Ia Duwen Omw Pahn Wiahiong Omw Onop en Paipel en Kaperenla oh Pweida Mwahu

PLAY

SOSUA anahne kahluwa wehin Israel ong nan Sapwen Inowo. Pwukoa wet pahn uhdahn apwal. Ahpw Siohwa ketin kakehlaka oh kangoange ih, mahsanih: ‘Ke en kehlail oh kommwad. Kapwaiada kosonnedo pwon. Pwuhken Kosonnedo pahn kin wadawad nin rahn oh nipwong, oh kanahieng soahng koaros me ntingdier loale. Eri, ke ahpw pahn kepwehpwehla oh pweida.’—Sos. 1:7, 8.

Kitail kin mi nan “ahnsou apwal oh keper” ehu, oh atail mour pil kak apwal. (2 Tim. 3:1) Ma kitail men pweida duwehte Sosua, kitail anahne idawehn sapwellimen Siohwa kaweid me e ketikihong Sosua. Kitail anahne kaukaule wadek Paipel oh doadoahngki dahme kitail sukuhlki pwehn wiahda pilipil mwahu kan.

Ahpw ekei kitail mwein sohte nohn ese ia duwen atail en wia atail onop, de mwein kitail sohte kin perenki onop. Ahpw onop Paipel uhdahn kesempwal. Ni omw pahn tehk sapahlih kakon me oaralape “ Song Wiepe Pwukat,” ke pahn kilang ekei iren sawas kan me pahn sewese kalaudehla omw paiekihda oh perenki omw onop.

Sounmelkahkao koulki: “Komw ketin kahluwa ie nan ahl en sapwellimomwi kosonned kan pwe iei met me I kin diarki ei nsenamwahu.” (Mel. 119:35) Ke pil kak diar nsenamwahu laud ni omw kin onopki mwahu Mahsen en Koht. Ke pahn diar soahng kaselel tohto ni omw pousehlahte onopki Paipel.

Mendahki ke sohte anahne kahluwa wehi laud ehu duwehte me Sosua wia, pil mie pein omw kahpwal kan. Eri, duwehte Sosua, onopki Mahsen en Koht oh peikiong. Ma ke wia met, ke pahn wiahda pilipil loalokong kan oh pil pweida mwahu.

SONG WIEPE PWUKAT

Kapakap mwohn omw onop. Paipel audaudki kupwuren Koht wasa lapalap. E ketikihda Paipel pwehn wia kamwahupomw. Eri ni omw wadek Paipel, peki sapwellime sawas pwe ken wehwehki, tamatamante, oh doadoahngki pwehn wiahda pilipil mwahu kan nan omw mour.—Esra 7:10.
Pein idek rehmw peidek kan ni omw wadek Paipel oh sawaspen Paipel kan. ‘Dahme ire wet padahkihong ie duwen Siohwa? Ia duwen ire wet eh utungada oaralap en sapwellime Mahsen? Ia duwen ei kak doadoahngki ire pwukat pwehn sewese meteikan?’
Doudouloale dahme ke onopki. Uhdi wadawad oh medemedewe dahme ke wadeko. Pein idek rehmw: ‘Ia duwen ire wet eh kamwakid ie? Dahme kahrehda I ahneki soangen pepehm wet? Ia duwen met eh pidada dahme wiawihong ie mahso, dahme wiewiawihong ie met, de dahme pahn wiawi ahnsou kohkohdo? Ia duwen ei kak doadoahngki kaweid oh ire mehlel pwukat sang nan Paipel nan ei mour?’ (Sohp 23:5; Mel. 49:3) Ni omw kin doudouloale mepwukat, kilang ma ke kak kawehwehda dahme kahrehda Siohwa ketin kangoange sapwellime aramas akan ren soikala soangen tiahk kei. De medewehla dahme pahn wiawi ma aramas me ke wadewadek duwe wiahda soahng kan me weksang sapwellime koasoandi kan.—Deud. 32:28, 29.
Doadoahngki omw madamadau ni omw wadek duwen koasoipen mwekid ehu. Karasepe, ke kak medewehla ahnsou me rien Sosep pwutak ko netikihla ih ong mehn Ismael ko? (Sen. 37:18-28) Dahme ke kilang, rong, de ned ni omw medewehla ahnsowo? Medewehla ma kowe emen irail. Dahme re medemedewe oh ia arail pepehm ahnsowo? Soangen madamadau pwukat pahn kahrehiong omw onopo en uhdahn sansal oh audapan.
Doadoahngki mehn sawas kan me wiawihda pwehn kamwahwihala omw kin wia roporop. Ahnla doadoahngki mehn sawas kan me mieier ni omw lokaia, nan Internet oh pil me wiawihda nan pwuhk kan. Dehr pweiek en peki sawas sang meteikan ren seweseiuk en esehla ia duwen omw kak doadoahngki mepwukat ni koahiek. Karasepe, Watch Tower Publications Index (lokaiahn wai) de Sawas ong Wia Roporop en Sounkadehdehn Siohwa kan, pahn seweseiuk ken diarada dahme ntingdier ong oaralap tohto, oh pil wehwehn iretikitik tohto nan Paipel. Doadoahngki kisin pwuhk me adaneki Sawas ong Onopki Mahsen en Koht, me kin kihda ire kesempwal kan me pid map kan, irekidi en ahnsou kan, mehn teneki dipwisou kan, mehn sosohng kan, oh pil soahng teikan.
Oaralapihada ire kesempwal kan sang nan omw onopo pwehn seweseiuk tamataman dahme ke onopki. Mwahusang met, ehukihong meteikan dahme ke onopki. Ia duwe, mie soahng ehu me ke kak doadoahngki nan kalohk? Ni omw wia mepwukat, ke sohte pahn ihte tamataman ire kesempwal kan, ahpw ke pil pahn doadoahngki dahme ke onopkio pwehn sewesehki meteikan.