I ipwidi nan kahnimw ehu me adaneki Saxony, me mahso kin adaneki German Democratic Republic (GDR). Soahng kan me kin wiawi ni imwato kin sansalkihda kadek oh limpoak, oh ei pahpa nohno padahkihong ie tiahk mwahu kesempwal kan. GDR wia wehin Communist ehu, eri ong pali laud en aramas akan nan Saxony sohte kin kesempwalki pelien lamalam. Oh ong ngehi, Koht sohte ieias. Soahng riau me kin kamwakid ei mour lao I lel sounpar 18, iei: ei sohte kin kamehlele me mie Koht oh palien Communist.

Dahme kahrehda I perenki koperment me adaneki Communist? Pwehki I mwahuki madamadau me aramas koaros duwepenehte. Laudsang met, I kamehlele me soahng koaros me aramas ahneki en kin nehnehpeseng rehn aramas akan pwehn kak pahrek, pwe met pahn kak kahrehda en sohte mie emen me uhdahn kepwehpwe oh semwehmwe. Eri I kin soupisengki iang pwihnen me pwulopwul me kin wiahki aramas koaros duwepenehte. Ni ahnsou me I sounpar 14, I kin doadoahngki ahnsou laud en iang wia doadoahk en kihpene tehn doaropwe mwahl kan. Kahnimw en wasao Aue, uhdahn kin kalahnganki ei doadoahk laud kahrehda irail me ahneki manaman wasao kihong ie nei kisinlikou en pweida ehu. Mendahki I pwulopwulte, I esehla ekei irail pwihnen lapalap en politik kan nan GDR. I pehm me mehn akadei kan me I wiewia me pwung oh I pahn paiamwahu ni ahnsou kohkohdo.

Mwuri, dahme I kin perenki ko sohla wiawi. Nan pahr 1989 dihd en Berlin kohdihsang oh pil pwihnen Communist nan palimesehn Iurop pil sohla. Mehkot kapwuriamwei kin wiawi ehu mwurinte ehu. Mwuhr I tehkada me wiewia sapahrek kin kalapw wiawi nan GDR. Karasepe, aramas akan me sohte kin utung palien Communist kin wia aramas sohte kesempwal kei. Ia duwen met eh kak wiawi? Kaidehn, ih soangen aramas pwukat me kin kamehlele me aramas koaros duwepenehte? Madamadau en palien Communist wiahte ouraman ehu? I tepida pwunodki met.

Eri I wekidala dahme I kin kesempwalkio oh uhd medewe duwen koul oh mahlen. Pwehki I kak kohla sukuhl ni wasahn sukuhlki koul, de mwuri keseula nan sukuhl laud ehu, I kin ouramanki ien wiahla emen sounwiahda koul. Patehng met, I kesehla tiahk mwahu kan me I sukuhlkihdi ni ahnsou me I wia kisin seri men. Dahme I keieu kesempwalki met iei en ahneki peren mwahl, me duwehte ieiangihseli ekei serepein ni ahnsoutehkis. Ahpw koul, mahlen oh ahneki mour saledek sohte katikala ei pwunod. Pil kilel kan me I kin mahlenihada  kin kasalehda ei kin masak soahng kan me pahn wiawi. Dahme pahn wiawihong ie ni ahnsou kohkohdo? Oh ia kahrepen mour?

I pwuriamweila ni ahnsou me I diarada pasapeng kan me I raparapahki. Ehu ni soutiko nan wasahn sukuhl laudo, I mwomwohd rehn pwihnen tohnsukuhl ehu me koasoakoasoia duwen ahnsou kohkohdo. Mandy a emen tohnsukuhl oh pil emen Sounkadehdehn Siohwa. Ni soutiko e kihong ie kaweid mwahu ehu. E nda: “Andreas, ma ke men diarada pasapengpen omw peidek kesempwal kan duwen mour oh ahnsou kohkohdo, tehk mwahu duwen Paipel.”

