رسولاں دے اعمال 16:1-40
16 فیر پولُس شہر دربے پونچیا تے اوتھوں شہر لِسترہ گیا جِتھے تیمُتھیُس ناں دا اِک شاگرد سی۔ تیمُتھیُس دی ماں پہلاں یہودی سی، پر فیر اوہ شاگرد بن گئی سی۔ پر اوہدا پیو یونانی سی۔
2 لِسترہ تے اِکُنیُم دے بھرا تیمُتھیُس دی بڑی تعریف کردے سن۔
3 پولُس تیمُتھیُس نُوں سفر تے اپنے نال لجانا چاہندا سی۔ پر پہلاں اوہنے اوہدا ختنہ کرایا کیونکہ اوہناں علاقیاں دے سارے یہودی جان دے سن کہ تیمُتھیُس دا پیو یونانی اے۔
4 پولُس تے اوہدے ساتھی شہرشہر جا کے شاگرداں نُوں اوس فیصلے بارے دَسدے سن جیہڑا یروشلم دے رسولاں تے بزرگاں نے کیتا سی تاکہ اوہ اوہدے تے عمل کرن۔
5 ایس لئی کلیسیاواں چ شاگرداں دا ایمان مضبوط ہوندا گیا تے اوہناں دی تعداد دن بدن ودھدی گئی۔
6 فیر اوہ فروگیہ تے گلتیہ دے علاقے چوں لنگھے کیونکہ پاک روح دے ذریعے اوہناں نُوں صوبہ آسیہ چ کلام سُنان توں منع کیتا گیا سی۔
7 جدوں اوہ موسیہ پونچے تے اوہناں نے صوبہ بِتونیہ چ جان دی کوشش کیتی۔ پر یسوع نے پاک روح دے ذریعے اوہناں نُوں اوتھے جان توں منع کیتا۔
8 ایس لئی اوہ موسیہ چوں لنگھ کے شہر تروآس آ گئے۔
9 اوتھے پولُس نے رات نُوں اِک رُویا چ ویکھیا کہ اِک مقدونی آدمی اوہدے سامنے کھلوتا ایہہ اِلتجا کر رہیا اے: ”مقدونیہ آ کے ساڈی مدد کر۔“
10 جیویں ای پولُس نے ایہہ رُویا ویکھی اَسی مقدونیہ لئی نکل پئے کیونکہ اَسی سمجھ گئے ساں کہ خدا چاہندا اے کہ اَسی اوتھوں دے لوکاں نُوں خوشخبری سُنائیے۔
11 ایس لئی اَسی تروآس توں سمندری جہاز تے بیٹھ کے سِدھا سمُتراکے دے جزیرے وَل گئے تے اگلے دن شہر نیاپُلِس پونچے۔
12 اوتھوں اَسی شہر فِلپّی چلے گئے تے اوتھے کجھ دن رہے۔ ایہہ رومی* شہر ضلع مقدونیہ دا خاص شہر اے۔
13 سبت دے دن اَسی شہر دے باہر اِک دریا تے گئے کیونکہ اَسی سُنیا سی کہ لوک اوتھے دُعا کرن لئی جاندے نیں۔ اَسی اوتھے موجود عورتاں نال بہہ کے گل کرن لگ پئے۔
14 اوتھے شہر تھواتیرہ دی رہن والی اِک عورت سی جدا ناں لِدیہ سی۔ اوہ جامنی کپڑے* دا کاروبار کردی سی۔ اوہ خدا دی عبادت کردی سی تے ساڈیاں گلاں بڑے دھیان نال سُن رہی سی۔ یہوواہ نے اوہدے دل نُوں کھول دِتا تاکہ اوہ پولُس دِیاں گلاں نُوں قبول کرے۔
15 جدوں اوہنے تے اوہدے گھر والیاں نے بپتسمہ لے لیا تے اوہنے وار وار سانوں کہیا: ”جے تُسی مینوں یہوواہ دی وفادار بندی سمجھدے او تے میرے گھر آ کے ٹھہرو۔“ اوہ سانوں مجبور کر کے اپنے گھر لے گئی۔
16 اِک دن جدوں اَسی اوس جگہ جا رہے ساں جِتھے لوک دُعا کرن جاندے نیں تے سانوں راہ چ اِک نوکرانی ملی جنہوں اِک باغی فرشتہ چِمبڑیا ہویا سی۔ اوہ اوہدی مدد نال مستقبل بارے دَسدی سی تے اِنج اپنے مالکاں لئی بوہت پیسہ کماندی سی۔
17 اوہ پولُس تے ساڈے پچھے پچھے آ کے اُچی اُچی کہندی رہی: ”ایہہ بندے خدا تعالیٰ دے خادم نیں تے توانوں نجات دی راہ بارے دَس رہے نیں۔“
18 اوہ کئی دِناں تک اِنج کردی رہی۔ ایس لئی پولُس اوہدے توں تنگ آ گیا تے اوہنے پچھے مُڑ کے اوس باغی فرشتے نُوں کہیا: ”مَیں تینوں یسوع مسیح دے ناں تے حکم دینا واں کہ ایہدے چوں نکل جا۔“ اوہ اوسے ویلے اوہدے چوں نکل گیا۔
19 جدوں اوس کُڑی دے مالکاں نے ویکھیا کہ اوہناں دی کمائی دا ذریعہ ختم ہو گیا اے تے اوہناں نے پولُس تے سیلاس نُوں پھڑیا تے گھسیٹ کے بازار چ شہر دے حاکماں کول لے گئے۔
20 اوہناں نے پولُس تے سیلاس نُوں شہر دے ناظماں سامنے لجا کے کہیا: ”ایہہ یہودی بندے شہر چ بڑا ہنگامہ کر رہے نیں۔
