سبق 2
رِبقہ—خدا دا دل خوش کرن والی کُڑی
رِبقہ، یہوواہ خدا نُوں بوہت پیار کردی سی۔ اوہدے خاوند دا ناں اِضحاق سی تے اوہ وی یہوواہ خدا نُوں بوہت پیار کردے سن۔ پر رِبقہ تے اِضحاق دا ویاہ کیویں ہویا؟ رِبقہ نے کیویں ظاہر کیتا کہ اوہ یہوواہ خدا دا دل خوش کرنا چاہندی سی؟ ایہہ جانن لئی آؤ، پہلے اِضحاق بارے پڑھئے۔
اِضحاق دے ابو دا ناں ابراہام تے امی دا ناں سارہ سی۔ اوہ ملک کنعان وچ رہندے سن۔ ایس ملک دے لوک یہوواہ خدا دی عبادت نئیں کردے سن۔ ایس لئی ابراہام نئیں چاہندے سن کہ اِضحاق اوس ملک دی کسے کُڑی نال ویاہ کرن۔ اوہ چاہندے سن کہ اِضحاق اوس کُڑی نال ویاہ کرن جیہڑی یہوواہ خدا دی عبادت کردی ہووے۔ ایس لئی اوہناں نے اپنے نوکر اِلیعزر نُوں کجھ ہور نوکراں نال شہر حاران گھلیا۔ ایس شہر چ ابراہام دے کجھ رشتےدار رہندے سن۔ ابراہام جان دے سن کہ اوتھے اِلیعزر نُوں اِضحاق لئی اِک چنگی کُڑی مِل جائے گی۔
فیر اِلیعزر اوہناں نوکراں نال شہر حاران وَل ٹر پئے۔ ایہہ بڑا لما سفر سی۔ اِلیعزر اپنے نال دس اُونٹھ لے کے گئے جنہاں اُتے کھان پِین والیاں شیواں تے تحفے لدے ہوئے سن۔ پر اِلیعزر نے اِضحاق لئی اِک نیک بیوی کیویں لبھی؟ آؤ، ویکھنے آں کہ اوہناں نے کیہہ کیتا۔ جدوں اِلیعزر حاران پہنچے تے اوہ پانی دے اِک کُھوہ لاگے رُک گئے۔ اوہناں نُوں پتہ سی کہ تھوڑی دیر چ عورتاں پانی بھرن لئی کُھوہ تے آؤن گیاں۔ اوہناں نے دُعا کیتی کہ اَے یہوواہ! مَیں اِک کُڑی کولوں پانی منگاں گا۔ جے اوہ مینوں تے میرے اُونٹھاں نُوں پانی پیائے گی تے مَیں سمجھ لواں گا کہ تُوں اوس کُڑی نُوں اِضحاق لئی چُنیا اے۔
فیر رِبقہ کُھوہ تے آئی۔ بائبل چ دسیا گیا اے کہ رِبقہ بوہت سوہنی سی۔ اِلیعزر نے اوہدے کولوں پانی منگیا۔ رِبقہ نے اوہناں نُوں کہیا: جی، تُسی ایہہ پانی پی لوو۔ فیر مَیں تواڈے اُونٹھاں لئی وی پانی لیاواں گی۔ اُونٹھ بوہت زیادہ پانی پیندے نیں۔ ایس لئی رِبقہ نُوں وار وار کُھوہ توں پانی بھر کے لیاؤنا پیا۔ کیہہ تُسی تصویر چ ویکھ سکدے او کہ رِبقہ اُونٹھاں نُوں پانی پیاؤن لئی کِنّی محنت کر رہی اے؟— اِلیعزر ایہہ ویکھ کے بوہت خوش ہوئے کہ یہوواہ خدا نے اوہناں دی دُعا سُن لئی اے۔
اِلیعزر نے رِبقہ نُوں بوہت سوہنے سوہنے تحفے دِتے۔ رِبقہ چھیتی نال اِلیعزر تے دُوجے نوکراں نُوں اپنے گھر لے گئی۔ اِلیعزر نے رِبقہ دے گھر والیاں نُوں دسیا کہ ابراہام نے اوہناں نُوں حاران کاہدے لئی گھلیا اے۔ فیر اوہناں نے دسیا کہ یہوواہ خدا نے اوہناں دی دُعا دا جواب کیویں دِتا اے۔ رِبقہ دے گھر والے بڑے خوش ہوئے کہ رِبقہ دا ویاہ اِضحاق نال ہوئے گا۔
رِبقہ، اِلیعزر دے نال ملک کنعان چلی گئی تے اوتھے اوہدا ویاہ اِضحاق نال ہو گیا۔
پر کیہہ رِبقہ چاہندی سی کہ اوہدا ویاہ اِضحاق نال ہووے؟— رِبقہ جان دی سی کہ اِلیعزر نُوں یہوواہ خدا نے گھلیا اے۔ ایس لئی جدوں رِبقہ دے گھر والیاں نے اوہنوں پچھیا کہ کیہہ تُوں اِضحاق نال ویاہ کرنا چاہنی ایں؟ تے رِبقہ نے کہیا: ہاں جی۔ اوہ فوراً اِلیعزر نال ملک کنعان چلی گئی۔ اوتھے اوہدا ویاہ اِضحاق نال ہو گیا۔
رِبقہ، یہوواہ خدا دا دل خوش کرنا چاہندی سی ایس لئی یہوواہ خدا نے اوہنوں برکت دِتی۔ کئی سالاں بعد رِبقہ تے اِضحاق دے خاندان چوں یسوع مسیح پیدا ہوئے۔ جے تُسی رِبقہ وانگوں بنو گے تے یہوواہ خدا خوش ہوئے گا تے توانوں بوہت ساریاں برکتاں دَوے گا۔
ایہہ ایتاں پڑھو:
-
پیدایش 12:4، 5؛ 24:1-58، 67