I sohte uhdahn kamehlele ahpw I pilada ien tehk pasapeng kan nan Paipel. Mandy ndaiong ie ien tehk Daniel irelaud 2 oh I uhdahn pwuriamweikihla dahme I wadeko. Kokohp wet kin kawehwehda irekidien wehi kan me kaunda sampah, koperment kan me kin kamwakamwakid laud sampah leledo atail ahnsou. Mandy pil kasalehiong ie ekei kokohp en Paipel me kin koasoia duwen ahnsou kohkohdo. Met I diarehr pasapengpen ei peidek kan! Ahpw ihs me ntingihedi kokohp pwukat, oh ihs me kak kohpada ni pwung duwen ahnsou kohkohdo? Ia duwe, Koht sou ketin ieias?

Mandy kapehseiong ie rehn Horst oh Angelika, pwopwoud ehu me iang Sounkadehde me sewese ie en wehwehki mwahu Mahsen en Koht. I mwadangete kasawihada me Sounkadehdehn Siohwa kan iei ihte pwihnen pelien lamalam me kin kalapw doadoahngki mwaren Koht Siohwa oh kin sewese meteikan en esehla met. (Melkahka 83:18; Madiu 6:9) I sukuhlki me Siohwa Koht ketikihong aramas akan koapworopwor en mour kohkohlahte nan paradais nin sampah. Melkahka 37:9, NW mahsanih: “Irail akan me kin koapworopworki Siohwa pahn sapwenikihla sampah.” Me kamwakid ie, iei me koapworopwor wet ritidahng aramas koaros me men mourki sapwellimen Koht kosonned kan ong wiewia kan me Paipel kawehwehda.

Ahpw, I kin apwalkihte wekidala soahng kan me I kin wia pwehn pahrekiong kaweid en Paipel. Ei kin pweida nin duwen emen sounwiahda koul kin kahrehiong ie ien pohnmwahso, eri I anahne sukuhlki ien aktikitikla mahs. Patehng met, e sohte mengei ien kesehla ei mour suwed. Ia uwen ei kalahnganki Siohwa eh ketin kasalehda kanengamah, mahk, oh wehwehki irail akan me kin song wia uwen arail kak en kapwaiada dahme Paipel kin padahngki!

Palien Communist oh madamadau me sohte Koht kin kamwakamwakid mwomwen ei mour sangete ei tikitik lao I lel sounpar 18. Ahpw mwurinte mwo kohdo, Paipel me kin kamwakamwakid oh kamwakamwahwihala mwomwen ei mour. Dahme I sukuhlkio sewese ien powehdi ei pwunodki duwen ahnsou kohkohdo oh sewese ien ese me mie kahrepen ei mour. Nan pahr 1993, I papidaisla nin duwen emen Sounkadehdehn Siohwa, oh nan pahr 2000, I pwoudikihda Tabitha, Kristian ngoang men. Se kin doadoahngki ahnsou laud ni uwen at kak koaros pwehn sewese meteikan ren esehla Paipel. Tohto me se kin tuhwong kin ahneki soangen mourohte me I ahneki mahso, me kin kamehlele palien Communist oh sohte kamehlele me mie Koht. I uhdahn nsenamwahukihla mehlel ni ei kin kasalehiong irail ia duwen arail kak esehla Siohwa.

Ni ahnsou me I tepida patehng Sounkadehdehn Siohwa kan, ei pahpa oh nohno uhdahn lingeringerkihda. Ahpw, sangete ahnsowo, ira kilang soahng mwahu kan me kamwakid ei mour ni ei kin patpatehng Sounkadehde kan. I kin perenki me met ira kin wadek Paipel oh iang towehda mihting en Kristian kan en Sounkadehdehn Siohwa kan.

Tabitha oh ngehi nsenamwahuki at mouren pwopwoud pwehki se kin song en idawehn ni keneinei kaweid kan sang nan Paipel ong me pwopwoud kan. Karasepe, kapwaiada kaweid kan duwen lelepek nan pwopwoud kin pousehlahte kakehlaka at mouren pwopwoud.​—Ipru 13:4.

Met I solahr kin masak duwen mour oh pwunodki duwen ahnsou kohkohdo. I pehm me I iang wia kisehn peneinei en Kristian ehu sampah pwon, me kin nsenamwahuki popohl mehlel oh miniminpene. Nan peneinei wet se kin wiahki kiht koaros duwepenehte. Ih met me I kin kamehlele oh men ahneki erein ei mour.