Mondach zemorjes, dän 10. Oktooba 2022, deeden rusche Soldoten väl Städa en de Ukraine vebommen. Dee deeden daut, om sikj to rajchnen, wiels twee Doag ea eene Bomm opp eene wichtje Brigj tweschen de Insel Krim un Russlaunt oppjedäwat wia. Un daut aules passieed eene korte Tiet nodäm daut jewesse Rejierungsmana doavon räden deeden, daut Harmagedon boolt passieren wudd.

•    “Nu es wada de Jefoa groot, daut Harmagedon kunn passieren; krakjt soo aus don en de Tiet von [dän stätschen Präsident John F.] Kennedy un dän Trubbel opp Kuba [Cuban Missile Crisis]. . . . Fa mie to beseenen woat daut gaunz secha to Harmagedon fieren, wan doa Atomm-Bommen jebrukt woaren” (Joe Biden, Präsident von de Stäts, 6. Oktooba 2022).

•    Aus se Präsident Volodymyr Zelensky von de Ukraine befruagen, woo daut no am no kunn utkomen, wan doa Atomm-Bommen jebrukt woaren, säd hee: “Ekj denkj uk, doa woat boolt Harmagedon passieren; daut’s ne Jefoa fa dän gaunzen Ieedbaul” (BBC News, 8. Oktooba 2022).

 Kunn daut to Harmagedon fieren, wan se woaren Atomm-Bommen brucken? Waut sajcht de Schreft doaräwa?

 Nä. Daut Wuat “Harmagedon” finj wie bloos een Mol enne Schreft, en Openboarunk 16:16. Doamet es nich een Kjrich tweschen de Lenda jemeent, oba een Kjrich tweschen Gott un “de Kjennichs opp de Ieed” (Openboarunk 16:14, PB). Gott woat dän Kjrich von Harmagedon brucken, om met de menschelje Rejierungen een Enj to moaken (Daniel 2:44).

 Wan du noch mea doaräwa weeten west, waut Harmagedon fa de Ieed bediet, läs dän Artikjel Waut es de Kjrich von Harmagedon?

 Nä. Wan de Menschen veleicht uk woaren Atomm-Bommen brucken en eenen Kjrich, woat Gott daut oba nich tooloten, daut de Ieed gaunz venicht woat. De Schreft sajcht:

•    “De Ieed blift emma stonen” (Liera 1:4, PB).

•    “De jerajchte woaren daut Launt oawen un eewich doabennen bliewen” (Psalm 37:29, PB).

 Oba doch woat sikj daut boolt oppe Ieed sea veendren. Daut wiesen de Profezeiungen ut de Schreft un daut, waut vondoag dän Dach aules passieet (Matäus 24:3-7; 2. Timotäus 3:1-5). De Schreft sajcht verut, waut doa noch komen woat. Finj daut ut derch een Bibelstudium, waut emsonst es.