Wahnpoaron Pohl kin pohnese duwen keper en soangen likamw kan me Sehdan kin doadoahngki, ahpw kaidehn koaros ienge Kristian teiko kin wia met. Karasepe, ekei nan Korint kin nohn medewe me re uhdahn kehlail nan padahk mehlel oh re sohte kak pwupwudi. (1 Kor. 10:12) Ihme kahrehda Pohl kihda mehn kataman wet: “I perki ma amwail lamalam akan pahn sapwungala oh kumwail pahn kesehla amwail loalenohng Krais​—duwehte Ihp eh lohdiong pahn widing en sineiko.”​—2 Kor. 11:3.

Dahme Pohl pwunodki kin kasalehda me kitail en dehr ahneki soangen pepehm en itarki atail pwoson. Ma kitail pahn powehdi dahme kin pelianda atail lamalam, kitail anahne pohnese keperpen mehn kair likamw kan oh pere kitail sang mepwukat.

Mehn kair likamw kan kin kadoadoahk pwehn pitih de kaunda aramas oh mwomwen arail madamadau oh wiewia. Pwuhken Propaganda and Persuasion kasalehda me mehn kair likamw kan kin “keper, sohte pahrek, oh sohte kin pahrekiong kosonned.”

Ia uwen keper en mehn kair likamw kan? E inenen keper, duwehte soangen kahs pwoisin me kitail sohte kak kilang de ned, ahpw e kin ekisekis mihla nan madamadau ni atail sasairki. Pwehki kitail sohte kak kilangki masatail ia uhdahn kahrepen mehn kair likamw kan, emen me samanih petehkpen wiewiahn aramas, Vance Packard, koasoia: “Me tohto rehtail kin mweidohng met en kamwakid oh kaunda kitail laudsang atail ese.” Pil emen ohl nda me ni arail mihla pahn manaman en  soahng wet, ohl oh lih akan kin “mwadang dukula pah oh kahrehiong irail en wiahda soangen mwekid me keieu keper oh pweipwei,” duwehte ‘kamakamalahn keinek, mahwen, lipilipilki aramas oh pelien lamalam oh pil soangen wiewia sapwung teikan.’​—Easily Led—​A History of Propaganda.

Eri ma aramas kak pitiheki kitail mehn kair likamw kan, dahme Sehdan kak wia? E kasawiher wiewiahn aramas sangete ahnsou me aramas kapikipikda. Met “sampah unsek” mi pahn eh manaman. E kak doadoahngki soahng koaros nin sampah pwehn kihpeseng eh likamw kan wasa koaros. (1 Sohn 5:19; Sohn 8:44) Sehdan kin uhdahn pweida ni eh karotongehla madamadau en aramas oh met e kin “pitipitih sampah pwon.” (2 Kor. 4:4; Kaud. 12:9) Ia duwen omw kak pelianda eh likamw kan?

Sises ketikihda kaweid mengei ehu ong pelianda mehn kair likamw kan ni eh mahsanih: “Dehdehki dahme mehlel, oh me mehlelo pahn kasaledengkumwailla.” (Sohn 8:31, 32) Ahpw pwehki mehlel kin kalapw tepin ohla, kowe​—duwehte sounpei kan nan mahwen—​anahne utupen ire mehlel de likilik ehu pwehn kauhdi imwintihtio sang eh kin widinge omw lamalam. Siohwa ketikihda met. Nan Paipel, ke kak diarada soahng koaros me ke anahne pwehn pelianda ahn Sehdan likamw kan.​—2 Tim. 3:16, 17.

Me kin keieu kihda mehn kair likamw, Sehdan, uhdahn ese duwen met. Eri e kin doadoahngki eh koasoandi en sampah pwehn song en kauhdi omw wadek oh onopki Paipel. Dehr dukula pahn eh koasoandi widing kan! (Ep. 6:11) Wia uwen omw kak en “dehdehki” uwen laud en padahk mehlel. (Ep. 3:18) Ke pahn anahne nantihong laud. Ahpw tamataman ire mehlel wet me sounnting en pwuhk, Noam Chomsky, kasalehda: “Sohte me pahn audehkihong omw mwahliel dahme mehlel. Met wia mehkot me pein kowe en diarada.” Eri “pein kowe en diarada” kin kohsang omw pwerisekiong “onopki Pwuhk Sarawi” rahn koaros.​—Wiewia 17:11.

