لُوقا دی اِنجیل 4:1-44
4 فیر یسوع پاک روح نال بھریا ہویا دریائے یردن توں چلا گیا تے پاک روح اوہنوں اِک ویران جگہ تے لے گئی
2 جِتھے اوہ 40 دِناں تک رہیا۔ اوتھے اِبلیس نے اوہنوں اَزمایا۔ ایس دوران اوہنے کجھ نہ کھادا تے جدوں اوہ دن ختم ہو گئے تے اوہنوں بُھکھ لگی۔
3 ایس لئی اِبلیس نے اوہنوں کہیا: ”جے تُوں خدا دا پُتر* ایں تے ایس پتھر نُوں کہہ کہ ایہہ روٹی بن جائے۔“
4 پر یسوع نے اوہنوں جواب دِتا: ”پاک کلام چ لکھیا اے کہ ”انسان نُوں زندہ رہن لئی صرف روٹی دی لوڑ نئیں۔““
5 فیر اِبلیس اوہنوں اِک پہاڑ تے لے گیا تے اوہنوں اِک ای پل چ دُنیا دِیاں ساریاں بادشاہیاں وکھائیاں۔
6 فیر اِبلیس نے اوہنوں کہیا: ”مَیں ایہناں ساریاں بادشاہیاں دا اِختیار تے ایہناں دی شان و شوکت تینوں دے دَواں گا کیونکہ ایہہ سب کجھ مینوں دِتا گیا اے تے مَیں جنہوں چاہواں دے سکنا واں۔
7 ایس لئی جے تُوں صرف اِک وار مینوں سجدہ کریں تے ایہہ سب کجھ تیرا ہو جائے گا۔“
8 یسوع نے جواب چ کہیا: ”پاک کلام چ لکھیا اے کہ ”تُوں صرف یہوواہ اپنے خدا دی عبادت کر تے صرف اوہدی خدمت کر۔““
9 ایہدے بعد اوہ اوہنوں یروشلم چ لے گیا تے ہیکل دی سب توں اُچی تھاں تے کھڑا کر کے اوہنوں کہیا: ”جے تُوں خدا دا پُتر* ایں تے ایتھوں چھال مار دے
10 کیونکہ پاک کلام چ لکھیا اے کہ ”اوہ اپنے فرشتیاں نُوں تیرے بارے حکم دَوے گا کہ اوہ تیری حفاظت کرن“
11 تے ”اوہ تینوں اپنے ہتھاں تے چُک لین گے تاکہ پتھراں چ وَج کے تیرے پیراں تے سٹ نہ لگے۔““
12 یسوع نے جواب چ اوہنوں کہیا: ”پاک کلام چ ایہہ وی لکھیا اے کہ ”تُوں یہوواہ اپنے خدا دا اِمتحان نہ لے۔““
13 جدوں اِبلیس نے یسوع نُوں چنگی طرحاں اَزما لیا تے اوہ اوہنوں چھڈ کے چلا گیا تے فیر اوہنوں دُبارہ اَزمان لئی اِک ہور چنگا موقع لبھن لگ پیا۔
14 یسوع پاک روح دی طاقت نال بھریا ہویا گلیل واپس چلا گیا تے اوہدے بارے چنگیاں خبراں سارے علاقے چ پھیل گئیاں۔
15 اوہنے اوتھے عبادتگاہواں چ تلیم دینی شروع کر دِتی تے سارے لوک اوہدی بڑی عزت کردے سن۔
16 فیر اوہ ناصرت چلا گیا جِتھے اوہ پلیا سی تے ہمیشاں وانگوں سبت والے دن عبادتگاہ چ گیا۔ اوتھے اوہ پاک کلام نُوں پڑھن لئی کھڑا ہویا۔
17 اوہنوں یسعیاہ نبی دی کتاب* دِتی گئی۔ اوہنے کتاب کھولی تے اوہ حوالہ لبھیا جِتھے لکھیا سی:
18 ”یہوواہ دی روح میرے تے وے کیونکہ اوہنے مینوں مسح کیتا اے تاکہ مَیں غریباں نُوں خوشخبری سُناواں۔ اوہنے مینوں گھلیا اے تاکہ مَیں قیدیاں نُوں آزادی دی خبر دَواں، اَنھیاں نُوں دَساں کہ اوہ دُبارہ ویکھن گے تے ظلم دے ماریاں نُوں چھٹکارا دَواں
19 تے ایہہ مُنادی کراں کہ یہوواہ دی منظوری پان دا ویلا* آ گیا اے۔“
20 ایہہ پڑھن توں بعد یسوع نے کتاب بند کیتی تے خادم نُوں پھڑا دِتی۔ فیر اوہ بہہ گیا۔ عبادتگاہ چ ساریاں دِیاں اَکھاں اوہدے تے لگیاں ہوئیاں سن۔
21 یسوع نے اوہناں نُوں کہیا: ”ایہہ حوالہ جیہڑا تُسی ہُنے سُنیا اے، اَج پورا ہو گیا اے۔“
22 سارے اوہدیاں تعریفاں کرن لگ پئے تے اوہدیاں دل جتن والیاں گلاں نُوں سُن کے حیران ہو گئے تے آپس چ کہن لگ پئے: ”کیہہ ایہہ یوسف دا پُتر نئیں؟“
23 یسوع نے اوہناں نُوں کہیا: ”تُسی ضرور میرے تے ایہہ کہاوت لاگو کرو گے: ”اَے حکیم، پہلے اپنا علاج کر“ تے ایہہ وی کہوو گے: ”جیہڑے کم تُوں کفرنحوم چ کیتے، اَسی اوہناں بارے سُنیا اے۔ ہُن اوہی کم تُوں اپنے علاقے چ وی کر۔““
24 ایس لئی اوہنے کہیا: ”مَیں توانوں سچ کہنا واں کہ اِک نبی نُوں اوہدے اپنے علاقے دے لوک قبول نئیں کردے۔
25 ذرا غور کرو کہ جدوں ایلیاہ نبی دے زمانے چ ساڈھے تِن سال تک بارش نہ ہوئی* تے سارے اِسرائیل چ بوہت سخت کال پے گیا۔ اوس ویلے اوتھے بوہت ساریاں بیوہ عورتاں رہندیاں سن۔
26 پر فیر وی ایلیاہ نُوں اوہناں وچوں کسے کول نئیں گھلیا گیا سگوں اوہنوں صیدا دے شہر صارپت چ رہن والی اِک بیوہ کول گھلیا گیا۔
27 ایسے طرحاں اِلیشع نبی دے زمانے چ اِسرائیل چ بوہت سارے کوڑھی سن۔ پر اوہناں چوں کسے نُوں شفا نئیں دِتی گئی سگوں شفا صرف سُوریہ چ رہن والے نعمان نُوں دِتی گئی۔“
28 عبادتگاہ چ اوہدیاں گلاں سُنن والے سارے لوک غصے نال لال پیلے ہو گئے۔
29 اوہ اُٹھ کے چھیتی نال یسوع نُوں شہروں باہر اوس پہاڑ دی چوٹی تے لے گئے جدے تے اوہناں دا شہر وَسیا ہویا سی تاکہ اوہ اوہنوں پہاڑ توں تھلے سُٹ دین۔
30 پر اوہ اوہناں وچوں نکل کے اوتھوں چلا گیا۔
31 فیر اوہ گلیل دے شہر کفرنحوم چ گیا تے سبت والے دن لوکاں نُوں تلیم دین لگ پیا۔
32 لوک اوہدے تلیم دین دے طریقے توں حیران رہ گئے کیونکہ اوہ پورے اِختیار نال گل کردا سی۔
