EI MEN esehla padahk mehlel en Paipel kekeirda mwohn met eh wiawi. Ei nohno kin ale sawaspen Paipel kan, oh I uhdahn kin perenki audepen pwuhk pwukat, ahpw keieu kilel ko loale. Ei pahpao sohte men ei nohno en koasoiaiong ie soahng kan me e sukusukuhlki. Ahpw, I kin men ese duwen soahng pwukat oh pil idek peidek kan, eri e kin onop rehi ni ahnsou me ei pahpao sohte mi ni imwato. Pwehki met, I pil koasoanehdi me I men inoukihong Siohwa ei mour. I papidaisla Blackpool, England nan pahr 1943 ni ahnsou me I sounpar eisek.

Sangete ahnsowo, ngehi oh ei nohno kin kaukaule doadoahkpene nan kalohk. Se kin doadoahngki phonograph pwehn kasalehda dahme Paipel mahsanih. Phonograph kan kin laud oh toutouki mpen paun eisek. Medewehla ie, kisin pwutak kis ahpw weuwa met!

Ni ahnsou me I sounpar 14, I men wia doadoahk en pioneer. Ei nohno nda me I anahne koasoiong sounapwaliho me kin seiloak. Sounapwaliho ndaiong ie me I en song en ale doadoahk en mwohni pwehn apwalih ie nan  pioneer. Eri ih me I wia. Mwurin ei doadoahk sounpar riau, I koasoiong pil emen sounapwalih me kin seiloak duwen ei men pioneer. E nda, “Ahn mwahu, wia men!”

Eri, nan April 1949, ngehi oh ei nohno netikihla oh kisakiskihla kepwehn nan imwato me se kin rent oh keseula Middleton, karanih Manchester, wasa me se tepida pioneer. Mwurin sounpwong pahieu, I pilada emen brother en kin iang ie pioneer. Ohpis en Sounkadehdehn Siohwa kan ndaiong kiht en keseula nan ehu mwomwohdiso kapw nan Irlam. Ei nohno iang emen sister wia doadoahk en pioneer nan ehu mwomwohdiso tohrohr.

Mendahki I sounparte 17 ahnsowo, ngehi oh brothero me iang ie pioneer alehdi pwukoa en wia padahk kan nan mihting pwehki brother malaulau keite me koahiek nan mwomwohdiso kapwo. Mwuhr, I ale luhk en keseula ni mwomwohdisohn Buxton, me sounkalohk kan inenen malaulau oh anahne sawas. I kin ahnsou koaros kilangwohng dahme wiawihong ie ahnsou ko nin duwen kaiahn ong pwukoa kan me I kakete ale mwuhr.

Nan pahr 1951, I audehda doaropwehn iang Sukuhl en Paipel en Kilead. Ahpw, nan December 1952, I ale pahngok en kohla iang mahwen. I peki ien dehr iang sounpei pwehki I wia emen me kin doadoahngki pali laud en ei ahnsou nan kalohk, ahpw mwoalen kopwungo sohte men pohnese ei pekipeko oh re kihong ie nan imweteng erein sounpwong weneu. Erein ei mi mwo,  I alehdi luhk en iang Sukuhl en Kilead nempe 22. Eri nan July 1953, I dake sohp me adaneki Georgic, kohla New York.

Ni ahnsou me I lel wasao, I towehda mihting tohrohr en pahr 1953 (New World Society Assembly). I dake kisa kohla South Lansing, New York, wasa me sukuhlo mi ie. Pwehki I ahpwtehn pedoisang imweteng, sohte itar nei mwohni. Ni ei doudi sang kisao, I iangada bus ehu me pahn waiehla South Lansing, oh I anahne pekihda sens 25 sang emen me pil iang buso.

