I ipwidi nan Netherlands nan pahr 1948. Sounparo mwuri, ei peneineio keseula São Paulo nan Brazil. Pahpa oh nohno kin kaukaule iang sarawi, oh nin duwen peneinei ehu, se kin kalapw wadek Paipel mwurin mwengehn soutik kan. Nan 1959, se uhd keseula nan Wehin Amerika oh kousoanla nan Massachusetts.

Pahpa kin doadoahk laud pwehn apwalih at peneineio. Kiht meh welimen. Erein sounpar tohto, e kin seiloakseli oh netiki kepwe, iang wiahda ahl, oh pil doadoahk ong kompani en sompihr ehu oh netiki arail kepwe kan. Kiht koaros perenkihda eh tepida doadoahk ong kompani en sompihro, pwehki met kahrehiong kiht en kak seiloakseli.

Ni ahnsou me I iang pwihn keduwau lel kaeisek riau, I kin kalapw medewe, ‘Dahme I men wiahla ni ahnsou me I laudla?’ Ekei iengei tohnsukuhl ko pilada en iang sukuhl laud, oh ekei pilada en iang sounpei. Ahpw pwehki I sohte mwahuki akamai oh pei, I sohte men iang sounpei. I pilada en iang sukuhl laud pwe I en dehr iangala sounpei. Ahpw ni mehlelo, I men sewese meteikan, pwehki I medewe me met pahn kahrehiong ei mour en mie katepe.

Nan sukuhl laudo, I perenki sukuhlki duwen mouren aramas oh tiahk kan, pwehki I men ese ia duwen mour eh miehla. Se sukuhlki duwen padahko me dene mour pein miehla, oh sounpadahk ko men sen kamehlele me met mehlel. Ahpw arail kawehwe padahko sohte dokpene de mehlel, oh mwomwen me I anahne kamehlele mendahki sohte mehn kadehde.

Kasukuhl kan me I ale nan sukuhlo sohte padahngki duwen kaweid kan me pid dahme pwung oh dahme sapwung. Ahpw re kasukuhliong kiht en wia uwen at kak pwehn pweida nan sukuhlo. I perenki iang iengei ko mwemweit oh doadoahngki wini en kasahliel kan, ahpw soangen peren wet sohte mihmi werei. I kin medewe, ‘Soangen mour wet mie katepe?’

Mwuhr I keseula nan kahnimw en Boston oh tepida iang ehu sukuhl laud ko wasao. Pwehn pwain pweinen ei sukuhlo, I alehdi doadoahk ehu ni ahnsoun kommoal en sukuhl, oh ih wasao me I tepin tuhwong Sounkadehdehn Siohwa kan. Emen tohndoadoahk ko koasoiaiong ie duwen kokohpo nan Daniel irelaud 4 me pid “sounpar isuh” oh kawehwehda me kitail mihmier ni ahnsoun imwio. (Dan. 4:13-17) I mwadang esehda me ma I mweidohng sen doulahte koasoia duwen Paipel oh uhdahn kamehlele, I pahn anahne wiahda wekidekla kan. Eri I kin wia uwen ei kak en pohnsehse ih.

Nan sukuhl laudo, I ale kasukuhl kan me pahn kaiahne ie ong doadoahk en sawas kan nan Palieir en Amerika. I medewe me en sewese meteikan ni ei wia soahng mwahu kan ong aramas me anahne sawas, met pahn kahrehiong ei mour en mie katepe. Ahpw mwuhr I esehda me met pil sohte wiahiong ei mour en mie katepe. I nsensuwedkihla met oh uhdihsang iang sukuhl ni kaimwiseklahn pahr en sukuhlo.

Nan May 1970, I keseula Amsterdam nan Netherlands, oh doadoahk ong kompani en sompihrohte me ei pahpao doadoahk ong. Pwehki doadoahk wet, I kak seiloakla wasa doh kan, duwehte sapwen Aperika, sapwen Amerika kan, Iurop, oh Eisia. I pil esehda mwuhr me sohte lipilipil sahpw dah I mwemweitla ie, koaros ahneki kahpwal laud kan oh mwomwen me sohte me kak kamwahwihala. Ahpw I kin inengiengete en wia mehkot me kesempwal nan ei mour, eri I pilada en pwurala nan Wehin Amerika oh pil pwurehng iang sukuhl laudohte me I iang nan Boston.

