NI MEHLEL, ni mwehin wahnpoaron Pohl, sohp kan sohte wiawihda ong pahsinse kan. Pwe aramas men en iang sohp seiloak, e anahne idek rehn emen ma e ese ma mie sohp en wa kepwe me pahn kohla wasa me e pahn seiloakla ie oh men alehda pahsinse. (Wiewia 21:2, 3) Mehnda ma sohp ehu sohte kohla uhdahn wasa me aramaso men kohla ie, ni sohpo eh uhdi wasa teikan erein seiloako, e kak doudi oh rapahki ehu sohp tohrohr me pahn wahla ih karanih wasa me e pahn seiloakla ie.​—Wiewia 27:1-6.

Soangen ahnsou keite nan sounpar ehu me sohp kan kin seiloak, oh re sohte kin idawehn ni pisetik koasoandi ong iahd me re pahn seiloak. Sehla kan kin kapwandehla arail pahn seiloak kaidehn ihte pwehki iren mesenleng suwed ahpw pwehki irail kin katieni, duwehte ma irail pahn rong ngilen menpihr toantoal men pohn selin serek en sohpo, de re kilangada sohp ehu me ohla pohn oaroahr ehu. Sehla kan pahn isaneki ahnsou mwahu en seiloak, eri ahnsou me mwekid en kisinieng pahn mwahu, irail pahn mweselda. Ni aramaso eh diarada sohp me e kak iang, e pahn kohla wasahn peidi en sohp kan wa eh kapang oh awih pakairpen ahnsou me sohpo pahn seiloak.

Emen soupoad me adaneki Lionel Casson nda: “Nan kahnimw en Rom, mie ehu wiepe me mengei ong aramas akan en diar sohp en seiloak, irail sohte anahne pein rapahki sohp kan. Wasahn peidi en sohp kan mi ni ewen Pillap Tiber. Nan kahnimw en Ostia, mie wasa laud ehu me aramas tohto kin tuhpene ie me ohpis kan kapilpene. Mie kompani en sohp kan sang soangsoangen wasahn peidi en sohp me ahneki tohtohn ohpis pwukat: Mie ohpis en kompani en sohp en Narbonne [me rahnwet adaneki France], kompani en Carthage [me rahnwet adaneki Tunisia] pil mie arail ohpis, . . . oh pil ohpis en kompani teikan. Emen me rapahki sohp pwehn iang seiloak anahne ihte kohla ni ohpis kan en ehuehu kahnimw kan me e lella ie.”

Iang sohp seiloak kin kamwadangahla ahnsoun seiloakla wasakis, ahpw e pil keper. Mie pak me sohp kan me Pohl iang kin ohla erein eh seiloak en misineri kan.​—2 Kor. 11:25.