Tamataman me Sehdan sohte men ken medemedewe kanahieng soahng kan. Dahme kahrehda? Ehu pwuhk koasoia me kahrepeo iei pwehki mehn kair likamw kan “kin keieu pweida ma aramas . . . sohla perenki medewe kanahieng soahng kan.” (Media and Society in the Twentieth Century) Eri dehr itarki de mwadangete pwungki  dahme ke rong. (Lep. Pad. 14:15) Doadoahngki omw koahiek en madamadau me Koht ketikihong uhk pwehn wiahkihla dahme mehlel pein ahmw.​—Lep. Pad. 2:10-15; Rom 12:1, 2.

Soun koasoanehdi mahwen kan ele kin doadoahngki mehn kair likamw kan pwehn kaluwetehla madamadau en pei. Irail kak kahrehiong nein arail imwintihtio nair sounpei kan en peipene nanpwungarail de pitihedi irail en katohreirailsang arail pwihn en mahweno. Ehu pwuhk koasoia me emen kaunen sounpei en Sehmen wehkada me ehu kahrepen arail lohdi nan Mahwen Keieu en Sampah iei me aramas ako “dukula pahn mehn kair likamw kan en arail imwintihtio, rasehng rapit men eh dukula pahn sineik men.” Sehdan doadoahngki wiepen katohrohr oh powehdi wet ni eh song en, ni karasaras, kahrehda saminimin nanpwungen Kristian kan de kahrehiong irail en katohreirailsang sapwellimen Siohwa pwihn pwehki dene mie wiewia sapahrek de re nsensuwedla.

Dehr mweidohng met en pitihiukedi! Ahpw mweidohng Mahsen en Koht en kahluwa iuk. Karasepe, me pid duwen atail en kolokol minimin nanpwungen riatail Kristian kan, Paipel kin kangoange kitail en pousehlahte “mahkpene” oh mwadang en kapwungala iren sawehwe kan. (Kol. 3:13, 14; Mad. 5:23, 24) E kihda mehn kataman laud me kitail en dehr katohrekitailsang mwomwohdiso. (Lep. Pad. 18:1) Tetehk omw mehn sansar kan me ken pelianki ahn Sehdan likamw. Pein idek rehmw: ‘Dahme kaunda ei madamadau ahnsowo me I lelohng soangen irairo? Madamadau en sampah de sapwellimen Koht manaman?’​—Kal. 5:16-26; Ep. 2:2, 3.

Sounpei men me eh loalopwoat ong eh kauno kin luwetala sohte pahn pei ni koahiek. Eri soun wiahda likamw kan kin song en kauwehla likilik me mi nanpwungen sounpeio oh eh kauno. Re kak doadoahngki soangen likamw duwehte met akan: “Dehr likih omw kaun akan!” oh “Dehr mweidohng irail en kahrehiong uhk nan kahpwal!” Pwehn kapatahiong mepwukat, re pil kin ni loalokong kasalehda soangen sapwung koaros me kaun ko ele wiahda. Sehdan kin wia met. E sohte kin uhdihsang eh songosong en kaluwetehla omw likih elen kaunda me Siohwa ketikihda.

Dahme pahn pere iuk? Koasoanehdi teng ken  patehngete sapwellimen Siohwa pwihn oh utungada ni loalopwoat elen kaunda me e ketikihda, sohte lipilipil ma soh unsek kan sansalda. (1 Des. 5:12, 13) Kitail en dehr ‘mwadang sawehwehda nan atail madamadau’ ni atail lelohng mwomwen uhwong kan sang irail kan me kesehla oh uhwongada kaudok mehlel de meteikan me kin widinge atail madamadau, sohte lipilipil ma dahme irail karaunehki kitail mwomwen mehlel. (2 Des. 2:2; Taitus 1:10) Idawehn kaweid me kohwong mwahnakapwo Timoty. Nantihongete me mehlelo me ke sukuhlki oh tamataman wasa me ke sukuhlkihsang. (2 Tim. 3:14, 15) Uhdahn mie mehn kadehde tohto me kasalehda me ke kak likih pwihn me Siohwa ketin doadoahngki kereniongehr sounpar epwiki pwehn kahluwa kitail ni elen mehlel.​—Mad. 24:45-47; Ipru 13:7, 17.

