Paipel kaidehn pwuhk en wini ehu. Ahpw mie kaweid loale me kak sewese aramas me kin lokolongki kahpwal en madamadau. Tehk ekei kaweid pwukat.

“Aramas roson sohte anahne toahkte, ahpw irail me soumwahu me anahne.”—MADIU 9:12.

Paipel kin pohnese me ele kitail pahn anahne rapahki sawas ong palien wini. Aramas tohto me ahneki soumwahu en madamadau kin alehdi sawas sang ni ar esehda dahme mehlel duwen ar kahpwalo oh sang ni ar kin tuhwong toahkte.

“Kaiahn en paliwar kin wia kamwahu.”—1 TIMOTY 4:8.

En wiewia soahng kan me kin kamwahwihala roson en paliweromw ele kak sewese kamwahwihala omw roson en madamadau. Wia soahng kan me duwehte kaukaule eksersais, kin kang mwenge roson oh meir mwahu.

“Ma ke pahn pereperen rahn koaros, ke pahn ahneki roson mwahu en paliwar. Nsensuwed ahnsou koaros paliweromw pahn luweluwetala oh mehla.”—LEPIN PADAHK 17:22.

En kin wadek iren Paipel kangoang kan oh wiahda mehn akadei kan me ke kak kapwaiada kak seweseiuk  en nsenamwahu. Ma ke kin medemedewe soahng mwahu kan nan mour oh kamehlele me soahng kan pahn mwahula ni ahnsou kohkohdo, met pahn seweseiuk en dadaur pahn omw kahpwal en madamadau.

“Me mpahi me loalokong.”—LEPIN PADAHK 11:2.

Mwein ke pahn diarada me ke sohte kak wia soahng koaros me ke pein men wia, kahrehda peki de ale sawas sang meteikan. Kompoakepahmw kan oh omw peneinei ele pahn men seweseiuk ahpw mwein re sehse dahme re pahn wia. Kehsehkin irail dahme uhdahn kak seweseiuk. Dehr kasik me re pahn wia soahng koaros ong uhk, oh ahnsou koaros kalahnganki dahme re kin sewesehkin uhk.

“I pehm me mie mehkot sapwung rehi, ngehi eri tuhwong toahkte men. Toahkteo kawehwehiong ie ei irairo. Met sewese ie en wehwehkihda uhdahn ei kahpwalo oh I esehda me mie ekei sawas en wini kan me kak sewese ei soumwahwo.”—Nicole, a me kin lokolongki soumwahu en bipolar disorder.

“I diarada me ei kin kaukaule iang ahi pwoudo wadek Paipel kin sewese ie en tepikihda ehuehu rahn madamadau pwung oh kangoang. Oh ni rahn akan me I kin nannanti en powehdi ei kahpwalo, ehu iren Paipel kin kalapw kangoange ie.”—Peter, me kin lokolongki soumwahu en nsensuwed.

“E kin apwal en padahkihong meteikan duwen ei kahpwalo pwehki I uhdahn namenek. Ahpw kompoakepahi keren men kin rong ie oh wehwehki ei pepehm. E uhdahn sewese ie en kin nsenamwahu oh pehm me I sohte kelekelehpw.”—Ji-yoo, me kin lokolongki soumwahu en sohte mwenge mwahu (eating disorder).

“Paipel kin sewese ie en kin toupahrek ong ahnsoun doadoahk oh kommoal. Erpit en Paipel kin sewese ie en powehdi pepehm me kin kahpwalih ie.”—Timothy, me kin lokolongki soumwahu en obsessive-compulsive disorder.