Ahpw sohte pwand, I esehda me kasukuhl kan me I aliale sohte sewese ie en diar pasapengpen peidek kan me I ahneki duwen mour. I sehsehla dahme I pahn wia, eri I peki kaweid sang rehn emen ei sounpadahk ko. I pwuriamweikihla eh nda: “Pwe dahme ke iangaiangkihte sukuhl? Ke seu uhdi met?” I perenki eh kaweido kahrehda I uhdihsang iang sukuhl.

Pwehki I ahnekihte pepehm me sohte katepen ei mour, I iangala pwihn ehu me sohte kin idawehn tiahk en wehi oh mwomwen kin kehlailki duwen meleilei oh limpoak. Ngehi oh ekei iengei ko seiloak pidakih Wehin Amerika oh kohdihla Acapulco nan Mexico. Se mihmiseli rehn pwihnen aramas kei me sohte kin idawehn tiahk oh koasoandi kan me pali laud kin idawehn, oh kin mwomwen mourki mour me sohte mie kahpwal oh kapwunod. Ahpw  ni ei kousoan rehrail, I diarada me mwomwen arail mour pil sohte nsenamwahu oh sohte mie katepe. I kilang me tohtohn irail sohte kin mehlelpene oh loalopwoatpene.

Erein ahnsowo, I tepida pwurehng medemedewe soahng ehu me I men wia sangete ei tikitik. I men dake sohp serek oh wiahla kapden men, kaidehn sehla men. Ihte ahl me I en wia met iei en pwainda pein werei sohp serek. Emen kompoakepahi me adaneki Tom pil men wia met, eri se koasoanehdi en pidakih sampah pwon dake sohp serek. I men diarada deke ehu me duwehte paradais pwe ien mi dohsang kosonned en wehi kan.

Ngehi oh Tom seiloakla Arenys de Mar, karanih Barcelona, Spain. Se pwainda sohp serek ehu wasao me reireiki piht 31. Eden sohpo Llygra. Se tepida kamwahwihala sohpo pwe sen kak seiloak mwahu nansed. Pwehki se sohte karuwaru en lella wasa kan me se koasoanehdi en lella ie, se kihsang misihn en sohpo oh uhd doadoahngki wasao pwehn pil nekidala nimat pihl. Pwe sen kak katanga warato oh wetseli nan wasahn peidi en sohp tikitik kan, se pwainda padil riau me reireiki piht 16. Kedekedeo, se tepida seiloak kolahng sapwen Seychelles nan Sehd en India. Se pilahn en keid limwahn sahpw kan ni palikapi en Aperika oh pidakih wasa me adaneki Cape of Good Hope ni Palieir en Aperika. Se doadoahngki usu kan, ekei map, pwuhk kan, oh kaweid mengei kan pwehn sewese kaweid kiht ni pwung en lella wasa kan me se men lella ie. I pwuriamweikihla at kak kasawihada wasa kan me se mi ie nansedo.

Ahpw sohte pwand, se esehda me warat sohp meringo sohte kak seiloak mwahu nansed. Se diarada me mie pwoahr ni sohpo, oh kereniong kalon en pihl 6 kin kusolong loale! Duwehte ei koasoia nin tapio, kisinieng laud wiawi ahnsowo oh I masepwehkada oh tepida kapakap. Erein sounpar tohto, ih ehdin ei pahn kapakap, oh I inoukihong Koht me ma se pitla, I pahn song en esehla ih. Kisinieng laudo uhdi oh mwurin mwo, I kapwaiada ei inowo.

I tepida wadek Paipel erein at seiseiloak nansedo. Medewehla uwen kansenamwahu en mwohd pohn sohp ehu nan Sehd en Mediderenien, kilikilang mwahmw pihr, laidenki kan, oh kilekilangwei wasa doh. Nipwong kan, I kin perenki kilengdalahng mwutumwut en usu kan, Milky Way, oh met kalaudehla ei kamehlele me mie Koht emen me kin ketin nsenohki kitail aramas.