21 ایہہ لوکاں نُوں ایہو جہیاں رسماں تے طور طریقیاں دی تلیم دے رہے نیں جنہاں نُوں مننا تے اوہناں تے چلنا ساڈے لئی جائز نئیں اے کیونکہ اَسی رومی آں۔“
22 بِھیڑ پولُس تے سیلاس دے خلاف بھڑک اُٹھی تے شہر دے ناظماں نے سپاہیاں نُوں حکم دِتا کہ اوہ اوہناں دے کپڑے لاہ کے اوہناں نُوں ڈنڈے مارن۔
23 اوہناں نے مار مار کے اوہناں دا بڑا بھیڑا حال کیتا تے فیر اوہناں نُوں جیل چ پا دِتا تے حوالدار نُوں حکم دِتا کہ اوہناں تے سخت پہرا دِتا جائے۔
24 ایس حکم دی وجہ توں حوالدار نے اوہناں نُوں جیل دی اندر والی کوٹھڑی چ رکھیا تے اوہناں دے پیراں نُوں کاٹھ* چ جکڑ دِتا۔
25 تقریباً اَدھی رات نُوں پولُس تے سیلاس دُعا کر رہے سن تے گیت گا کے خدا دی وڈیائی کر رہے سن تے دُوجے قیدی سُن رہے سن۔
26 پر اچانک ایناں وڈا زلزلہ آیا کہ جیل دِیاں نِیہیاں تک ہل گئیاں۔ نالے سارے دروازے کُھل گئے تے قیدیاں دِیاں زنجیراں وی کُھل گئیاں۔
27 جدوں حوالدار جاگیا تے اوہنے ویکھیا کہ جیل دے دروازے کُھلے ہوئے نیں۔ اوہنوں لگیا کہ سارے قیدی بھج گئے نیں۔ ایس لئی اوہنے اپنے آپ نُوں جانوں مارن لئی اپنی تلوار کڈھی۔
28 پر پولُس نے اُچی آواز چ کہیا: ”اپنے آپ نُوں نہ مارِیں، ویکھ اَسی سارے ایتھے ای آں!“
29 حوالدار نے دِیوے لیان دا حکم دِتا تاکہ روشنی ہو جائے تے اوہ بھج کے اندر گیا۔ اوہ ڈر نال تھر تھر کمبدا ہویا پولُس تے سیلاس دے پیراں چ ڈِگ پیا۔
30 فیر اوہنے اوہناں نُوں باہر لیا کے کہیا: ”جناب، مینوں دَسو کہ مَیں نجات پان لئی کیہہ کراں؟“
31 اوہناں نے کہیا: ”مالک یسوع تے ایمان لیا۔ فیر ای تُوں تے تیرے گھر والے نجات پان گے۔“
32 فیر اوہناں نے حوالدار تے اوہدے گھر والیاں نُوں یہوواہ دا کلام سُنایا۔
33 حوالدار رات دے اوسے ویلے اوہناں نُوں لے گیا تے اوہناں دے زخم صاف کیتے۔ ایہدے بعد اوہنے تے اوہدے سارے گھر والیاں نے فوراً بپتسمہ لے لیا۔
34 حوالدار اوہناں نُوں اپنے گھر لے آیا تے اوہناں دے سامنے کھانا رکھیا۔ اوہ تے اوہدا گھرانا خدا تے ایمان لیا کے بڑے خوش سن۔
35 جدوں دن چڑھیا تے شہر دے ناظماں نے سپاہیاں نُوں ایہہ حکم دے کے گھلیا: ”اوہناں بندیاں نُوں رِہا کر دَوو۔“
36 حوالدار نے پولُس نُوں کہیا: ”شہر دے ناظماں نے سپاہیاں نُوں ایہہ حکم دے کے گھلیا اے کہ توانوں رِہا کر دِتا جائے۔ ایس لئی تُسی جا سکدے او۔ سلامت رہوو۔“
37 پر پولُس نے اوہناں نُوں کہیا: ”نئیں، اَسی اِنج نئیں جانا۔ اَسی رومی شہری آں تے اوہناں کول ساڈے خلاف کوئی ثبوت نئیں سی۔* پر فیر وی اوہناں نے سانوں ساریاں دے سامنے ماریا کُٹیا تے جیل چ پا دِتا۔ ہُن اوہ سانوں چوری چھپے کیوں چھڈ رہے نیں؟ اوہ آپ آن تے سانوں ایتھوں باہر لے کے جان۔“
38 سپاہیاں نے جاکے ایہہ گل شہر دے ناظماں نُوں دَسی۔ جدوں اوہناں نے ایہہ سُنیا کہ اوہ دونویں رومی شہری نیں تے اوہ ڈر گئے۔
39 ایس لئی اوہناں نے آ کے پولُس تے سیلاس کولوں معافی منگی تے اوہناں نُوں باہر لیا کے مِنتاں کیتیاں کہ اوہ شہر چھڈ کے چلے جان۔
40 پر اوہ جیل چوں نکل کے لِدیہ دے گھر گئے۔ اوتھے اوہ بھین بھراواں نُوں ملے تے اوہناں دا حوصلہ ودھایا تے فیر اوتھوں چلے گئے۔
فٹ نوٹ
^ یعنی رومی حکومت دے تحت۔
^ یاں، ”رنگ۔“
^ کاٹھ لکڑی دے دو پھٹیاں نال بنی ہوندی سی۔ اوہدے چ مورے ہوندے سن جنہاں چ قیدیاں دے پیراں نُوں جکڑیا جاندا سی۔
^ یاں، ”اوہناں نے مقدمہ چلائے بغیر سانوں جیل چ پایا۔“