Tamataman me ahn Sehdan mehn kair likamw kan sohte kin ahnsou koaros sohte sansal. Mie pak me e kin doadoahngki wiepen kamasakih aramas​—“ehu wiepen mehn kair likamw me kin kadoadoahk sangete mahs.” (Easily Led​—A History of Propaganda) Karasepe, emen Professor sang Britain, Philip M. Taylor, ntingihedi me mehn Asiria kan kin kalowehdi arail imwintihti kan sang arail “koasoi likamw iangahki kamasakih aramas.” Sehdan pahn doadoahngki pepehm en masak aramas, masak kalokolok, masak mehla, oh pil soangen mehn kamasak teikan koaros pwehn song en poweiukedi oh kahrehiong uhk ken sohla men papah Siohwa.​—Ais. 8:12; Ser. 42:11; Ipru 2:15.

Dehr mweidohng Sehdan en doadoahngki pepehm en masak pwehn kaluwetehla omw madamadau pwung oh kauwehla omw lelepek. Sises mahsanih: “Dehr masak irail kan me kin kemehla paliwar, ahpw sohte kak wia mehkot palilahsang.” (Luk 12:4) Likih ni unsek sapwellimen Siohwa inou me e pahn ketin apwalih iuk oh ketikihong uhk “manaman lapalap,” oh seweseiuk en pelian kasongosong koaros me kin kamasak uhk pwe ken lohdi.​—2 Kor. 4:7-9; 1 Pit. 3:14.

Ele ke lelohngehr mwekid ehu me kamasepwehk oh kaluwetehla omw madamadau pwung. Ahpw tamataman dahme Siohwa ketin kangoangehki Sosua: “Ke en kehlail oh kommwad! Ke dehr masak de lamalam tikitik, pwehki Ngehi, KAUN-O, omw Koht, me kin ieiang uhk wasa koaros me ke pahn kin kohla ie.” (Sos. 1:9) Ma ke ahneki pwunod laud, mwadang kapakap ong Siohwa oh mweidohng ih omw pwunod koaros. Ke kak kamehlele me ‘sapwellimen Koht popohl . . . pahn nekinekid mohngiongomw oh pil omw lamalam’ pwe ken kak ahneki kehl en pelianda ahn Sehdan likamw koaros.​—Pil. 4:6, 7, 13.

Ke tamataman koasoi likamw kan me me lapalap en mehn Asiria ko doadoahngki ong sapwellimen Koht aramas ako? E mwomwen ndinda, ‘Sohte mehkot kak pereiukasang Asiria. Pil omw Koht, Siohwa, sohte kak wia mehkot.’ Ni eimah e pil nda: ‘Pein Siohwa mahsanihong kiht en kasohrala sahpwet.’ Dahme Siohwa ketin sapengki met? E mahsanih: “Dehr kupwurohki mahsen en lahlahwe ko me mehn Asiria kamasakin komwi, me dene KAUN-O sohte pahn kak kapitkumwailla.” (2 Nan. 18:22-25; 19:6) Siohwa eri ketin poaronehla tohnleng men me kemehla sounpei en Asiria meh 185,000 ni pwohng ehute!​—2 Nan. 19:35.

Mie pak ke kilang kasdo ehu oh kak kilang ni sansal ni emen eh mweidohng emen en pitih oh kaunda eh madamadau? Ke sou kin medewe: ‘Dehr kamehlele! Re pitipitih iuk!’ Eri, medewehla me tohnleng kan kin ndindaiong uhk lokaia pwukat: “Dehr mweidohng ahn Sehdan likamw kan en pitihiukedi!”

Eri, dehr rong ahn Sehdan likamw kan. (Lep. Pad. 26:24, 25) Rong Siohwa oh likih ih ni mehkoaros me ke kin wia. (Lep. Pad. 3:5-7) Mwekidki sapwellime kaweid limpoak: “Samwa, ke en loalokongla, I ahpw pahn kin pereperen.” (Lep. Pad. 27:11) Eri, ke pahn powehdi dahme kin pelianda omw lamalam!