بائبل صرف اِک شان‌دار مستقبل بارے امید ای نئیں دیندی سگوں ایہہ وی دَسدی اے کہ اَسی اپنی زند‌گی نُوں خوش‌گو‌ار کیویں بنا سکنے آں۔ ہو سکدا اے کہ تُسی بائبل بارے ہور سکھنا چاہندے او پر تواڈے دل چ ایہدے بارے کجھ شک نیں۔کیہہ تُسی اینی پرانی کتاب چ لکھے وعدیاں تے مشوریاں اُتے بھروسا کر سکدے او؟ کیہہ توانوں یقین اے کہ بائبل دی تلیم تے عمل کر کے تواڈی زند‌گی واقعی خوش‌گو‌ار ہو جائے گی؟ اَج لکھاں لوک بائبل تے پورا بھروسا کر‌دے نیں۔ کیہہ تُسی وی کر‌نا چاہندے او؟ فیر کیوں نہ تُسی آپ ایہنوں پرکھو۔‏

1.‏ بائبل چ لکھیاں گلاں سچیاں نیں یاں فرضی؟‏

بائبل چ دَسیا گیا اے کہ ایہدے چ لکھیاں ساریاں گلاں سچیاں نیں۔‏ (‏واعظ 12:‏​10‏)‏ ایہدے چ لکھے واقعے قصے کہانیاں نئیں نیں سگوں اوہ سچے نیں تے اصلی لوکاں نال ہوئے سن۔ (‏لُوقا 1:‏3؛‏ 3:‏​1، 2 نُوں پڑھو۔)‏ بوہت سارے عالم ثبوتاں دی بِنا تے ایہہ من دے نیں کہ بائبل چ جیہڑے لوکاں، تھانواں تے تریخاں بارے دَسیا گیا اے،اوہ بالکل صحی تے اصلی نیں۔‏

2.‏ بھانویں کہ بائبل اِک پرانی کتاب اے پر فیر وی اَسی ایہہ کیوں کہہ سکنے آں کہ ایہدے چ لکھیاں گلاں صحی نیں؟‏

بائبل چ ایہو جہیاں گلاں وی لکھیاں نیں جیہڑیاں اوس زمانے دے لوک نئیں جان دے سن۔ مثال لئی ایہدے چ کجھ گلاں ایہو جہیاں نیں جنہاں دا تعلق سائنس نال اے۔ جدوں ایہہ گلاں لکھیاں گئیاں سن اوہدوں بوہت سارے لوک ایہناں نُوں نئیں من دے سن۔ پر اَج بوہت سارے سائنس‌دان من دے نیں کہ ایہہ گلاں صحی نیں۔ واقعی بائبل چ لکھیاں گلاں سچیاں نیں تے اوہ ہمیشاں قائم رہن گیا‌ں۔​—‏زبور 111:‏8‏۔‏

3.‏ بائبل مستقبل بارے جو کجھ دَسدی اے اَسی اوہدے تے بھروسا کیوں کر سکنے آں؟‏

بائبل چ ایہو جہیاں کئی پیشین‌گو‌ئیاں نیں جیہڑیاں حالے تک پوریاں نئیں ہوئیاں۔‏ (‏یسعیاہ 46:‏​10‏)‏ ایہدے چ کئی واقعے پہلاں توں ای لکھ دِتے گئے سن بھانویں کہ اوہ بوہت عرصے بعد ہوئے۔ ایہدے چ تے ایہہ وی دَس دِتا گیا سی کہ ساڈے زمانے چ حالات کیہو جہے ہون گے۔ ایس سبق چ اَسی بائبل چ لکھیاں کجھ پیشین‌گو‌ئیاں تے غور کر‌اں گے۔ ایہناں پیشین‌گو‌ئیاں چ لکھی ہر گل پوری ہوئی اے۔‏

 خلاصہ

تریخ، سائنس تے پیشین‌گو‌ئیاں توں ثابت ہوند‌ا اے کہ بائبل درست تے بھروسےمند کتاب اے۔‏

دہرائی

• بائبل چ لکھیاں گلاں سچیاں نیں یاں فرضی؟‏

• بائبل چ لکھیاں کیہڑیاں کیہڑیاں گلاں سائنسی لحاظ نال صحی نیں؟‏

• تواڈے خیال چ کیہہ بائبل مستقبل بارے صحی معلومات دیندی اے؟ جے ہاں تے کیوں؟ جے نئیں تے کیوں نئیں؟‏