Mwurin wihk kei nansed, se peidi ni wasahn peidi en sohp kan nan Alicante, Spain, wasa me se men netikihla warat sohpo oh alehda ehu me mwahusang. E sohte kapwuriamwei me e apwal en diarada emen me men pwainda sohp serek ehu me mering, mie pwoahr, oh sohte misihn. Ahpw met wia ahnsou mwahu ehu en wadek nei Paipelo.

Uwen laud en ei wadek Paipel, e kahrehiong ie en wiahki Paipel pwuhken kaweid ehu me kak sewese kitail en pweida nan mour. I mwekidki dahme Paipel mahsanihki duwen en mourki mour mwakelekel, oh I medewe dahme kahrehda aramas tohto, pil ngehi, wiahkin irail Kristian kei ahpw kin pohnsehsehla dahme e mahsanih.

I koasoanehdi teng en wiahda wekidekla kan nan ei mour, kahrehda I uhdihsang doadoahngki wini en kasahliel kan. I medewe me uhdahn mie aramas akan me kin kapwaiada ire mehlel oh kaweid  kan en Paipel, oh I men tuhwong irail. Eri I kapakap ong Koht en sewese ie en diar irail. Met iei keriapak en ei kapakap.

I leme e mwahu en kihong ahnsou en kasawih ehuehu pelien lamalam kan lao I diarada kaudok mehlel. Ni ei alialu pohn ahl en Alicante, I kilang imwen sarawi tohto. Ahpw pwehki mie sansal ni pali laud en imwen sarawi pwukat, I ese me kaidehn kaudok mehlel kei me.

Mwurin souwas en Rahn Sarawi ehu, I mihmi pohn kumwukumw ehu, kilikilengdilahng wasahn peidi en sohp kan. I wadewadek Seims 2:1-5 me koasoia duwen atail en dehr kesempwalkihte me kepwehpwe kan. Ni ei pwurupwuralahng warat sohpo, I daulih wasa ehu me mwomwen aramas kei wia arail kaudok, oh mie sain ehu ni wenihmwo me nda: “Wasahn Kaudok en Sounkadehdehn Siohwa kan.”

I medewe, ‘I pahn kasonge pwihne oh kilang dahme irail pahn wia.’ Ngehi eri pedolongala nan Wasahn Kaudoko adasi, alis, oh likawih rausis tei. Sounsawaso kahreiehla en mwohndi limwahn lih mah men me ni kadek sewese ie en iang kilang iren Paipel kan me me wia padahko kin nda. Mwurin mihtingo, I uhdahn pwuriamweikihla uwen kadek en koaros me kohdo oh kasamwo ie. Emen ohl luke ie en kohla ni imweo pwe sen koasoiapene Paipel, ahpw pwehki I saik kanekehla ei wadek Paipel, I ndaiong, “I nek ndawei iahd me I pahn kohwei.” Mwuhr, I tepida towehda mihting kan koaros.

Mwurin wihk kei, I mwemweitla rehn ohlo ni imweo oh e sapengala ei peidek kan duwen Paipel. Wihk ehu mwuhr, e kihong ie ehd ehu me diren likou uhdahn mwahu. E ndaiong ie me aramas me ahneki likou ko mi nan imweteng pwehki e kapwaiada kehkehlik en Paipelo me kitail en limpoakpene oh dehr sukuhlki en mahwen. (Ais. 2:4; Sohn 13:34, 35) Met I uhdahn kamehlele me I diaradahr dahme I raparapahki, me iei aramas akan me kin kapwaiada dahme Paipel mahsanih duwen en ahneki mour mwakelekel! I solahr akadeiong en rapahkihda deke ehu me duwehte Paradais ahpw en kalaudehla ei onopki Paipel. Eri, I pwurala Netherlands.

I seiloangki rahn pahieu pwehn lella kahnimw en Groningen nan Netherlands. I anahne rapahkihda ei doadoahk pwehn apwalih ie. Nan ehu wasahn kapinte, ehu peidek me mi nan doaropweo me I audehda idek mehnia pelien lamalam me I kin iang. I ntingihedi, “Sounkadehdehn Siohwa kan.” Ni ahnsou me me ahneki wasao wadek, I kilang me pohn meseo wekila. E nda, “I pahn koahl uhk.” Ahpw e sohte koahl ie.

