Nan soangen irairo, mwomwohdiso pahn kilengwohng eh pwopwoud en mwoweo me e imwiseklahr ni ahnsou me ohlo pwurehng pwopwoudida, oh pahn wiahki eh pwopwoudida met manamanlahr. Pwehn wehwehki kahrepen atail nda met, kitail pahn koasoiapene dahme Sises mahsanihki duwen mweipeseng oh pwurehng pwopwoudida.

Nin duwen me Madiu 19:9 kasalehda, Sises mahsanih me kahrepe ehute me pwopwoud ehu kak mweipeseng. E mahsanih: “Mehmen me mweisang eh pwoud lih me sohte wiahda tiahk samin me pid wia nsenen pwopwoud oh pwoudikihda emen tohrohr, e kamwahl.” Sang dahme e mahsanih, kitail sukuhlki (1) me tiahk samin me pid wia nsenen pwopwoud iei kahrepeohte me pwopwoud ehu en kak mweipeseng oh (2) me ohl emen me mweisang eh pwoudo ni kahrepe ehu me sohte poahsoankihda Paipel oh pwoudikihda emen tohrohr, e kamwahl. *

Ia duwe, dahme Sises mahsanih kin wehwehki me ohlo me wiahda tiahk samin me pid wia nsenen pwopwoud oh mweisang eh pwoudo, ahneki saledek en pwurehng pwopwoudida? Soh. Ma ohlo kamwahl, eh pwoudo me sohte wiahda sapwung kak pilada ma e pahn mahkohng de soh. Ma liho sohte mahkohng oh ira mweipeseng, ira koaros ahneki saledek en pwurehng pwopwoudida mwurin ara mweipesengo manamanla.

Ele liho me sohte wiahda sapwung men pwopwoudte oh ele men mahkohng eh pwoudo. Ahpw, ia duwen ma ohlo me kamwahl sohte nsenohki en eh pwoudo men mahkohng ih oh wiahda doaropwehn mweisang ih ni liho eh sohte pwungki? Pwehki liho men mahkohng ih oh men ira en pwopwoudte, ohlo sohte ahneki saledek en pwoudikihda emen tohrohr. Ma ohlo pilada en pwoudikihda emen tohrohr mendahki e sohte ahneki saledek en wia met, eri e pwurehng kamwahl. Elder kan nan mwomwohdiso anahne pwurehng tuhkipene ireo oh apwalihala sapwung me e wiahdao.​—1 Kor. 5:1, 2; 6:9, 10.

Ni ohl emen eh pwurehng pwopwoudida ni eh sohte ahneki saledek en wia met, ia duwen mwomwohdiso eh pahn kilengwohng eh pwopwoud en mwoweo oh eh pwopwoud met? Nin duwen me Paipel mahsanih, eh pwopwoud en mwoweo manamante? Ia duwe, liho me sohte wiahda sapwung kak piladahte en mahkohng eh pwoudo de soh? Mwomwohdiso pahn wiahki ahn ohlo eh pwurehng pwopwoudida tiahk en kamwahl ehu?

Mahso, mwomwohdiso kin wiahki ahn ohlo eh pwurehng pwopwoudida tiahk en kamwahl ma liho me sohte wiahda sapwung momourte, sohte pwurehng pwopwoudida, oh sohte wiahda tiahk samin me pid wia nsenen pwopwoud. Ahpw sohte mehkot me Sises mahsanihki duwen meno me sohte wiahda sapwungo ni ahnsou me e mahsanih duwen mweipeseng oh pwurehng pwopwoudida. Sises ketin kawehwehda me ohl emen me  mweisang eh pwoudo ni kahrepe ehu me sohte poahsoankihda Paipel, oh pwurehng pwopwoudida, e kamwahl. Nan soangen irairo, mweipeseng oh pwurehng pwopwoudida, me Sises mahsanih duwehtehte kamwahl, kaimwiseklahr pwopwoud en mwoweo.

Ni ohl emen eh mweisang eh pwoudo oh pwurehng pwopwoudida, eh pwoud en mwoweo me sohte wiahda sapwung, solahr kak pilada en mahkohng de soh. E solahr anahne pwunodki ma e anahne pilada en mahkohng de soh. Patehng met, mwomwohdiso pahn wiahki pwopwoud kapwo manamanlahr nin duwen kosonned, sohte lipilipil ma liho me sohte wiahda sapwung mehla, de pwurehng pwopwoudida, de wiahda tiahk samin me pid wia nsenen pwopwoud. *

Nan karasaras me kitail koasoia mwoweo, ohlo kamwahl oh ira mweipeseng. Ahpw ia duwen ma ohlo sohte kamwahl ahpw mweisang eh pwoudo oh pwurehng pwopwoudida? De ia duwen ma ohlo sohte wiahda tiahk samin me pid wia nsenen pwopwoud mwohn ira mweipeseng, ahpw e wia met mwurin ara mweipeseng oh pwoudikihda emen tohrohr mendahki eh pwoud en mwoweo men mahkohng ih? Nan soangen irair pwukat koaros, eh mweisang eh pwoudo oh pwoudikihda emen tohrohr, me iei kamwahl, kaimwiseklahr eh pwopwoud en mwoweo. Eh pwopwoudida met manamanlahr nin duwen kosonned. Kahn Iroir (lokaiahn wai) en November 15, 1979, pali 32 koasoia: “Met e pwurehng pwopwoudida oh e sohte kak uhdahte kesehla oh pwuralahng eh pwoud en mwoweo; eh pwopwoud en mwoweo imwiseklahr pwehki mweipeseng, kamwahl, oh pwurehng pwopwoudida.”

Pwehki dahme kitail wehwehki mwoweo wekila, met sohte wehwehki me Kristian kan en medewe me pwopwoud solahr wia mehkot sarawi de me tiahk en kamwahl solahr wia dihp laud ehu. Ni ohl emen eh mweisang eh pwoudo pwehki kahrepe ehu me sohte poahsoankihda Paipel, oh pwoudkihla emen tohrohr ni eh sohte ahneki saledek en wia met, elder kan anahne koasoanehdi pwihn en elder me pahn apwalihala dihp laud me e wiahdao. (Ma lih me e pwoudkihda mwuhro wia emen Kristian, liho pil anahne tuhwong pwihn en elder me kin apwalihala dihp laud pwehki e wiahda dipen kamwahl.) Mendahki mwomwohdiso sohte pahn wiahki en ohlo pwopwoud kapwo tiahk en kamwahl ehu, ohlo sohte kak ale pwukoa tohrohr kan nan mwomwohdiso erein sounpar tohto, oh e pil sohte kak ale pwukoa tohrohr mwohn meteikan ar solahr nsensuwedki soahng suwed me e wiahdao de sohla medewe me irail sohte anahne wauneki ih. Mwohn elder kan pahn kihong ohlo pwukoa kan nan mwomwohdiso, irail pil anahne medewe duwen irair en ahn ohlo pwoud en mwoweo me ele nsensuwedkihla ahn ohlo pitihedi, oh pil neira seri kan me ele pehm me arail pahpao keseirailla.​—Mal. 2:14-16

Kristian kan kin kasalehda arail erpit sang ni arail alasang Siohwa oh wiahki koasoandi en pwopwoud mehkot sarawi.​—Ekl. 5:4, 5; Ipru 13:4.