پاک کلام دا جواب

 بپتسمے دا مطلب اے پانی چ ڈُبکی لینا۔‏ a پاک کلام چ کئی لوکاں دے بپتسمے دا ذکر کیتا گیا اے۔ (‏اعمال 2:‏41‏)‏ اوہناں وچوں اِک یسوع مسیح اے جنہے بپتسمہ لین لئی دریائے یردن وچ ڈُبکی لئی سی۔ (‏متی 3:‏13،‏ 16‏)‏ ایہدے کئی سالاں بعد ایتھیوپیا دے رہن والے اِک بندے نے اِک تلا چ بپتسمہ لیا جیہڑا اوس سڑک دے کنارے سی جتھوں اوہ لنگھ رہیا سی۔—‏اعمال 8:‏36-‏40‏۔‏

 یسوع نے دَسیا کہ اوہدا شاگرد بنن لئی ایہہ ضروری اے کہ اِک بندہ بپتسمہ لوے۔ (‏متی 28:‏19، 20‏)‏ پطرس رسول نے وی ایہی تلیم دِتی۔—‏1-‏پطرس 3:‏21‏۔‏

ایس مضمون چ ویکھو کہ

•  بپتسمہ لین دا مطلب کیہہ اے؟‏

•  پاک کلام ننھے بچیاں نُوں بپتسمہ دین بارے کیہہ کہندا اے؟‏

•  باپ، بیٹے تے پاک روح (‏روح‌القدس)‏ دے ناں تے بپتسمہ لین دا مطلب کیہہ اے؟‏

•  کیہہ دُبارہ بپتسمہ لینا گُناہ اے؟‏

•  ہور بپتسمے جنہاں دا پاک کلام چ ذکر مِلدا اے

•  بپتسمے بارے غلط نظریے

 بپتسمہ لین دا مطلب کیہہ اے؟‏

 بپتسمہ لے کے اِک بندہ دُوجیاں دے سامنے ظاہر کردا اے کہ اوہنے اپنے گُناہواں توں توبہ کر لئی اے تے خدا نال وعدہ کر لیا اے کہ ہُن توں اوہ اوہدی مرضی پوری کرے گا۔ نالے اوہ زندگی دے ہر معاملے چ یہوواہ خدا تے یسوع مسیح دے حکماں مطابق چلے گا۔ بپتسمہ لین توں بعد جیہڑے لوک خدا دے معیاراں مطابق چلدے رہن گے اوہ ہمیشاں دی زندگی پان گے۔‏

 بپتسمہ لینا کسے وی انسان دی زندگی چ اِک بوہت وڈی تبدیلی ہوندی اے۔ پاک کلام چ دَسیا گیا اے کہ بپتسمہ لینا اِنج ای اے جیویں کہ دفن ہونا۔ (‏رومیوں 6:‏4؛‏ کُلسّیوں 2:‏12‏)‏ جدوں اِک بندہ پانی چ ڈُبکی لیندا اے تے اوہ اِک لحاظ نال اپنی پرانی زندگی تے بھیڑے چال‌چلن نُوں دفنا دیندا اے۔ جدوں اوہ پانی چوں باہر آندا اے تے اوہ اِک مسیحی دے طور تے اپنی نوِیں زندگی شروع کردا اے۔‏

 پاک کلام ننھے بچیاں نُوں بپتسمہ دین بارے کیہہ کہندا اے؟‏

 پاک کلام چ کتے وی نئیں لکھیا کہ بچیاں نُوں بپتسمہ دینا چاہی دا اے۔‏ b پاک کلام چ دَسیا گیا اے کہ اِک بندے نُوں بپتسمہ لین توں پہلاں کجھ شرطاں پوریاں کرنیاں پیندیاں نیں۔‏

 مثال لئی، اوہنوں خدا دے کلام دی بنیادی تلیم دی سمجھ ہونی چاہی دی اے تے اوس تلیم مطابق چلنا چاہی دا اے۔ اوہنوں اپنے گُناہواں توں توبہ کرنی چاہی دی اے۔ نالے دُعا چ اپنی زندگی یہوواہ دے ناں کرنی چاہی دی اے۔ (‏اعمال 2:‏38،‏ 41؛‏ 8:‏12‏)‏ پر ننھے بچے تے ایہہ سب نئیں کر سکدے۔‏