 Pil ehu wasahn kapinte, I idek rehn me ahneki wasao ma e anahne sawas. E idek rehi ma mie nei mehn kadehde me I kanekehla sukuhl oh pil doadoahk wasa teikan. I kawehwehiong me I ekis wia doadoahk en kamwahwihala sohp serek ehu. I pwuriamweila ni eh pil nda: “Ke kak tepida mwurin souwas, ihte ma ke sohte wia met. I sohte men ken kahrehda kahpwal wasaht pwehki ngehi emen Sounkadehdehn Siohwa oh I kin nantihong kapwaiada kaweid en Paipel.” I uhdahn pwuriamweila oh nda, “Pil ngehi!” Mwein pwehki piten moangei oh ei alis reirei, e nda, “Mwahu, mwuhr I pahn onop Paipel rehmw!” I iang pwungki. E sansal dahme kahrehda kaun en wasahn kapinte teio sohte koahl ie. Met kasalehda me Siohwa ketin sapengala ei kapakap. (Mel. 37:4) I doadoahk rehn brothero erein sounpar ehu. Erein ahnsowo, se onopki Paipel oh mwuhr, I papidaisla nan January 1974.

Sounpwong ehu mwuhr, I tepida wia doadoahk en pioneer, oh met kihong ie peren laud. Nan sounpwongo mwuri, I keseula Amsterdam pwehn iang sewese pwihnen kalohk kapw ehu me kin lokaiahki lokaiahn Spain. I uhdahn perenki wia onop en Paipel kan ni lokaiahn Spain oh Portugal! Nan May 1975, I alehdi pwais kaselel en wia emen pioneer tohrohr.

Ehu rahno, sister men me wia emen pioneer tohrohr kohdo iang towehda at mihtingo pwe nah tohnsukuhl en Paipelo, me kohsang Bolivia, en tuhwong riat Kristian kan me kin lokaiahki lokaiahn Spain. Ngehi oh Ineke koasoanehdi en nting kisinlikoupene oh esehla emenemen, oh ni at wia met, se esehda me at mehn akadei kan duwepenehte. Se pwopwoudida nan 1976 oh pousehlahte papah nin duwen pioneer tohrohr kei lao lel 1982 ni ahnsou me se alehdi luhk en iang Sukuhl en Kilead kaisihsek siluh. Se uhdahn pwuriamweila oh perenkihda at pekederla Palimese en Aperika oh papah nan Mombasa, Kenya, erein sounpar 5! Nan 1987, se pil pekederla Tanzania, wasa me atail doadoahk en kalohko keinapwidi ahpw sohla. Se papah wasao erein sounpar 26 mwohn at pwurala Kenya.

En sewese aramas akan me kin kalahnganki padahk mehlel en Paipel kin kahrehiong at mour en uhdahn mie katepe. Karasepe, tepin nei tohnsukuhl en Paipel nan Mombasa iei emen ohl me I tuhwong ni ei kalohk nan wehi pokon. Mwurin eh ale makasihn riau, e idek, “Ma I neksang kisin pwuhk ka, dahme I pahn wia?” Wihk ehu mwurin mwo, se tepida onopki Paipel doadoahngki pwuhken Ke Kak Mour Kohkohlahte Nan Paradais Nin Sampah, me ahpwtehn wiawihda ni lokaiahn Swahili. Sounpar ehu mwurin mwo, e papidaisla oh wiahla emen pioneer. Sangete ahnsowo kohdo, ih oh eh pwoudo sewesehier aramas kereniong 100 en inoukihong Siohwa arail mour oh papidaisla.

Ni ahnsou me I tepin wehwehkihla kahrepen atail mour, I pehm me I duwehte sounneto me diarada perl kesempwal ehu oh sohte men luhssang. (Mad. 13:45, 46) I men doadoahngki ei mour en sewese meteikan diarada mour me mie katepe. Ngehi oh ei pwoudo kin kilang duwen Siohwa eh kin ketin kapaiahda sapwellime aramas akan oh kahrehiong arail mour en uhdahn mie katepe.