Don oh Margaret a perenki neira serepeino oh eh peneinei arail mwemweitla rehra. Ni kaimwiseklahn arail pahn mwengepene rahno, Margaret me kin doadoahk nin duwen sounkuk koahiek men mahso, wiahda kenerail macaroni oh cheese, mwenge ehu me nein nah serepeino kisin pwutak riemeno kin keieu iouki.

Ni koaros ar mwohndier, Margaret eri wahdo mwengeo oh kihdiong nanwerengen tehpelo. Ni eh pahkada pweinen einpwoato e mworusala pwehki e tehkada me ihte me mie nan einpwoato iei cheese karakar. Margaret manokehla en kapatahiong macaroni! b

Sohte lipilipil kitail sounpar depe de uwen atail koahiek, kitail koaros kin wiahda sapwung kan. Ele mwein sang atail sohte medewe mwohn atail nda mehkot de kitail wia mehkot mwahu ehu ahpw kaidehn ni ahnsou me konehng, de ele kitail manokehla mehkot ehu. Dahme kahrehda sapwung kan kin wiawi? Ia duwen atail kak apwalihala? Kitail kak soikala? Atail ahneki madamadau pwung ong sapwung kan pahn sewese kitail en sapengala peidek pwukat.

Ni ahnsou me kitail kin wia mehkot mwahu, kitail kin perenkihda ale kaping, oh ni meteikan ar pohnese kitail, kitail kin pehm me kitail warohng. Ni ahnsou me kitail wiahda sapwung ehu, mehnda ma kitail sohte medewehda en wia de meteikan sohte ese, kitail sou pwukoahki en wehkada sapwung kan me kitail wiahda? Pwehn wia met kitail anahne aktikitik.

Ma kitail kin medemedewehte pein kitail, ele kitail pahn song en katikala atail sapwung kan, kapwukoahki meteikan, de pil nda me kitail sohte wiahda sapwung. Soangen wiewia wet kin kalapw imwikihla soahng suwed kan. Kahpwalo sohte pahn kak kamwahula, oh meteikan pahn kakete uhd pwukoahkihdi wiewia sapahrek wet. Mehnda ma kitail pitsang atail sapwung kan ahnsou wet, kitail anahne tamataman me ni imwilah, “emenemen kitail uhdahn pahn wehkohng Koht duwen pein ih.”​—Rom 14:12.

Koht kin ketin sapwellimaniki madamadau pwung ong sapwung kan. Pwuhken Melkahka kin kasalehda Koht nin duwen “me kalahngan oh limpoak,” e “sohte kin kapwung aramas ahnsou koaros; e sohte kin engieng kohkohlahte.” E mwahngih me aramas akan sohte unsek oh ipwidihte ahneki luwet kan, “e pil ketin tamataman me kitail uhdahn pwehl.”​—Melkahka 103:8, 9, 14.

Laudsang met, duwehte pahpa limpoak kalahngan men, Koht ketin kupwurki kitail, sapwellime seri kan, en kin kilengwohng sapwung kan duwehte me e kin ketin wia. (Melkahka 130:3) Ni limpoak sapwellime Mahsen kin kihda peneu oh kaweid tohto pwehn sewese kitail en powehdi pein atail sapwung kan de ni ahnsou me meteikan kin wiahda sapwung.

Ni emen eh wiahda sapwung, e kin kalapw doadoahngki ahnsou laud oh eh kehl en kapwukoahki  meteikan de kihda kahrepe kan ong dahme e nda de wiahda. Ahpw, ma omw lokaia kan kin kansensuwedihada emen, ke sou uhdahte peki mahk, kapwungala sapwungo, oh kolokolete amwa nanpwungmwahu. Mie pak me ke wiahda mehkot sapwung oh kahrehda soansuwed de kamedekihala pein kowe de emen tohrohr? Sang ni omw sohte pahn nsensuwedkihla dahme ke wiahda de kapwukoahki meteikan, ke sou wia uwen omw kak pwehn kapwungala irairo? En ngihtehtehki me meteikan me wiahda sapwungo pahn kalaudehla soansuwed oh kalaudehla kahpwalo. Ahpw song en sukuhlki, kapwungala, oh wia dahme anahn.

