تیمُتھیُس اِک بوہت چنگے انسان سن۔‏ اوہ خوشی خوشی دُوجیاں دی مدد کردے سن۔‏ اوہ لوکاں دی مدد کرن لئی کئی ملکاں چ گئے۔‏ ایس کر کے اوہناں نُوں زندگی وچ بوہت خوشیاں ملیاں۔‏ کیہہ تُسی تیمُتھیُس دے بارے جاننا چاہندے او؟‏—‏

تیمُتھیُس شہر لِسترہ وچ رہندے سن۔‏ اوہناں دی امی دا ناں یُونیکے تے نانی دا ناں لوئس سی۔‏ تیمُتھیُس دی امی تے نانی نے اوہناں نُوں بچپن توں ای یہوواہ خدا دے بارے سکھایا سی۔‏ تیمُتھیُس جدوں وڈے ہوئے تے اوہ وی دُوجیاں نُوں یہوواہ خدا دے بارے سکھاؤنا چاہندے سن۔‏

 جدوں تیمُتھیُس جوان سن تے پولُس نے اوہناں نُوں پچھیا:‏ کیہہ تُوں میرے نال دُوجے علاقیاں چ مُنادی کرن لئی جانویں گا؟‏ تیمُتھیُس نے اوہناں نُوں کہیا:‏ جی،‏ مَیں تواڈے نال جاواں گا۔‏

تیمُتھیُس،‏ پولُس دے نال یونان دے شہر تھسلُنیکے گئے۔‏ اوتھے جان لئی اوہناں نُوں پہلے بڑی دُور تک پیدل چلنا پیا تے فیر کشتی چ سفر کرنا پیا۔‏ اوتھے پہنچ کے پولُس تے تیمُتھیُس نے بوہت سارے لوکاں نُوں یہوواہ خدا دے بارے سکھایا۔‏ پر کجھ لوک بوہت غصے چ آ گئے تے دونواں نُوں جانوں مارن دی کوشش کیتی۔‏ ایس لئی پولُس تے تیمُتھیُس اوتھوں چلے گئے تے کسے ہور علاقے چ جا کے مُنادی کرن لگ پئے۔‏

کجھ مہینیاں بعد پولُس نے تیمُتھیُس نُوں کہیا کہ تھسلُنیکے واپس جا کے ویکھ کہ اوتھے بھین بھراواں دا کیہہ حال چال اے۔‏ تیمُتھیُس نُوں پتہ سی کہ ایس شہر دے لوک فیر اوہناں نُوں مارن دی کوشش کرن گے۔‏ پر فیر وی اوہ اوتھے گئے کیونکہ اوہناں نُوں اوتھوں دے بھین بھراواں دی فکر سی۔‏ اوہناں نے پولُس نُوں واپس آ کے دسیا کہ اوتھوں دے بھین بھرا ٹھیک ٹھاک نیں۔‏

تیمُتھیُس نے پولُس دے نال رَل کے کئی سالاں تک مُنادی کیتی۔‏ اِک واری پولُس نے اپنے اِک خط وچ تیمُتھیُس بارے لکھیا کہ تیمُتھیُس ای سب توں چنگا بندہ اے جنہوں مَیں بھین بھراواں دی مدد لئی بھیج سکنا واں۔‏ تیمُتھیُس نُوں یہوواہ خدا تے لوکاں نال بڑا پیار سی۔‏

کیہہ تُسی لوکاں نُوں پیار کردے او تے اوہناں نُوں یہوواہ خدا دے بارے سکھاؤنا چاہندے او؟‏—‏ جے تُسی اِنج کرو گے تے توانوں وی تیمُتھیُس وانگوں بوہت ساریاں خوشیاں مِلن گیاں۔‏