رسولاں دے اعمال 20:1-38
20 جدوں ہنگامہ ختم ہو گیا تے پولُس نے شاگرداں نُوں بلایا تے اوہناں دا حوصلہ ودھایا۔ فیر اوہناں نُوں خدا حافظ کہہ کے اوہ مقدونیہ لئی نکل پیا۔
2 اوہنے فرق فرق علاقیاں چ جا کے شاگرداں دا بوہت حوصلہ ودھایا تے فیر یونان چلا گیا۔
3 اوتھے اوہ تِن مہینے تک رہیا۔ جدوں اوہ سمندری جہاز چ بیٹھ کے سُوریہ جان والا سی تے اوہنوں پتہ چلیا کہ یہودیاں نے اوہدے خلاف سازش گھڑی اے۔ ایس لئی اوہنے مقدونیہ دے رستے واپس جان دا فیصلہ کیتا۔
4 اوہدے نال ایہہ بھرا وی سن: پُرس دا پُتر سوپترس جیہڑا بیریہ توں سی، ارِسترخس تے سکندس جیہڑے شہر تھسلُنیکے توں سن، گِیُس جیہڑا شہر دربے توں سی، تیمُتھیُس تے آسیہ دے صوبے توں تخِکُس تے تروفیمس۔
5 ایہہ بھرا ساڈے توں پہلاں تروآس گئے تے اوتھے ساڈا اِنتظار کیتا۔
6 پر اَسی بےخمیری روٹی دی عید دے بعد فِلپّی توں سمندری جہاز چ بیٹھ کے پنج دِناں بعد اوہناں کول تروآس پونچ گئے تے اوتھے سَت دن تک رہے۔
7 ہفتے دے پہلے دن اَسی کھانا کھان لئی کٹھے ہوئے تے پولُس نے ساریاں نال گل کرنی شروع کیتی۔ اوہ اَدھی رات تک گلاں کردا رہیا کیونکہ اگلے دن اوہنے اوتھوں چلے جانا سی۔
8 اَسی گھر دے اُتے والے کمرے چ جمع ساں تے اوتھے بوہت سارے دِیوے بل رہے سن۔
9 اِک جوان جدا ناں یُوتِخُس سی، باری چ بیٹھا ہویا سی۔ جدوں پولُس دیر تک گلاں کردا رہیا تے یُوتِخُس گُوڑھی نیندر سوں گیا تے سُتے سُتے تیجی منزل توں ڈِگ کے مر گیا۔
10 پر پولُس تھلے گیا تے اوہنے جُھک کے مُنڈے نُوں گلے لایا تے ساریاں نُوں کہیا: ”رووو نہ،* مُنڈا زندہ ہو گیا اے۔“
11 فیر پولُس اُتے گیا تے اوہنے ساریاں نال کھانا کھادا۔ اوہ کافی دیر تک گلاں کردا رہیا تے گلاں کردے کردے دن چڑھ گیا۔ فیر اوہ اوتھوں چلا گیا۔
12 شاگرد مُنڈے نُوں گھر لے گئے۔ اوہناں نُوں ایس گلوں بڑی تسلی ملی کہ اوہ زندہ اے۔
13 پولُس پیدل شہر اسُس جانا چاہندا سی۔ اوہنے سانوں کہیا کہ اوہ سانوں اسُس چ ملے گا تے اوتھوں ساڈے نال جہاز چ بیٹھے گا۔ ایس لئی اَسی سمندری جہاز چ بیٹھ کے اسُس لئی نکل پئے۔
14 اوتھے پونچ کے پولُس ساڈے نال جہاز چ بیٹھ گیا تے اَسی شہر متلینے وَل چلے گئے۔
15 اگلے دن اَسی اوتھوں نکلے تے ساڈا جہاز خیوس دے جزیرے کول پونچ گیا۔ اوس توں اگلے دن اَسی تھوڑی دیر لئی ساموس دے جزیرے تے رُکے تے اوس توں اگلے دن شہر میلیتُس پونچے۔
16 پولُس نے فیصلہ کیتا سی کہ اَسی اِفسس چ نئیں رُکاں گے کیونکہ اوہ صوبہ آسیہ نئیں جانا چاہندا سی۔ اصل چ اوہ جِنّی چھیتی ہو سکے یروشلم لئی نکلنا چاہندا سی تاکہ عیدِپنتِکُست تک اوتھے پونچ جائے۔
17 پر پولُس نے میلیتُس توں اِفسس دی کلیسیا دے بزرگاں نُوں پیغام گھل دِتا سی کہ اوہ اوہنوں مِلن آن۔
18 جدوں بزرگ میلیتُس پونچے تے پولُس نے اوہناں نُوں کہیا: ”تُسی چنگی طرحاں جان دے او کہ جیس دن توں مَیں صوبہ آسیہ چ قدم رکھیا اے، مَیں تواڈے نال رَل کے کیویں خدمت کیتی اے۔
19 مَیں بڑی خاکساری نال مالک دی غلامی کیتی اے۔ یہودیاں دِیاں سازشاں دی وجہ توں مَیں بڑا رویا تے بڑی تکلیف وی سہی۔
