یوحنا دی اِنجیل 17:1-26
17 ایہہ گلاں کہن توں بعد یسوع نے اسمان وَل اَکھاں چُک کے کہیا: ”اَے باپ، ہُن ویلا آگیا اے۔ اپنے پُتر دی وڈیائی کر تاکہ اوہ تیری وڈیائی کرے
2 کیونکہ تُوں اپنے پُتر نُوں سارے لوکاں تے اِختیار دِتا اے تاکہ اوہ اوہناں لوکاں نُوں ہمیشاں دی زندگی دَوے جیہڑے تُوں اوہنوں دِتے نیں۔
3 ہمیشاں دی زندگی پان لئی ضروری اے کہ اوہ تینوں چنگی طرحاں جانن* کیونکہ تُوں ای سچا خدا ایں تے یسوع مسیح نُوں وی جانن جنہوں تُوں گھلیا اے۔
4 مَیں زمین تے اوہ کم پورا کر کے جیہڑا تُوں مینوں دِتا سی تیری وڈیائی کیتی اے۔
5 ایس لئی اَے باپ، مینوں اپنے حضور اوہی شان بخش جیہڑی مَیں دُنیا دے بنن توں پہلاں تیرے حضور رکھنا ساں۔
6 مَیں اوہناں لوکاں نُوں تیرے ناں بارے سکھایا اے جیہڑے تُوں دُنیا وچوں مینوں دِتے نیں۔ اوہ تیرے سن تے تُوں اوہ مینوں دِتے نیں تے اوہناں نے تیریاں گلاں تے عمل کیتا اے۔
7 اوہ ہُن جان گئے نیں کہ جو کجھ وی تُوں مینوں دِتا اے، اوہ سب تیرا ای اے
8 کیونکہ جیہڑیاں گلاں تُوں مینوں دَسیاں نیں، اوہی مَیں اوہناں نُوں سکھائیاں نیں تے اوہناں نے میریاں گلاں نُوں قبول کیتا اے۔ تے اوہ جان گئے نیں کہ مَیں تیرے ناں تے آیا واں تے اوہناں نُوں یقین ہو گیا اے کہ تُوں ای مینوں گھلیا اے۔
9 مَیں اوہناں لئی درخاست کرنا واں۔ مَیں دُنیا لئی نئیں سگوں اوہناں لوکاں لئی درخاست کرنا واں جیہڑے تُوں مینوں دِتے نیں کیونکہ اوہ تیرے نیں۔
10 تے میرا سب کجھ تیرا اے تے تیرا سب کجھ میرا اے تے اوہناں نے میری وڈیائی کیتی اے۔
11 مَیں دُنیا نُوں چھڈ کے تیرے کول آ رہیا واں۔ پر اوہ دُنیا چ نیں۔ مُقدس باپ، اپنے ناں دی خاطر جیہڑا تُوں مینوں دِتا اے، اوہناں دی حفاظت کر تاکہ اوہ اِک مُٹھ ہون جیویں اَسی اِک مُٹھ آں۔
12 جدوں تک مَیں اوہناں دے نال آں، مَیں تیرے ناں دی خاطر جیہڑا تُوں مینوں دِتا اے، اوہناں دی حفاظت کراں گا تے مَیں اوہناں دی حفاظت کیتی وی اے۔ ایس لئی اوہناں وچوں کوئی وی ہلاک نئیں ہویا سوائے اوہدے جنہے ہلاک ہونا سی تاکہ پاک کلام چ لکھی ہوئی گل پوری ہوئے۔
13 پر ہُن مَیں تیرے کول آ رہیا واں۔ مَیں دُنیا چ رہندے ہوئیاں ایہہ گلاں کہہ رہیا واں تاکہ میرے وانگوں اوہناں دے دل وی خوشی نال بھر جان۔
14 مَیں اوہناں نُوں تیریاں گلاں دَسیاں نیں۔ پر دُنیا نے اوہناں نال نفرت کیتی اے کیونکہ اوہ دُنیا دے نئیں جیویں مَیں دُنیا دا نئیں۔
15 مَیں تیرے کولوں ایہہ درخاست نئیں کردا کہ تُوں اوہناں نُوں دُنیا چوں کڈھ لے سگوں ایہہ درخاست کرنا واں کہ تُوں شیطان توں اوہناں دی حفاظت کر۔
16 اوہ دُنیا دے نئیں جیویں مَیں دُنیا دا نئیں۔
17 اوہناں نُوں سچائی نال پاک کر۔ تیرا کلام سچائی اے۔
18 جیویں تُوں مینوں دُنیا چ گھلیا اونویں ای مَیں اوہناں نُوں دُنیا چ گھلیا اے۔
19 مَیں اوہناں دی خاطر اپنے آپ نُوں پاک رکھنا واں تاکہ اوہ وی سچائی نال پاک ہون۔
20 مَیں صرف ایہناں لئی درخاست نئیں کر رہیا سگوں اوہناں لئی وی درخاست کر رہیا واں جیہڑے ایہناں دِیاں گلاں سُن کے میرے تے ایمان لیان گے
21 تاکہ اوہ سارے اِک مُٹھ ہون جیویں کہ اَے باپ، تُوں میرے نال تے مَیں تیرے نال اِک مُٹھ آں تے اوہ سارے وی ساڈے نال اِک مُٹھ ہون تے اِنج دُنیا نُوں یقین ہو جائے کہ تُوں مینوں گھلیا اے۔
22 مَیں اوہناں نُوں اوہ شان دِتی اے جیہڑی تُوں مینوں بخشی اے تاکہ اوہ اِک مُٹھ ہون جیویں اَسی اِک مُٹھ آں۔
23 مَیں اوہناں نال اِک مُٹھ آں تے تُوں میرے نال اِک مُٹھ ایں تاکہ اوہ سارے وی آپس چ ہر لحاظ نال اِک مُٹھ ہون تے دُنیا جان جائے کہ تُوں مینوں گھلیا اے۔ تے جیویں تُوں مینوں پیار کرنا ایں اوسے طرحاں تُوں اوہناں نُوں وی پیار کرنا ایں۔
24 اَے باپ، مَیں چاہنا واں کہ جیہڑے لوک تُوں مینوں دِتے نیں، اوہ وی میرے نال اوتھے ہون جِتھے مَیں جا رہیا واں تاکہ اوہ میری اوس شان نُوں ویکھ سکن جیہڑی تُوں مینوں دِتی اے کیونکہ ایس دُنیا دی نِیہہ رکھن توں پہلاں تُوں میرے نال پیار کیتا۔
25 اَے نیک باپ، دُنیا تینوں نئیں جان دی۔ پر مَیں تینوں جاننا واں تے ایہہ وی جان گئے نیں کہ تُوں مینوں گھلیا اے۔
26 مَیں ایہناں نُوں تیرے ناں بارے سکھایا اے تے سکھاندا رہواں گا تاکہ جیہڑا پیار تُوں میرے لئی وکھایا اے، ایہہ وی اوہی پیار وکھان تے مَیں ایہناں نال اِک مُٹھ رہواں۔“
فٹ نوٹ
^ یاں، ”تیرے بارے سکھدے رہن۔“