Ahpw ni ahnsou me emen wiahda sapwung ehu, e uhdahn mengei ong kitail en mwekid ni ahl me kasalehda atail sapwungki met. Ia uwen eh pahn mwahu en kapwaiada sapwellimen Sises Krais kaweido ni eh mahsanih: “Kumwail wiahiong meteikan me kumwail kin anahne aramas akan en kin wiahiong kumwail.” (Madiu 7:12) Ni ahnsou me ke wiahda sapwung ehu, mehnda ma tikitik, ke uhdahn pahn men meteikan en kadekohng uhk de pil manokehla douluhl ahmw sapwungo. Eri, ke sou nantihong en kasalehda soangen kadekohte ong meteikan?​—Episos 4:32.

Ehu dikseneri kawehwehda me sapwung kan kin kohsang ni “pilipil sapwung, sohte dehdehki mwahu, de sohte nsenohki.” Kitail anahne pohnese me kin mihete ahnsou kan me aramas koaros pahn kin kasalehda ehu de tohtohsang soangen mwekid pwukat. Ahpw, sapwung kan pahn malaulaula ma kitail kin tehk ekei ire mehlel kan sang nan Paipel.

Ehu kaweid pwukat dierek nan Lepin Padahk 18:13, me mahsanih: “Rong mwohn omw pahn sapeng. Pwe ma soh, kowe aramas pweipwei oh kanamenek.” Ei, doadoahngki ekis ahnsou pwehn rong mahs dahme wiawio oh medewe dahme ke pahn sapengki, uhdahn pahn seweseiuk en dehr mwadangete koasoi de mwadangete mwekid. E uhdahn kesempwal ken rongorong oh wehwehkihla mwahu dahme wiawi pwe ken kak soikala pilipil sapwung oh wiewia sapwung ehu.

Pil ehu kaweid en Paipel mahsanih: “Kumwail wia uwen amwail kak pwe kumwail en ahneki popohl rehn aramas koaros.” (Rom 12:18) Wia uwen omw kak pwehn wiahda popohl oh minimin. Ni omw iang meteikan doadoahk, medewe irail oh wauneki irail oh nantihong en kin kapinga irail oh kangoange irail. Nan soangen wasa pwukat, koasoi pwurur kan oh wiewia kan kak mengeiong kitail en mahkohng de pohnsehsehla, oh kahpwal laud kan kak kapwungpwungla de kamwahula.

Kilang ma ke kak sukuhlki mehkot mwahu sang nan sapwung ehu. Sang ni omw sohte pahn raparapahki kahrepe kei ong dahme ke nda de wia, kilengwohng met nin duwen ahnsou mwahu en kakairada irair mwahu kan ong pein kowe. Ke kin anahne kalaudehla omw kasalehda kanengamah, kadek, de kaunda pein kowe? Ia duwen opampap, popohl, oh limpoak? (Kalesia 5:22, 23) Ke pil kak sukuhlki dahme ke sohte pahn wia mwuhr. Song en dehr medemedewehte pein omw pepehm. En ese kamwan uhdahn kak seweseiuk en katikala nanpwung suwed.

Ahneki madamadau pwung ong sapwung kan kak sewese kitail en powehdi oh kamwahwihala ni ahnsou me sapwung kan pwarada. Kitail pahn ahneki popohl oh pil rehn meteikan. Ma kitail nantihong en sukuhl sang atail sapwung kan, kitail pahn loalokongla oh aramas pahn perenkin kitail. Kitail sohte pahn nohn mwoarosala de pil medewehki mehkot suwed ong pein kitail. En pohnese me meteikan pil kin nantihong en powehdi arail sapwung kan pahn kahrehiong kitail en karanihala irail. Me keieu kesempwal, kitail kak paiekihda atail sukusukuhlki en kahlemengih sapwellimen Koht limpoak oh eh kin ketin mwadang mahkohng meteikan.​—Kolose 3:13.

Ia duwe, en Margaret sapwungo me kitail koasoiapenehr mwoweo kauwehla en peneineio ehupene? Soh douluhl. Irail koaros medewe duwen kemenkouruhr en met, ahpw keieu Margaret, oh irail pil iouki mwengeo, mendahki eh sohte macaroni! Sounpar kei mwuri, kisin pwutak riemeno koasoiaiong pein neira seri kan dahme wiawihong arail peneineio ahnsou me re mwengepene oh tamanda uwen kaperen en ahnsowo me irail mi rehn ara pahpa nohno kahlap. Pwe dahme wiawio, wiahte kisin sapwung kis!