Aramas tohto kin nda me re kamehlele Koht. Ahpw ma ke pahn idek rehrail ihs Koht, ke pahn alehdi soangsoangen pasapeng kan. Ong ekei, Koht wia sounkopwung lemei men, me ketin kupwurkihte kaloke aramas akan ong arail wiewia suwed kan. Ong ekei, e kin ketin ahnsou koaros limpoak oh mahk, sohte lipilipil dahme re kin wia. Pil meteikan kin kamehlele me Koht kin ketin dohsang aramas oh sohte kin ketin nsenohki kitail. Pwehki soangen madamadau pwukat, me tohto ele kin pehm me e apwal en esehla ihs Koht.

Ia duwe, e kesempwal en esehla ihs Koht? Ei, e kesempwal. En esehla mwahu Koht kak kalaudehla kahrepe oh wehwehn omw mour. (Wiewia 17:26-28) Uwen laud en omw karanihala Koht, ih uwen laud en eh pahn ketin poakohng oh seweseiuk. (Seims 4:8) Ni omw pahn esehla mwahu duwen Koht, met pahn imwikihla mour soutik.​—Sohn 17:3.

Ia duwen omw kak esehla Koht? Medewehla duwen emen me ke uhdahn ese, duwehte kompoakepahmw keren men. Ia duwen amwa wia kompoakepah eh kekeirda? Mwein ke esehla eden aramaso, soangen aramas dahmen ih, dahme e mwahuki oh sohte mwahuki, oh pil dahme e wiadahr oh koasoanehdi en wia, de pil soahng teikan. Ih soahng wet me kakerenihiukala rehn aramaso​—ke esehla duwen ih.

Pil duwehte, kitail kak esehla Koht sang ni atail pahn tehk peidek pwukat:

• IA EDEN KOHT?

• SOANGEN KOHT DAHMEN IH?

• DAHME KOHT KETIN WIADAHR?

• DAHME E PAHN KETIN WIA?

• IA KAMWAHUPEN OMW PAHN ESEHLA KOHT?

Kisin pwuhk wet wiawihda pwehn kihda pasapeng en Paipel kan ong peidek pwukat. Pwuhk wet pahn seweseiuk ken sukuhlki kaidehn ihte ihs Koht, ahpw pil ia duwen omw pahn paiekihda ni omw pahn kompoakepahnkihla ih.