بوہت سارے لوکاں نے مذہبی عبادتاں تے جانا چھڈ دِتا اے کیونکہ اوتھے نہ تے اوہناں نُوں زندگی دے ضروری سوالاں دے جواب مِلدے نیں تے نہ ای کسے طرحاں دی تسلی مِلدی اے۔‏ تے فیر توانوں یہوواہ دے گواہواں دیاں عبادتاں تے کیوں جانا چاہیدا اے تے اوتھے جا کے توانوں کیہڑے فائدے ہون گے؟‏

خدا دے لوکاں نال مِل کے توانوں خوشی ملے گی۔‏ پہلی صدی دے مسیحی خدا دی عبادت کرن،‏ اوہدے کلام وچوں سکھن تے اِک دُوجے دا حوصلہ ودھاؤن لئی کلیسیاواں وچ کٹھے ہوندے سن۔‏ (‏عبرانیوں 10:‏24،‏ 25‏)‏ کلیسیاواں وچ پیار بھریا ماحول ہوندا سی تے سارے اِک دُوجے نُوں سچے دوست تے بھین بھرا سمجھدے سن۔‏ (‏2-‏تھسلُنیکیوں 1:‏3؛‏ 3-‏یوحنا 14‏)‏ اَسی وی اوہناں مسیحیاں وانگوں عبادت کرنے آں تے بڑے خوش ہنے آں۔‏

تُسی پاک کلام دے اصولاں تے چلنا سکھو گے۔‏ جیس طرحاں پرانے زمانے وچ خدا دے خادم مِل کے عبادت کردے سن،‏ اوسے طرحاں اَج ساڈیاں عبادتاں تے وی مرد،‏ عورتاں تے بچے سارے مِل کے خدا دی تمجید کردے نیں۔‏ بائبل دا علم رکھن والے نگہبان سانوں سکھاؤندے نیں کہ اَسی خدا دے اصولاں مطابق زندگی کیویں گزار سکنے آں۔‏ (‏اِستثنا 31:‏12؛‏ نحمیاہ 8:‏8‏)‏ اَسی اپنیاں عبادتاں تے خدا دی وڈیائی دے گیت وی گاؤنے آں۔‏ اَسی ایہناں عبادتاں تے ہون والی گل بات وچ حصہ لے سکنے آں۔‏ ایس طرحاں سانوں اپنی امید دا اقرار کرن دا موقع مِلدا اے۔‏—‏عبرانیوں 10:‏23‏۔‏

تواڈا ایمان مضبوط ہووے گا۔‏ پولس رسول نے اِک کلیسیا نُوں لکھیا کہ مَیں توانوں ویکھن نُوں ترسنا واں تاکہ توانوں میرے ایمان توں تے مینوں تواڈے ایمان توں حوصلہ ملے۔‏ (‏رومیوں 1:‏11،‏ 12‏)‏ مسیحی بھیناں بھراواں نال عبادتاں تے لگاتار جمع ہو کے ساڈا ایمان مضبوط ہوندا اے تے بائبل دے اصولاں مطابق زندگی گزارن دا ساڈا ارادہ وی پکا ہوندا اے۔‏

کیوں نہ تُسی ساڈی اگلی عبادت تے آ کے ایہہ سارا کجھ اپنی اکھیں ویکھو۔‏ جے تُسی آؤ گے تے سانوں بڑی خوشی ہووے گی۔‏ تواڈے توں کوئی چندہ نئیں لیا جائے گا۔‏

• اَسی کِنہاں وانگوں عبادت کرنے آں؟‏

• ساڈیاں عبادتاں تے آ کے توانوں کیہڑے فائدے ہون گے؟‏