 باپ، بیٹے تے پاک روح (‏روح‌القدس)‏ دے ناں تے بپتسمہ لین دا مطلب کیہہ اے؟‏

 یسوع نے اپنے شاگرداں نُوں مُنادی کرن دا حکم دیندے ہوئیاں کہیا:‏ ”‏ساریاں قوماں دے لوکاں نُوں شاگرد بناؤ تے اوہناں نُوں باپ تے بیٹے تے پاک روح دے ناں توں بپتسمہ دیو تے اوہناں نُوں اوہناں ساریاں گلاں تے عمل کرنا سکھاؤ جنہاں دا مَیں توانوں حکم دِتا اے۔ “‏ (‏متی 28:‏19، 20‏)‏ ”‏باپ تے بیٹے تے پاک روح دے ناں توں بپتسمہ“‏ لین دا مطلب اے کہ بپتسمہ لین والا بندہ باپ تے بیٹے بارے سچائی نُوں تے اوہناں دے اِختیار نُوں سمجھ گیا اے تے من دا اے۔ نالے اوہ پاک روح بارے سچائی نُوں وی سمجھ گیا اے تے من دا اے۔ مثال لئی، جدوں پطرس نے اِک وار اِک پیدائشی لنگڑے آدمی نُوں شفا دِتی تے اوہنے کہیا:‏ یسوع ناصری دے ناں توں مَیں تینوں کہنا واں، اُٹھ تے ٹُر پھر۔ (‏اعمال 3:‏6‏)‏ پطرس نے یسوع دے ناں توں شفا دین نال ظاہر کیتا کہ اوہ مسیح دے اِختیار نُوں سمجھدا اے تے من دا اے تے اوہنے ایہہ معجزہ اوہدی طاقت نال ای کیتا اے۔‏

•   ”‏باپ“‏ یعنی یہوواہ c خدا ساڈا خالق اے تے سانوں اوہ ساریاں نعمتاں دیندا اے جنہاں دی وجہ توں اَسی زندہ رہنے آں۔ یہوواہ ای قادرِمطلق خدا اے کیونکہ ساری طاقت تے اِختیار اوہدے کول اے۔—‏پیدایش 17:‏1؛‏ مکاشفہ 4:‏11‏۔‏

•   ”‏بیٹا“‏ یعنی یسوع مسیح جنہے ساڈے لئی اپنی جان قربان کر دِتی۔ (‏رومیوں 6:‏23‏)‏ نجات پان لئی ضروری اے کہ اَسی یسوع مسیح تے ایمان لیائیے تے ایس گل نُوں منیے کہ خدا اوہدے ذریعے اپنے مقصد نُوں پورا کر رہیا اے۔—‏یوحنا 14:‏6؛‏ 20:‏31؛‏ اعمال 4:‏8-‏12‏۔‏

•   ”‏پاک روح“‏ خدا دی طاقت اے جدے ذریعے اوہ اپنے کم کردا اے۔‏ d خدا نے پاک روح دے ذریعے فرق فرق کم کیتے۔ مثال لئی، اوہنے کائنات دی ہر شے بنائی، اپنے نبیاں نُوں تے دُوجے لوکاں نُوں پیغام گھلے تے انساناں نُوں طاقت دِتی تاکہ اوہ اوہدی مرضی پوری کر سکن۔ (‏پیدایش 1:‏2؛‏ ایوب 33:‏4؛‏ رومیوں 15:‏18، 19‏)‏ ایہدے علاوہ خدا نے پاک روح دے ذریعے ای بائبل لکھن والیاں نُوں اپنے خیال دَسے۔—‏2-‏پطرس 1:‏21‏۔‏

 کیہہ دُبارہ بپتسمہ لینا گُناہ اے؟‏

 لوکاں دا اپنے مذہب نُوں بدلنا بوہت عام گل اے۔ پر جے کسے نے اپنے پرانے مذہب دے مطابق بپتسمہ لیا ہویا اے تے اوہ کیہہ کر سکدا اے؟ کیہہ اوہدا دُبارہ بپتسمہ لینا گُناہ اے؟ کجھ لوک من دے نیں کہ دُبارہ بپتسمہ لینا گُناہ اے۔ اوہناں دا خیال اے کہ اِفسیوں 4:‏5 دے مطابق بپتسمہ صرف اِک وار ای ہوندا اے کیونکہ اوتھے لکھیا اے:‏ اِک ای مالک اے، اِک ای ایمان اے، اِک ای بپتسمہ اے۔ پر ایس ایت دا مطلب ایہہ نئیں کہ اِک بندہ دُبارہ بپتسمہ نئیں لے سکدا۔ اَسی اِنج کیوں کہہ سکنے آں؟‏

 سیاق و سباق۔‏ اِفسیوں 4:‏5 دِیاں اگلیاں تے پچھلیاں ایتاں تے غور کرن نال پتہ چلدا اے کہ پولُس رسول ایہہ ایس گل تے زور دے رہیا سی کہ سچے مسیحیاں نُوں ایمان چ اِک مُٹھ ہونا چاہی دا اے۔ (‏اِفسیوں 4:‏1-‏3،‏ 16‏)‏ مسیحیاں دے اِک مُٹھ ہون لئی ضروری اے کہ اوہ سارے اِکو مالک یعنی یسوع مسیح دی مثال تے چلن، اِکو جیہا ایمان رکھن یعنی پاک کلام دی تلیم بارے اوہناں دی سمجھ اِکو جہی ہووے۔ ایہدے نال نال بپتسمہ لین لئی شرطاں وی اِکو جہیاں ہون۔‏