20 مَیں توانوں ہر اوہ گل دَسی جیہڑی تواڈے بھلے لئی سی تے توانوں چونکاں چ تلیم دِتی تے گھر گھر جا کے سکھایا۔
21 نالے مَیں یہودی تے یونانی لوکاں نُوں چنگی طرحاں گواہی دِتی کہ اوہ توبہ کر کے خدا وَل مُڑن تے ساڈے مالک یسوع تے ایمان لیان۔
22 پر ہُن مینوں پاک روح دے ذریعے ہدیت ملی اے کہ مَیں یروشلم جاواں۔ پتہ نئیں اوتھے میرے نال کیہہ کیہہ ہوئے گا۔
23 مینوں بس ایناں پتہ اے کہ خدا وار وار پاک روح دے ذریعے ہر شہر چ مینوں دَسدا اے کہ قید تے ظلم میرا اِنتظار کر رہے نیں۔
24 پر فیر وی مَیں اپنی جان دی پرواہ نئیں کردا* سگوں مَیں بس ایہی چاہنا واں کہ مَیں اپنی ساری زندگی اوس کم تے خدمت چ لاواں جیہڑی مالک یسوع نے مینوں دِتی اے یعنی خدا دی عظیم رحمت دی خوشخبری دی چنگی طرحاں گواہی دَواں۔
25 مینوں پتہ اے کہ تُسی سارے، جنہاں نُوں مَیں خدا دی بادشاہی بارے دَسیا اے، مینوں دُبارہ نئیں ویکھو گے۔
26 تُسی اَج ایس گل دے گواہ او کہ مَیں کسے وی انسان دے خون دا ذمےدار نئیں آں
27 کیونکہ مَیں توانوں خدا دی مرضی بارے دَسن توں پچھے نئیں ہٹیا۔
28 ہُن مَیں توانوں کہنا چاہنا واں کہ تُسی اپنے آپ تے نظر رکھو تے خدا دِیاں ساریاں بھیڈاں دا خیال رکھو۔ توانوں پاک روح دے ذریعے ایس لئی نگہبان بنایا گیا اے تاکہ تُسی خدا دی کلیسیا دی دیکھبھال* کرو جنہوں اوہنے اپنے پُتر دے خون نال خریدیا اے۔
29 مینوں پتہ اے کہ میرے جان دے بعد تواڈے چ ظالم بگھیاڑ* آ وڑھن گے جیہڑے بھیڈاں تے ذرا وی رحم نئیں کرن گے
30 تے تواڈے وچوں ای ایہو جہے آدمی اُٹھ کھلون گے جیہڑے سچائی نُوں توڑمروڑ کے پیش کرن گے تاکہ شاگرداں نُوں اپنے مغر لا لین۔
31 ایس لئی چوکس رہوو تے یاد رکھو کہ مَیں تِن سالاں تک دن رات رو رو کے توانوں نصیحت کردا رہیا واں۔
32 ہُن مَیں توانوں خدا تے اوہدی عظیم رحمت دے حوالے* کر رہیا واں۔ خدا دا کلام توانوں مضبوط کر سکدا اے تے توانوں اوہ وراثت دے سکدا اے جیہڑی مُقدس لوکاں لئی رکھی گئی اے۔
33 مَیں کسے وی انسان دی چاندی، سونے یاں کپڑیاں دا لالچ نئیں کیتا۔
34 تُسی آپ جان دے او کہ مَیں اپنے ہتھاں نال محنت کر کے اپنیاں تے اپنے ساتھیاں دِیاں ضرورتاں نُوں پورا کیتا اے۔
35 مَیں ہر معاملے چ توانوں اپنی مثال توں سکھایا اے کہ تُسی وی ایسے طرحاں محنت کر کے کمزور لوکاں دی مدد کرو۔ نالے مالک یسوع دی ایس گل نُوں ہمیشاں یاد رکھو: ”دُوجیاں کولوں کجھ لین دی بجائے اوہناں نُوں کجھ دین نال زیادہ خوشی مِلدی اے۔““
36 ایہہ گلاں کہن دے بعد پولُس ساریاں نال مِل کے گوڈیاں بھار بہہ گیا تے اوہنے دُعا کیتی۔
37 فیر اوہ سارے بوہت روئے تے واری واری پولُس نُوں گلے ملے تے اوہنوں چُمیا۔
38 اوہ خاص طور تے ایس لئی دُکھی سن کیونکہ پولُس نے کہیا سی کہ اوہ اوہنوں دُبارہ نئیں ویکھن گے۔ فیر اوہ اوہنوں سمندری جہاز تک چھڈن لئی گئے۔
فٹ نوٹ
^ یونانی چ: ”رولا نہ پاؤ۔“
^ یاں، ”اپنی زندگی نُوں اہم نئیں سمجھدا۔“
^ یونانی چ: ”گلّہبانی۔“
^ یاں، ”بھیڑیئے۔“
^ یونانی چ: ”خدا تے اوہدی عظیم رحمت دے کلام دے حوالے۔“
