ایس کتاب وچ تُسی ویکھیا ہوئے گا کہ یہوواہ دے گواہ اپنیاں عبادتاں تے کِنّے سلیقے نال تیار ہو کے آؤندے نیں۔‏ اوہ اپنے پہناوے تے ایناں دھیان کیوں دیندے نیں؟‏

اپنے خدا دی وڈیائی کرن لئی۔‏ خدا ساڈے رنگ رُوپ نُوں نئیں سگوں دل نُوں ویکھدا اے۔‏ (‏1-‏سموئیل 16:‏7‏)‏ جدوں اَسی عبادت لئی کٹھے ہنے آں تے ساڈی دلی آرزو ہوندی اے کہ اَسی خدا لئی تے اپنے بھین بھراواں لئی عزت وکھائیے۔‏ ایس لئی اَسی صاف ستھرے کپڑے پا کے عبادت تے آؤنے آں۔‏ جے سانوں کسے بادشاہ یاں صدر دے حضور جان دی دعوت ملے تے کیہہ اَسی صاف ستھرے کپڑے پا کے نئیں جاواں گے؟‏ ایسے طرحاں سانوں قوماں دے بادشاہ دے حضور آؤن لئی وی صاف ستھرے تے چنگے کپڑے پا کے آؤنا چاہیدا اے۔‏ اِنج اَسی یہوواہ خدا لئی تے اوہدے گھر لئی احترام وکھاواں گے۔‏—‏یرمیاہ 10:‏7‏۔‏

بائبل دے اصولاں مطابق چلن لئی۔‏ بائبل مسیحیاں نُوں ہلاشیری دیندی اے کہ اوہ ایسا لباس پاؤن جدے توں حیاداری تے سمجھ‌داری نظر آوے۔‏ (‏1-‏تیمُتھیُس 2:‏9،‏ 10‏)‏ حیادار کپڑے بھڑکیلے،‏ تنگ تے باریک نئیں ہوندے۔‏ سانوں اپنے پہناوے بارے سمجھ‌داری نال کم لینا چاہیدا اے۔‏ ایہدا مطلب اے کہ ساڈے کپڑے بے ڈھنگے یاں عجیب‌وغریب فیشن والے نہ ہون۔‏ پر ایہدا مطلب ایہہ وی نئیں کہ اَسی اپنی پسند مطابق سوہنے کپڑے نئیں پا سکدے۔‏ چنگے پہناوے دے ذریعے اَسی اپنے مُنجی خدا دی تلیم دی خوب‌صورتی ظاہر کراں گے تے اوہدی وڈیائی کراں گے۔‏ (‏طِطُس 2:‏10؛‏ 1-‏پطرس 2:‏12‏)‏ ہو سکدا اے کہ عبادتاں تے ساڈا چنگا پہناوا ویکھ کے دُوجے لوکاں دے دل وچ وی یہوواہ خدا دی عبادت کرن دا شوق پیدا ہو جائے۔‏

ایہہ نہ سوچو کہ ساڈیاں عبادتاں تے آؤن لئی تواڈے کول بوہتے فیشن‌والے یاں مہنگے کپڑے ہونے چاہیدے نیں۔‏ سب توں ضروری گل ایہہ وے کہ ساڈے کپڑے مناسب تے صاف ستھرے ہون۔‏

• اَسی اپنیاں عبادتاں تے سلیقے نال تیار ہو کے کیوں آؤنے آں؟‏

• سانوں اپنے پہناوے بارے بائبل دے کیہڑے اصولاں مطابق چلنا چاہیدا اے؟‏