Sukuhl en Kilead kihda kaiahn mwahu pwehn sewese kiht en ‘wiahla soahng koaros rehn aramas koaros’ ni at wia at doadoahk en misineri. (1 Kor. 9:22) Kiht meh silimen me pekederla Philippines, ngehi, Paul Bruun, oh Raymond Leach. Se anahne awih sounpwong kei pwehn alehdi nait doaropwe (visa) pwe sen kak kousoan wasao. Se dake sohp erein rahn 47 kohla Philippines ni at kotehla Rotterdam, Sehden Mediderenien, Dahu en Suez, Sehden India, Malaysia, oh Hong Kong! Se lella Manila nan November 19, 1954.

Se tepida wiahda wekidekla kan pwehn ahnla aramas, sahpw, oh pil lokaia kapw. Ahpw, kiht meh silimeno pekederla nan mwomwohdiso ehu nan Quezon City me tohtohn aramas ako kin lokaiahki lokaiahn wai. Se esehlahte ekei lepin lokaiahn Tagalog mwurin sounpwong weneu. Ahpw pwukoa me se alehdi mwuhr pahn apwalihala kahpwal wet.

Ehu rahno nan May 1955 ni at lella imwato mwurin kalohk, ngehi oh Brother Leach diarada kisinlikou kei nan at pereo. Se esehda me se pahn wiahla sounapwalih kei me kin seiloak. I sounparte 22 ahnsowo, ahpw pwukoa wet kihong ie ahnsou mwahu en ‘wiahla soahng koaros rehn aramas koaros’ ni ahl kei me I saikinte ese.

Karasepe, I wia tepin ei kapahrek ong wehipokon nin duwen sounapwalih me kin seiloak mwohn sidohwa ieu. I esehda me e wia tiahk ehu nan Philippines ni ahnsowo me kapahrek ong wehipokon kin uhdahn wiawi wasa kan me aramas akan kin pokon ie! Ni ei mwemweitla nan ehuehu mwomwohdiso nan wasa me I seiloaklao, I kin wia padahk kan nan kisin ihmw kan me aramas kin pokonpene wie mwomwohd, ni wasahn netinet kan, mwohn ohpis en wehi kan, ni wasahn mwadong en basketball kan, nan wasahn mwemweit kan, oh kalapw ni keilen ahl kan nan kahnimwo. Ehu pak nan San Pablo City, keteu laud kahrehiong ie en sohte kak padahk ni wasahn netinet ehu, eri I ndaiong brother koahiek kan me I en wia padahko nan Wasahn Kaudok. Mwurin mwo, brother ko idek ma re kak ripohtki met nin duwen mihting ehu ong wehipokon, pwehki e sohte wiawi wasa me aramas kin pokon ie!

Se kin ahnsou koaros mi ni imwen riat Kristian kan. Imwarail ko kin ahnsou koaros mwakelekel mendahki ar tikitik. Pak tohto I kin meir nan lohs pohn taht. Wasahn duhdu kan sohte kin perperda mwahu, eri I esehla duhdu ni ahl ehu me meteikan sohte kak kilang ie. I kin seiloak dake soangen sidohsa kan me adaneki jeepney oh pil bus kan, oh ekei pak dake pwoht kohla deke teikan. Erein sounpar ko koaros me I papahki Siohwa, sohte pein werei sidohsa.

Ei kin wia doadoahk en kalohk oh mwemweitla ni mwomwohdiso kan sewese ie en esehla lokaiahn Tagalog. I sohte uhdahn ale kasukuhl en lokaiahn Tagalog, ahpw I esehla lokaiao ni ei kin rong riei Kristian kan ni at kin kalohk oh ni mihting kan. Riei Kristian ko kin men sewese ie en esehla lokaiao, oh I kalahnganki arail kanengamahiong ie oh pil arail koasoi ni mehlel.

Ni ahnsou douwehr powe, pwukoa kapw kan kahrehiong ie en pil wiahda wekidekla kan. Nan pahr 1956 ni ahnsou me Brother Nathan Knorr mwemweitdo, I alehdi pwukoa en apwalih soahng kan ni mihting tohrohro pwe en kak  pweida. I sohte koahiek en wia met, eri meteikan kasalehda arail men sewese ie en esehla. Kereniong sounpar ehu mwuri, pil ehu mihting tohrohr wiawi oh Brother Frederick Franz sang poasen kaun en Sounkadehdehn Siohwa kan me mwemweitdo. Ni ei wia sounapwalih en mihting tohrohro, I sukuhlkihsang Brother Franz eh kasalehda eh men wiahda wekidekla kan pwehn pahrekiong aramas en wasao. Riat Kristian ko wasao perenki ar kilang Brother Franz sehtki seht me adaneki barong Tagalog, ni ahnsou me e wia kapahrek ong wehipokon.

