Duwehte Koht eh wia Ngehn men, tohnleng kan pil wia ngehn soh sansal kei me sohte “mie uduke de tih.” Tohnleng loalopwoat kan kin mihmi nanleng oh ketiket mwohn Koht.​—Luk 24:39; Madiu 18:10; Sohn 4:24.

Ekei pak tohnleng kan kin wiahla paliwar uduk en aramas pwe re en kak kapwaiada pwukoa kan sang rehn Koht nin sampah oh ni arail kin kapwaiadahr arail pwukoa irail kin pwurehng wiahla ngehn.​—Sounkopwung 6:11-23; 13:15-20.

Mendahki tohnleng kan kin sansalda nan Paipel ni mwomwen ohl ekei oh ni ar kin wiahla aramas re kin wiahla ohl, sohte ohl de lih nanpwungarail. Irail sohte kin pwopwoudida oh wiahda seri. Pil patehng met, tohnleng kan sohte tepidahte wia aramas kei nin sampah, nin duwen seri pwelel men, de kisin seri men, de aramas laud men. Siohwa ketin kapikadahte tohnleng kan. Ihme kahrehda Paipel kin kahdaneki irail “sapwellime tohnleng kan.”​—Sohp 1:6; Melkahka 148:2, 5.

Paipel kin mahsanih duwen “lokaiahn aramas akan oh pil mahsen en tohnleng kan.” Met kin kasalehda me mie en ngehn kan lokaia oh re kin koasoi. Mendahki Koht ketin doadoahngki tohnleng kan en koasoiong aramas, eh sohte kupwurki kitail en kaudokiong de kapakapohng tohnleng kan.​—1 Korint 13:1; Kaudiahl 22:8, 9.

Mie tohnleng nen kei pak nen kei, ele pil lella meh lik kei. a​—Daniel 7:10; Kaudiahl 5:11, NW.

Tohnleng kan “kehlail oh manaman” sang douluhl aramas akan oh loalokong sang aramas. Irail kak mwekid marahra sang soahng sansal kan nin sampah wet.​—Melkahka 103:20; Daniel 9:20-23.

Mendahki arail loalokong oh manaman sang kitail, mie soahng kan me re sohte kak wia oh mie ekei soahng kan me re sehse.​—Madiu 24:36; 1 Piter 1:12.

Tohnleng kan kepikipikda en mie pein arail irair, ahneki sapwellimen Koht irair kan, oh saledek en pilipil. Duwehte aramas akan, irail pil kak pilada en wia me mwahu de suwed. E kansensuwed pwe ekei tohnleng kan pilada en uhwongada Koht.​—Sud 6.