33 اوس ویلے عبادتگاہ چ اِک بندہ سی جنہوں اِک باغی فرشتہ چِمبڑیا ہویا سی۔ اوہنے اُچی اُچی کہیا:
34 ”اوئے یسوع ناصری، تیرا ساڈے نال کیہہ واسطہ؟ کیہہ تُوں سانوں تباہ کرن آیا ایں؟ مینوں چنگی طرحاں پتہ اے کہ تُوں کون ایں۔ تُوں خدا دا پاک خادم ایں۔“
35 پر یسوع نے باغی فرشتے نُوں جِھڑکیا تے کہیا: ”چپ کر تے ایہدے چوں نکل جا!“ ایس لئی باغی فرشتے نے اوس بندے نُوں اوہناں دے وچکار سُٹ دِتا تے اوہنوں تکلیف پونچائے بغیر اوہدے چوں نکل گیا۔
36 ایہہ ویکھ کے سارے لوک بڑے حیران ہو گئے تے اِک دُوجے نُوں کہن لگ پئے: ”ایہدیاں گلاں چ تے بڑی طاقت اے۔ ایہدا تے باغی فرشتیاں تے وی اِختیار چلدا اے۔ اوہ ایہدا حکم سُن دے سار ای لوکاں چوں نکل جاندے نیں۔“
37 ایس لئی اوس علاقے دے کونے کونے چ یسوع بارے خبر پھیل گئی۔
38 یسوع عبادتگاہ چوں نِکلن دے بعد شمعون پطرس دے گھر گیا۔ اوہدی سّس نُوں تیز بخار چڑھیا ہویا سی۔ ایس لئی اوہناں نے یسوع اَگے درخاست کیتی کہ اوہ اوہنوں ٹھیک کرے۔
39 ایس لئی اوہنے اوہدے کول جا کے اوہنوں ٹھیک کر دِتا۔* اوہ اوسے ویلے اُٹھ کے اوہناں دی خدمت کرن لگ پئی۔
40 جدوں شام ہوئی تے لوک بوہت سارے مریضاں نُوں اوہدے کول لیائے جنہاں نُوں فرق فرق بیماریاں سن۔ یسوع نے اوہناں چوں ہر اِک تے اپنا ہتھ رکھیا تے ساریاں نُوں ٹھیک کر دِتا۔
41 ایہدے علاوہ اوہنے بوہت سارے لوکاں وچوں باغی فرشتے کڈھے۔ اوہ لوکاں چوں نکلدے ہوئیاں اُچی اُچی کہہ رہے سن: ”تُوں خدا دا پُتر ایں۔“ باغی فرشتیاں نُوں پتہ سی کہ اوہ مسیح اے۔ ایس لئی یسوع نے اوہناں نُوں جِھڑک کے چپ کرا دِتا۔
42 جدوں دن چڑھیا تے یسوع اِک ویران جگہ تے چلا گیا۔ پر لوک اوہنوں لبھدے لبھدے اوتھے پونچ گئے تے اوہنوں مجبور کرن لگ پئے کہ اوہ اوہناں نُوں چھڈ کے نہ جائے۔
43 پر یسوع نے اوہناں نُوں کہیا: ”مَیں ہور شہراں چ وی جا کے خدا دی بادشاہی دی خوشخبری سُنانی اے کیونکہ مینوں ایسے لئی گھلیا گیا اے۔“
44 ایس لئی اوہ یہودیہ چلا گیا تے اوتھوں دِیاں عبادتگاہواں چ مُنادی کرن لگ پیا۔
فٹ نوٹ
^ یونانی چ: ”اِک پُتر۔“
^ یونانی چ: ”اِک پُتر۔“
^ یاں، ”طومار۔“
^ یونانی چ: ”سال۔“
^ یونانی چ: ”اسمان بند رہیا۔“
^ یونانی چ: ”بخار نُوں جِھڑکیا۔“
