Mehn Suhs kan mahs kin masak soangen tokutok me kalapw wiawi ni mwehin Paipel. Soumwahu kamasepwehk wet kin kak kauwehla soangen selin paliwar me kin kehnda soahng kan oh kauwehla paliwar. Sohte wini ehu me kak kamwahwihala tokutok wet ahnsowo. Ahpw, irail kan me kin ahneki soumwahu wet kin katohrohrla oh anahne kin pakairkiong meteikan duwen ar soumwahwo.​—Lipai 13:45, 46.

Kaunen pelien lamalam en mehn Suhs kan medewehda en wiahda kosonned duwen tokutok me weksang douluhl dahme koasoandi nan Paipel, kahpwalihala mouren irail kan me ahneki soangen soumwahu wet. Karasepe, kosonned en sounpadahk en mehn Suhs kan kin keinapwidi aramas en dohsang emen me tokutok uwen piht 6 (2 m). Ahpw ma kisinieng kin ipihpdo limwahn emen me tokutok, aramas en dohsang ih uwen piht 150 (45 m). Ekei sounkawehwe en mehn Suhs akan kin kawehwehda me ni ahnsou me Paipel koasoanehdi me aramas tokutok kan kin kousoan “likin kahnimpwalo,” dene e kin wehwehki me re anahne mi likin kehl en kahnimw kan. Kahrehda, ni ahnsou me emen sounpadahk en mehn Suhs kilangada aramas tokutok men nan kahnimwo, e kin kostakai ih oh nda: “Kohkohlahsang wasaht, ke dehr kohdo kasaminehla aramas akan.”

Ia uwen met eh weksang sapwellimen Sises wiewia ong aramas tokutok! E sohte kausala me tokutok kan, ahpw e kupwurki sair irail oh pil kamwahwihala ar soumwahu.​—Madiu 8:3.

Mweipeseng wia ire ieu me irail kaunen pelien lamalam kan kin akamaiki ni mwehin tepin Kristian kan. Ihme kahrehda, ehu ahnsowo, Parisi kei song en lidipiheki Sises ar peidek ni ar kalelapak: “Ia duwe, atail Kosonnedo mweidohng ohl emen en mweisang eh pwoud pwehki kahrepe ieu sohte lipilipil?”​—Madiu 19:3.

Kosonned en Moseso mweidada ohl emen en mweisang eh pwoud ma e “diarada reh sapwung laud ehu.” (Deuderonomi 24:1) Ni mwehin Sises, mie wasahn sukuhl riau ong sounpadahk en mehn Suhs akan me ahneki madamadau me weksang wehwehn kosonnedo. Shammai, sukuhl me keieu kakos, kawehwehdi kosonnedo en wehwehki me ihte kahrepe pwung ong mweipeseng iei “tiahk samin,” me iei kamwahl. Sukuhl en Hilel, uhd pwungki me ohl emen kak mweisang eh pwoud sohte lipilipil ma kin mie saminimin nan pwopwoud, mehnda ma mehkot tikitik. Nin duwen sukuhlo, ohl emen pil kak mweisang eh pwoud ma eh pwoudo kasapwungehla kene mwengehn soutik de ma e diar emen lih me e masamwahukihsang eh pwoudo.

Eri, ia duwen Sises eh ketin sapeng en Parisi ko ar peideko? E mahsanih ni sansal: “Mehmen mweisang eh pwoud ni kahrepe ieu me kaidehn kamwahl, e ahpw pwoudikihda emen lih tohrohr, e wiadahr dipen kamwahl.”​—Madiu 19:6, 9.