I anahne wiahda wekidekla kan ni ei ale pwukoa en wia sounapwalih me kin seiloak (district overseer). Ni ahnsowo, kereniong ahnsou koaros se kin kasalehda kasdohn The Happiness of the New World Society, ni likin ihmw kan nan wasa kan me aramas kin pokon ie. Ekei pak, amwise oh kisin mahn teikan kin kerempwa kiht. Kisin mahn ko kin perenki dengki en nait misihn en kasdo oh kin tengla loale. E kin wia doadoahk laud en kamwakelehda misihn en kasdo mwurin mwo! E sohte mengei en koasoanehdi ahnsoun kilang kasdo ko, ahpw I kin perenki ei kilang aramas ako ar esehda dahme sapwellimen Siohwa pwihn kin wiewia sampah pwon.

Padre en Kadolik kan iding ekei kaunen wasao en dehr kihong kiht mweimwei en wia mihting tohrohr kan. De re kin song en leser pehl kan en arail imwen sarawio ahnsou koaros me padahk ehu pahn wiawi karanih wasao pwe  aramas akan en sohte kak rong. Ahpw, doadoahko pousehlahte kekeirda, oh ahnsou wet, me tohto wasao wiahlahr sapwellimen Siohwa tohnkaudok kei.

Nan pahr 1959, I alehdi kisinlikou ehu me padahkihong ie me I alehdi pwukoa en papah ni ohpis en Sounkadehdehn Siohwa kan wasao. Met pil imwikihla ei esehla soahng tohto. Kedekedeo, I ale pwukoa en mwemweitla ni ohpis en Sounkadehdehn Siohwa kan nan sahpw teikan. Nan ehu ei seiloak ko, I tuhwong Janet Dumond, misineri men nan Thailand. Erein ahnsou ehu, se kin kapehsepene oh mwuhr se pwopwoudida. Se perenki at ehupene papah Siohwa nin duwen pwopwoud ehu erein sounpar 51.

I perenki ei mwemweitla rehn sapwellimen Siohwa aramas akan nan sahpw 33. Ia uwen ei kalahnganki me pwukoa kan me I wia mwoweo sewese ie en kaunopada ong pwukoa tohrohr kan en sewese soangsoangen aramas akan! Ei kin mwemweitla wasa pwukat kalaudehla ei madamadau ong soahng pwukat oh sewese ie en kilang ia duwen Siohwa eh kin ketin poakohng aramas koaros.​—Wiewia 10:34, 35.

E uhdahn kaperen en papah riatail Kristian kan nan Philippines! Sounkalohk kan ahnsou wet tohtohla sang ahnsou me I tepida papah wasao mpen pak eisek. Ngehi oh Janet pousehlahte doadoahk nan ohpis en Sounkadehdehn Siohwa kan nan Quezon City, Philippines. Mendahki e dauliher sounpar 60 ei papah nan sahpw tohrohr ehu, I anahnehte onopada ong wekidekla kan ong dahme Siohwa ketin kupwurki. Wekidekla kapw kan nan sapwellimen Siohwa pwihn kangoange kitail en materek ong atail kin papah Koht oh riatail Kristian kan.

Se kin nantihong en alehdi soahng koaros me se leme me iei kupwuren Siohwa, oh met wia elen mour ehu me kin kahrehiong kiht nsenamwahu laud. Se pil song en wiahda wekidekla kan me anahn oh papah riat Kristian kan. Ei, se kin koasoanehdi teng, sohte lipilipil ia uwen werei me Siohwa ketin kupwurki, en wiahla “soahng koaros rehn aramas koaros.”