopkomen un ekj wankt doa han. Von Aunfank aun kunn ekj seenen, daut Jehova siene Zeijen gaunz aundasch wieren. Aule hauden eene Bibel un dee brukten dee mau rajcht bie de Toopkomes. Un uk junge Menschen hilden eene Räd! Ekj wia sea vewundat, aus ekj lieed, daut Gott eenen Nomen haud un daut es Jehova. Un ekj kunn hieren, daut dee dän uk brukten (Psalm 83:18, NW). En de Vesaumlunk wieren veschiedne Sorten Menschen un daut wia kloa to seenen, daut dee nich eenen Unjascheet muaken.

Aum Aunfank wull ekj nich de Schreft studieren met Jehova siene Zeijen, oba ekj jleicht daut, no dee äare Toopkomes to wanken. Eenen Owent, aus ekj bie een Toopkomen von Jehova siene Zeijen wia, wia doa eene Grupp von miene Frind wua hanjewankt, wua Sinja wieren. Doa hauden see eenen Jugentlichen dootjekjielt, wäajen dee an nich haud wult sienen Lada-Wanikj jäwen. Un dän näakjsten Dach puchten see mau rajcht doamet, daut see dän hauden omjebrocht. Mau rajcht aus dee verem Jerecht wieren, lachten see doaräwa, waut see jedonen hauden. De mieeschte von dee kjrieejen eene Strof: läweslank Jefenkjnis. Soo ekj wia sea froo, daut ekj dän Owent nich wia met dee toop jewast. Ekj wort mie eenich, mien Läwen to endren un auntofangen, de Schreft to studieren.

Wäajen ekj daut beläft haud, daut doa soon Unjascheet mank de Menschen jemoakt wort, wundad mie daut sea, aus ekj sach, woo Jehova siene Zeijen sikj unjarenaunda behaundlen. Biejlikj aus een Witta von Jehova siene Zeijen mol must no een aundret Launt reisen, leet hee siene Kjinja bie eene dunkle Famielje. Un eenen dunklen Jung, waut eene Städ fäld toom wonen, wort von eene witte Famielje bie an tus oppjenomen. Ekj wort en, daut Jehova siene Zeijen Jesus siene Wieed ut Johanes 13:35 (PB) nokjeemen. Doa sajcht daut: “Wan jie Leew unjarenaunda haben, woat aulemaun seenen, daut jie miene Jinja sent.” Ekj wist daut, daut ekj werkjlich haud woare Breeda un Sestren jefungen.

Wäajen ekj de Schreft studieed, wort ekj en, daut ekj must mien denkjen endren. Ekj must nich bloos opphieren, hunjsch to sennen, oba ekj must uk en miene Jedanken enseenen, daut et daut baste Läwen es, emma frädlich to sennen (Reema 12:2). Un soo bie sacht funk ekj dan aun, mien Läwen to endren. En Jaunewoa 1974 leet ekj mie aus eent von Jehova siene Zeijen deepen.

Uk no miene Doop must ekj noch sea aun miene Natua schaufen. Biejlikj eemol, aus wie von Hus to Hus prädjen jinjen, rand ekj eenen Stäla hinjaraun, waut jroz daut Rädio von ut miene Koa jestolen haud. Aus ekj dän wieda nokjeem, schmeet dee daut Rädio wajch un kleiwd ut. Aus ekj de aundre daut vetald, woo ekj mien Rädio wada trigjekjräajen haud, fruach een Eltesta mie, waut doa en de Grupp wia: “Stephen, waut wurscht du jedonen haben, wan du dän to hoolen jekjräajen hautst?” Dise Froag brocht mie sea toom nodenkjen, daut ekj noch sea must aun miene Natua schaufen.

En Oktooba 1974 wort ekj Pionia un deed 100 Stund de Moonat aundre Menschen von de Bibel lieren. Lota kunn ekj aus friewelja Metoabeida en de Hauptoffiz von Jehova siene Zeijen en Brooklyn, New York, methalpen. Aune 1978 trock ekj wada trigj no Los Angeles, om fa miene kranke Mame to sorjen. Twee Joa lota befried ekj mie met Aarhonda. See deed mie sea halpen, daut ekj mie kunn om miene Mame kjemren, bat dee storf. Een Stootje lota kunnen ekj un Aarhonda no de Gilead-Bibelschool fa Missionoaren gonen un wie worden no Panama jeschekjt, wua wie noch emma aus Missionoaren deenen.

Von miene Doop aun haft daut foaken soont jejäft, wua ekj mie must sea beoabeiden, daut ekj nich aunfunk, de Menschen to vedujjen. Wan mie nu wäa well enoajren, dan go ekj doa fuat ooda proow, daut frädlich to fiksen. Väl Menschen, mau rajcht uk miene Fru, haben mie aul sea jeloft, daut ekj daut soo aus dit doonen kaun. Ekj mott mie uk sea äwa mie selfst wundren! Ekj weet, daut es nich wäajen mie, daut ekj miene Natua hab kunt endren. Ekj weet, daut es bloos mäajlich jewast, derch de Krauft, waut de Bibel haft (Hebräa 4:12).

Wäajen de Schreft hab ekj nu een scheenet Läwen un ekj hab jelieet, met aundre frädlich to sennen. Ekj doo de Menschen nu nich mea Schoden aun; enne Städ daut halp ekj dee em jeisteljen. Ekj deed mau rajcht met eenen Mensch de Bibel studieren, met dän ekj mie enne School emma sea doll wia. Dee leet sikj dan uk deepen un wie wonden uk fa een Stootje toop. Un bat vondoag dän Dach sent wie noch emma goode Frind. Ekj un miene Fru haben met väl Menschen kunt de Bibel studieren un wie haben äwa 80 von dee kunt halpen, Jehova siene Zeijen to woaren.

Ekj sie Jehova sea dankboa, daut hee mie haft soon scheenet Läwen jejäft un dan uk noch soo väl woare Frind.