EKEI KIN NDA SOH. Emen toahkte kapahrekihong doadoahngki kaweid en Paipel ong doadoahngki pwuhken kasukuhl en sains sang nan pahr 1920 samwa ong class en palien sains ehu (chemistry). Aramas emen me sohte kin wauneki Paipel ele pahn idek ma ke pahn doadoahngki pwuhken kaweid ong computer me wereilahr, pwehn padahkihong uhk mwomwen omw pahn doadoahngki computer me kapw. Me pil wehwehki, ekei aramas kin medewe me sohte me kak koapworopworki Paipel pwehki e wereilahr.

Ia katepen aramas ar pahn doadoahngki soangen mehn kaweid en mahs wet nan atail ahnsou, pwehki eh diren dipwisou kapw? Pwe website oh blog tohto kin kadarpeseng soangen kaweid kapw kan. Prokram en TV kan kin kasalehda kaweid kan sang sounroporop en madamadau oh mour en aramas kan. Oh wasahn netiki pwuhk kan kin netikihla pwuhken kaweid tohto me kin wiahda mwohni laud.

Pwehki mie soangen mehn kaweid pwukat koaros, ia katepen kitail en tehk Paipel, pwuhk ehu me wiawihda kereniong sounpar 2,000 samwalahro? Irail kan me sohte wauneki Paipel sou pwung ni ar nda me pwuhken kaweid en mahs wet duwehte doadoahngki pwuhken kasukuhl ong sains me wereilahr de pwuhken kaweid ong computer me wereilahr? Ni mehlel, madamadau wet sapwung. Sains oh dipwisou kan kin mwadang wekila, ahpw ia duwe, anahn en aramas wekila? Aramas akan kin men diarada ia kahrepen mour oh pil en ahneki mour nsenamwahu oh meleilei, nanpwungmwahu en peneinei, oh kompoakepah mwahu kan.

Mendahki e wereilahr, Paipel kin kasalehda anahn pwukat oh pil anahn teikan. E pil kasalehda me e pwilisang rehn Sounkapikpatailo. E kin kihong kitail kaweid ong soahng koaros nan atail mour oh e kin sewese kitail nan soangen kahpwal koaros. (2 Timoty 3:16, 17) Laudsang met, e kasalehda me e kin kihda kaweid kan me kin kadoadoahk ahnsou koaros! Paipel pein kasalehda: “Mahsen en Koht wie momour.”​—Ipru 4:12.

Ia duwe, soahng kan me Paipel mahsanih uhdahn mehlel? E wereilahr oh sohte katepe, de e wia pwuhk ehu me kin kihda kaweid me keieu mwahu oh katapan ong atail ahnsou, me wehwehki pwuhk ehu me wie momour? Kahn Iroir wet wia tepin oaralap tohrohr kan me pahn kohda. Kahrepen eh wiawihda iei en seweseiuk diarada pasapeng kan ong peidek pwukat.