 پولُس رسول نے اوہناں لوکاں نُوں فیر توں بپتسمہ لین دی ہلاشیری دِتی جنہاں نے پہلاں کسے ہور مذہب چ بپتسمہ لیا ہویا سی۔ اوہنے اِنج ایس لئی کیتا کیونکہ اوہناں نے جدوں پہلاں بپتسمہ لیا سی تے اوہ مسیحی مذہب نُوں پوری طرحاں نئیں سمجھدے سن۔—‏اعمال 19:‏1-‏5‏۔‏

 بپتسمہ لین دی بنیاد صحی ہونی چاہی دی اے۔‏ بپتسمہ لین توں پہلاں ضروری اے کہ اِک بندہ پاک کلام دی صحی تلیم تے ایمان رکھدا ہووے۔ (‏1-‏تیمُتھیُس 2:‏3، 4‏)‏ جے اِک بندہ ایہو جہے عقیدیاں تے ایمان رکھ کے بپتسمہ لیندا اے جیہڑے خدا دے کلام دے خلاف نیں تے خدا دی نظر چ اوہدا بپتسمہ قبول نئیں ہوئے گا۔ (‏یوحنا 4:‏23، 24‏)‏ بے‌شک اوہنے خدا نال پیار دی وجہ توں بپتسمہ لیا ہوئے پر اصل چ اوہنے خدا دے کلام دی صحی تلیم تے عمل نئیں کیتا۔ (‏رومیوں 10:‏2‏)‏ جے اوہ چاہندا اے کہ خدا اوہدے بپتسمے نُوں قبول کرے تے اوہنوں کلام دی صحی تلیم حاصل کرنی پووے گی، اوس تلیم تے عمل کرنا پووے گا، اپنی زندگی خدا دے ناں کرنی پووے گی تے دُبارہ بپتسمہ لینا پووے گا۔ جے اوہ ایہناں ساریاں گلاں تے عمل کرے گا تے اوہدا دُبارہ بپتسمہ لینا گُناہ نئیں ہوئے گا سگوں ایہہ اوہدے لئی بہتر ہوئے گا۔‏

 ہور بپتسمے جنہاں دا پاک کلام چ ذکر مِلدا اے

 پاک کلام چ ہور وی بپتسمیاں دا ذکر مِلدا اے جنہاں دا مقصد اوس پبتسمے توں فرق سی جیہڑے یسوع دے پیروکار پانی چ لیندے سن۔‏

 بپتسمہ جیہڑا یوحنا دیندا سی۔‏ جیہڑے یہودی تے یہودی مذہب اپنان والے لوک موسیٰ دی شریعت دے خلاف گُناہ کردے سن، اوہ یوحنا کولوں بپتسمہ لیندے سن تاکہ ظاہر ہوئے کہ اوہناں نے اپنے گُناہواں توں توبہ کر لئی اے۔ یوحنا دے بپتسمہ دین دی وجہ توں لوک یسوع ناصری نُوں مسیح دے طور تے پچھانن تے قبول کرن لئی تیار ہو گئے۔—‏لُوقا 1:‏13-‏17؛‏ 3:‏2، 3؛‏ اعمال 19:‏4‏۔‏

 یسوع دا اپنا بپتسمہ۔‏ یوحنا نے یسوع نُوں جیہڑا بپتسمہ دِتا اوہ دُوجے لوکاں نُوں بپتسمہ دین نالوں فرق سی کیونکہ یسوع نے کوئی گُناہ نئیں کیتے سن سگوں اوہ تے بے‌عیب سی۔ (‏1-‏پطرس 2:‏21، 22‏)‏ ایس لئی یسوع دا بپتسمہ گُناہواں دی معافی لئی یاں خدا توں صاف ضمیر حاصل کرن لئی نئیں سی۔ (‏1-‏پطرس 3:‏21‏)‏ یسوع دے بپتسمہ توں ظاہر ہویا کہ اوہ مسیح اے جدے آن بارے پیشین‌گوئی کیتی گئی سی۔ نالے ایہہ وی کہ اوہ اپنی زندگی خدا دی مرضی پوری کرن لئی گزارے گا تے انساناں لئی اپنی جان قربان کرے گا۔—‏عبرانیوں 10:‏7-‏10‏۔‏

