نئیں۔ بائبل دے پرانے نسخیاں دا موازنہ کرن نال پتہ چلدا اے کہ اصل چ ایہہ کدی نئیں بدلی، بھانویں کہ ہزاراں سالاں دے دوران ایہدیاں نقلاں تیار کرن لئی ایہو جہیاں چیزاں استمال کیتیاں گئیاں جیہڑیاں خراب ہو سکدیاں نیں۔‏

 ہُن تک بائبل دے ہزاراں پرانے نسخے لبھ گئے نیں۔ ایہناں وچوں کجھ نسخیاں چ کئی گلاں اِک دُوجے نالوں فرق سن جنہاں توں پتہ چلدا اے کہ جدوں ایہناں دِیاں نقلاں تیار کیتیاں گئیاں تے ایہناں وچ کجھ غلطیاں وی ہوئیاں۔ زیادہ‌تر غلطیاں چھوٹیاں موٹیاں سن تے ایہناں دی وجہ توں عبارت دا مطلب نئیں بدلیا۔ پر کجھ وڈیاں غلطیاں وی سن جیہڑیاں بائبل دے پیغام نُوں جان بجھُ کے بدلن لئی کیتیاں گئیاں سن۔ ذرا ایہناں دو مثالاں تے غور کرو:‏

1.   بائبل دے کجھ ترجمیاں چ 1-‏یوحنا 5:‏7 چ لکھیا اے:‏ ”‏اسمان اُتے باپ تے بیٹا تے روح‌القدس نیں تے ایہہ تینوں اِک ای نیں۔“‏ پر بائبل دے کجھ بھروسے مند نسخیاں توں پتہ چلدا اے کہ ایہہ لفظ اصلی متن چ نئیں سن سگوں ایہناں نُوں بعد چ شامل کیتا گیا سی۔‏ a ایس لئی بائبل دے نویں بھروسے مند ترجمیاں چوں ایہناں لفظاں نُوں کڈھ دِتا گیا اے۔‏

2.   بائبل دے پرانے نسخیاں چ خدا دا ذاتی ناں ہزاراں واری آیا اے۔ پر بائبل دے بوہت سارے ترجمیاں چ خدا دے ناں دی جگہ ”‏خداوند“‏ یاں ”‏خدا“‏ ورگے لقب لا دِتے گئے نیں۔‏

 ہُن تک بائبل دے اینے زیادہ نسخے دریافت ہو چُکے نیں کہ غلطیاں دا اندازہ لانا پہلے توں بوہت زیادہ اسان ہو گیا اے۔‏ b ایہناں نسخیاں دا موازنہ کرن نال کیویں پتہ چلدا اے کہ بائبل بدلی نئیں؟‏

•   عالم ولیم ہینری گرین نے عبرانی صحیفیاں (‏جنہاں نُوں عام طور تے ”‏پُرانا عہدنامہ“‏ کہیا جاندا اے)‏ تے گل کردے ہوئیاں کہیا:‏ ”‏ایہہ یقین نال کہیا جا سکدا اے کہ پرانے زمانے دی کسے وی کتاب دی نقل اینے درست طریقے نال نئیں کیتی گئی جِنّی کہ پرانے عہد نامے دی کیتی گئی اے۔“‏

•   بائبل دے اِک عالم فریڈرک بروس نے مسیحی یونانی صحیفیاں یاں ”‏نوِیں عہد نامے“‏بارے لکھیا:‏ ”‏نوِیں عہدنامے دے درست ہون دے جِنّے ثبوت ملے نیں اونے کسے ہور پرانی کتاب دے نئیں ملے۔ دُوجیاں پرانیاں کتاباں دے درست ہُن دے ثبوت بوہت ای گھٹ نیں پر فیر وی کوئی بندہ ایہناں تے سوال چکن دا سوچ وی نئیں سکدا۔“‏

•   سر فریڈرک کینیون بائبل دے نسخیاں تے تحقیق کرن لئی مشہور نیں۔ اوہناں نے کہیا:‏ ”‏اِک بندہ اپنے ہتھ چ بائبل پھڑ کے بغیر کسے خوف دے ایہہ کہہ سکدا اے کہ اوہنے خدا دا سچا کلام پھڑیا ہویا اے جنہوں صدیاں توں کئی نسلاں تک محفوظ رکھیا گیا اے۔“‏

•  جنہاں یہودیاں تے مسیحیاں نے بائبل دِیاں نقلاں تیار کیتیاں، اوہناں نے ایہدے چ خدا دے بندیاں دِیاں سنگین غلطیاں تے پردہ نئیں پایا۔‏ c (‏گنتی 20:‏12؛‏ 2-‏سموئیل 11:‏2-‏4؛‏ گلتیوں 2:‏11-‏14‏)‏ اوہناں نے بائبل دے اوہناں حصیاں نُوں وی نئیں کڈھیا جدے چ یہودی قوم دی ایس لئی اِصلاح کیتی گئی کیونکہ اوہناں نے خدا دی نافرمانی کیتی سی۔ ایہدے علاوہ اوہناں نے اوہناں ایتاں نُوں وی نئیں کڈھیا جنہاں چ انساناں دے بنائے عقیدیاں نُوں غلط کہیا گیا اے۔ (‏ہوسیع 4:‏2؛‏ ملاکی 2:‏8، 9؛‏ متی 23:‏8، 9؛‏ 1-‏یوحنا 5:‏21‏)‏ بائبل دِیاں درست نقلاں تیار کرن والیاں نے ظاہر کیتا کہ اوہناں نے پوری ایمان‌داری توں کم لیا اے تے اوہ خدا دے پاک کلام دا دلوں احترام کردے نیں۔‏

•   ذرا سوچو کہ جے خدا اپنی پاک روح نال بائبل لکھوا سکدا اے تے کیہہ اوہ ایہدے پیغام نُوں محفوظ نئیں رکھ سکدا؟‏ d (‏یسعیاہ 40:‏8؛‏ 1-‏پطرس 1:‏24، 25‏)‏ ایہہ گل صاف ظاہر اے کہ خدا چاہندا سی کہ اوہدے پاک کلام چ لکھیاں گلاں دا صرف پرانے زمانے دے لوکاں نُوں ای نئیں سگوں سانوں ساریاں نُوں وی فائدہ ہووے۔ (‏1-‏کُرنتھیوں 10:‏11‏)‏ بائبل چ دَسیا گیا اے کہ جنیاں وی گلاں پہلاں لکھیاں گئیاں، اوہ ساڈی ہدیت لئی لکھیاں گئیاں تاکہ اَسی صحیفیاں توں تسلی پا کے تے ثابت‌قدم رہ کے امید پا سکئے۔—‏رومیوں 15:‏4‏۔‏

•   یسوع مسیح تے اوہناں دے شاگرداں نے عبرانی صحیفیاں دِیاں نقلاں چوں حوالے دِتے۔ اوہناں نے کدی وی ایہہ ظاہر نئیں کیتا کہ ایہناں پرانے نسخیاں چ کوئی غلطی اے۔—‏لُوقا 4:‏16-‏21؛‏ اعمال 17:‏1-‏3‏۔‏