Aus de World Health Organization (WHO) en Moaz 2020 aunjeef, daut de COVID-19 eene Krankheit äwa de gaunze Welt wia, kunnen väle sikj daut nich väastalen, daut dise Krankheit een Joa lota noch emma wudd sennen. Millionende Menschen, uk eenje von Jehova siene Zeijen, haft dise Krankheit sea toojesat, em kjarpalichen, ennalichen un em tieteljen. Woo haben Jehova siene Zeijen doafäa jesorcht, daut en dise schwoare Tiet aundre utjeholpen woat?

 Daut Plonakommitee vom Väastaunt von Jehova siene Zeijen haft äwa 950 Nootfaulkommitees aunjestalt toom äwa de gaunze Welt wäajen de COVID-19-Krankheit halpen. Opp eenje Städen haben dee daut soo enjerecht, daut Breeda sikj unjarenaunda halpen, un opp aundre Städen haben Jehova siene Zeijen von de Rejierunk Help jekjräajen. De Nootfaulkommitees haben uk opp een deel Städen met needje Sachen utjeholpen.

 Well wie mol seenen, waut en Paraguay passieed. En eene Post schreef daut, daut et wäajen de COVID-19-Krankheit doa soone groote Knaupheit jeef, “daut een deel Menschen en Paraguay nich jenuach to äten hauden.” Oba daut Nootfaulkommitee en Paraguay haud aul Paks vedeelt, wua fa twee Wäakj Ätwoa, Reinjungsstoff un aundre Needichkjeiten bennen wieren, un daut rieekjt too fa eene Famielje von vea Menschen. Jieda Pak kost rom 30 stätsche Dolla.

 Woo deeden dee, waut doa metholpen, sikj beschitzen, daut see sikj de COVID-19-Krankheit nich oppschlapten? Dee brukten eenen Mulschutz un bleewen wiet uteneen. Dee muaken secha, daut de Kompanieen, wua see daut Ätwoa koften, äare Jebieda rein wieren, un daut dee de Sechaheitsväaschreften strenj nokjeemen. Un hia es met en, daut een jiedra, waut met de Paks omjeit, eenen Mulschutz un Haunschkjes brukt. Un äare Foatieja motten dee met soont rein moaken, waut uzhent fa Virus es, uk de Städen wua see de Paks hansaten. Wan see de Breeda dan ieescht de Paks brinjen, bliewen dee wiet uteneen.

 Bat Jaunewoa 2021 jeef daut Plonakommitee de Frieheit, äwa 25 Millionen stätsche Dolla to brucken toom uthalpen wäajen de COVID-19-Krankheit. De Betels un de Nootfaulkommitees brucken dise Gowen sea väasechtich un schaufen doaropp, de baste Priesen to kjrieen, wan see needje Sachen kjeepen. En Chile biejlikj wullen de Breeda, waut em Nootfaul uthalpen, 750 Kilograum (1 653 Punt) Linsen kjeepen (eene kjliene Sort plaute Schaublen). Oba de Linsen wieren bloos en eene Moonat dobbelt soo dia jeworden. De Breeda worden sikj met eenen Vekjeepa eenich, de Linsen fa disen hechren Pries to kjeepen. Twee Stund lota leet de Vekjeepa an weeten, daut een aundra Kjeepa siene Linsen trigjebrocht haud. Enne Städ daut see nu musten dän huagen Pries betolen, soo aus berät wia, beed de Vekjeepa onse Breeda de Linsen aun, waut jana trigjebrocht haud, fa dän biljaren Pries von eene Moonat ea.

 Oba aus onse Breeda doahan kjeemen toom de Linsen holen, proowd de Vekjeepa daut to bräakjen, waut see berät hauden, un beschuljd dee, daut see daut Äten ojjerajcht vedeelen deeden, soo aus aundre Organisazionen hauden. No een stellet kortet Jebäd säd eent von de Breeda to dän Vekjeepa, daut jieda Vesaumlunk sikj daut aul unjastonen haud, wäm daut werkjlich fäld. De Breeda erkjläaden dän uk, daut de Paks fa jieda Famielje met soone Sachen reedjemoakt woaren, waut dise Famielje daut baste brucken kaun; doano, von waut fa eene Sort Menschen dee komen un waut dee jewant sent to äten. Tolatst vesechaden onse Breeda dän Vekjeepa uk, daut aul de Gowen un de Oabeit, waut Jehova siene Zeijen doonen, friewellich es. Dee wia sea äwarauscht. De Vekjeepa wia nich bloos doamet envestonen met dän Pries rauftogonen, oba daut näakjste Mol aus de Breeda von dän Linsen koften, schonk hee dee noch 400 Kilograum (882 Punt) Linsen.

 Lusu es eene elre Wätfru von Liberia un dee wont met äare Dochta, dee äaren Maun un dee äare Kjinja toop. Aus dee eenen Zemorjes toop Freestikj eeten un dän Varsch fa dän Dach läsen deeden, wort Lusu äa 7-joascha Grootjung en, daut see nich mea Äten hauden. Hee fruach: “Waut woa wie äten?” Lusu säd to am, daut see aul om Help jebät haud un daut see sikj secha wia, daut Jehova fa an sorjen wudd. Fuaz dän Nomeddach fonden waut Eltestasch von de Vesaumlunk ar un säden, daut see komen sull, sikj waut Ätwoa holen. Lusu sajcht: “Mien Grootjung sajcht, daut hee nu weet, daut Jehova Jebäda hieet un beauntwuat, wäajen dee mien Jebäd beauntwuat haud.”

 Eene Fru von de Demokratische Republikj Kongo wont biesied eene Famielje, waut Jehova siene Zeijen sent. Nodäm daut see jeseenen haud, daut dise Famielje Äten kjrieech von dee äare Gloowesbreeda, säd see: “No dise Krankheit woa wie Jehova siene Zeijen woaren, wäajen dee kjemren sikj om äare Breeda un Sestren en dise schwoare Tiet.” Äa Maun fruach ar: “Du west eent von Jehova siene Zeijen woaren, bloos wäajen een Sakje Ries?” See säd: “Nä, nich doawäajen, oba daut Sakje Ries es een Bewies von woare Leew.”

 Wäajen jie soo friejäwrich sent, haben Jehova siene Zeijen fuaz kunt soone Breeda un Sestren halpen, waut daut needich fäld en dise schwoare Tiet von de wiet vespreede Krankheit. Dankscheen fa june Gowen, waut jie jejäft haben derch donate.ps8318.com.