 پاک روح نال بپتسمہ۔‏ پاک روح نال بپتسمہ لین دا ذکر یوحنا بپتسمہ دین والے نے وی کیتا تے یسوع نے وی۔ (‏متی 3:‏11؛‏ لُوقا 3:‏16؛‏ اعمال 1:‏1-‏5‏)‏ ایہہ بپتسمہ پاک روح دے ناں تے بپتسمہ لین نالوں فرق اے۔ (‏متی 28:‏19‏)‏ پر کیویں؟‏

 یسوع دے شاگرداں وچوں صرف کجھ نُوں ای پاک روح نال بپتسمہ دِتا گیا اے (‏یعنی پاک روح نال مسح کیتا گیا اے)‏۔ اوہناں نُوں مسح ایس لئی کیتا گیا اے تاکہ اوہ اسمان تے مسیح دے نال کاہن تے بادشاہ بنن۔‏ e (‏1-‏پطرس 1:‏3، 4؛‏ مکاشفہ 5:‏9، 10‏)‏ اوہ یسوع دے نال اوہناں لکھاں لوکاں تے حکمرانی کرن گے جیہڑے زمین تے ہمیشاں تک زندہ رہن دی امید رکھدے نیں۔—‏متی 5:‏5؛‏ لُوقا 23:‏43‏۔‏

 یسوع مسیح چ بپتسمہ تے اوہدی موت چ بپتسمہ۔‏ یسوع مسیح چ بپتسمہ اوہناں لوکاں نُوں دِتا جاندا اے جنہاں نُوں پاک روح نال بپتسمہ دِتا گیا اے۔ (‏رومیوں 6:‏3‏)‏ ایس لئی ایہہ بپتسمہ صرف مسح شُدہ مسیحیاں نُوں مِلدا اے جیہڑے یسوع نال اسمان تے بادشاہی کرن گے۔ یسوع چ بپتسمہ لین دا مطلب اے کہ اوہ مسح شُدہ لوکاں دی کلیسیا دا حصہ بن گئے نیں۔ ایہہ کلیسیا اِک جسم وانگوں اے۔ مسیح ایہدا سِر اے تے مسح شُدہ مسیحی جسم نیں۔—‏1-‏کُرنتھیوں 12:‏12، 13،‏ 27؛‏ کُلسّیوں 1:‏18‏۔‏

 مسح شُدہ مسیحی اِک ہور بپتسمہ وی لیندے نیں یعنی یسوع دی موت چ بپتسمہ۔ (‏رومیوں 6:‏3، 4‏)‏ یسوع وانگوں اوہ وی اپنی زندگی یہوواہ دی مرضی پوری کرن لئی گزاردے نیں تے اوہدے ای وانگوں جان دے نیں کہ اوہ زمین تے ہمیشاں تک نئیں رہن گے۔ اوہناں دا ایہہ بپتسمہ اوس ویلے پورا ہوندا اے جدوں اوہ فوت ہو جاندے نیں تے اوہناں نُوں اسمان تے اِک روحانی جسم نال زندہ کیتا جاندا اے۔—‏رومیوں 6:‏5؛‏ 1-‏کُرنتھیوں 15:‏42-‏44‏۔‏

 اَگ نال بپتسمہ۔‏ یوحنا بپتسمہ دین والے نے لوکاں نُوں کہیا سی:‏ ”‏اوہ [‏یسوع]‏ توانوں پاک روح تے اَگ نال بپتسمہ دَوے گا۔ اوہدا چھج اوہدے ہتھ وچ اے تے اوہ اپنے کھلیان نُوں بالکل صاف کردے گا۔ اوہ اپنی کنک نُوں گودام چ جمع کرے گا پر تُوڑی نُوں ایہو جہی اَگ چ ساڑے گا جیہڑی بجھائی نئیں جا سکدی۔“‏ (‏متی 3:‏11، 12‏)‏ پاک روح نال بپتسمے تے اَگ نال بپتسمے چ بوہت فرق اے۔ غور کرو کہ یوحنا دی ایس گل دا کیہہ مطلب سی۔‏

 کنک اوہناں لوکاں وَل اشارہ کردی اے جیہڑے یسوع مسیح دی گل سُن دے نیں تے اوہدے تے عمل کردے نیں۔ اِنج اوہ ثابت کردے نیں کہ اوہناں نُوں پاک روح نال بپتسمہ دِتا جا سکدا اے۔ تُوڑی اوہناں لوکاں وَل اشارہ کردی اے جیہڑے یسوع دی گل نئیں من دے۔ اوہناں نُوں اَگ نال بپتسمہ دِتا جائے گا یعنی اوہناں نُوں ہمیشاں لئی تباہ کر دِتا جائے گا۔—‏متی 3:‏7-‏12؛‏ لُوقا 3:‏16، 17‏۔‏