Siohwa ketikihong Esekiel rohng en koapworopwor ehu me inoukihda miniminpenehn wehin Israel mwurin ar pwuralahng Sapwen Inowo. Rohng wet pil kohpada duwen miniminpenehn sapwellimen Koht aramas akan me tepida wiawi erein imwin rahn akan.

Siohwa mahsanihong soukohp Esekiel en ntingihdi pohn kisin lepin dinapw riahkis. E pahn ntingihedi pohn ehu lepin dinapw ko, “Ong Suda, oh mehn Israel kan me ieiang ih,” oh pohn lepin dinapw teio, “Ong Sosep, lepin dinapw en Epraim, oh mehn Israel kan pwon me ieiang ih.” Kisin lepin dinapw riahkiso pahn wiahla “lepin dinapw tehkis” nan pehn Esekielo.​—Esek. 37:15-17, NW.

 Dahme ahd wet “Epraim” kin karasaraskihong? Tepin nanmwarki en keinek eisek ni paliepeng en wehin Israel, Seropoham, wia kadaudoken Epraim, me uhd wiahla keinek me uhdahn kehlail. (Deud. 33:13, 17; 1 Nan. 11:26) Keinek wet kohsang nein Sosep pwutako Epraim. (Nemp. 1:32, 33) Sosep alehdi kapai tohrohr ehu sang semeo, Seikop. Ihme kahrehda e konehng me kisin lepin dinapwo me karasaraskihong keinek eiseko en adaneki “lepin dinapw en Epraim.” Ni ahnsowo me Esekiel ntingihedi kokohpo duwen kisin lepin dinapw riahkiso, paliepeng en wehin Israel wie sensel nan Asiria sangete pahr 740 mwohn Krais. (2 Nan. 17:6) Eri, pali laud en mehn Israel ko ahnsowo mwarahkpeseng nan wehin Papilon, me uhd wiliandi wehin Asiria.

Nan pahr 607 mwohn Krais, keinek riau ni palieir en wehin Suda oh ele luhwen irail kan sang paliepeng en wehin Israel kalipilipala Papilon. Nanmwarki kan me wie kadaudoken Suda kaunda keinek riau pwukat, oh samworo kan pil iang irail, pwehki samworo kan kin papah ni tehnpas sarawio nan Serusalem. (2 Kron. 11:13, 14; 34:30) Eri e konehng me keinek riau pwukat kin karasaraskihong kisin lepin dinapw me “ong Suda.”

Iahd me kisin lepin dinapw riahkiso ara kohpene? Met wiawi ahnsou me mehn Israel ko pwurala Serusalem pwehn onehda sapahl tehnpas sarawio nan pahr 537 mwohn Krais. Wiliepen keinek riauo oh keinek eiseko koaros ehupene pwurala Serusalem sang arail wie sensel. Keinek en Israel ko solahr tohrohrpeseng. (Esek. 37:21, 22) Mehn Israel ko pwurehng miniminpene kaudokiong Siohwa. Soukohp Aiseia oh Seremaia pil kohpada duwen miniminpene wet.​—Ais. 11:12, 13; Ser. 31:1, 6, 31.

Padahk mehlel kesempwal dahieu me pid kaudok mehlel me kokohp wet kasalehda? Iei met: Siohwa pahn ketikihpene sapwellime tohnkaudok kan en wiahla “lepin dinapwtepali,” de wiahla ehu. (Esek. 37:18, 19) Inoupen miniminpene wet pweidahr ni atail ahnsou? Ei. Kokohp wet tepida pweida nan pahr 1919, ni ahnsou me sapwellimen Koht aramas akan ar ekisekis pwurehng koasoansoandi, oh pwurehng miniminpene. Ahn Sehdan kin songosong en katohrepeseng irail sohte pweida.

Ni ahnsowo, pali laud en irail kan me pwurehng miniminpene ahneki koapworopwor en iang Sises kaunda nanleng nin duwen nanmwarki oh samworo kei. (Kaud. 20:6) Ni karasaras, irail duwehte kisin lepin dinapwo ong Suda. Ahpw, kedekedeo, irail kan me ahneki koapworopwor en mour nin sampah wie tohtohla oh tepida patehng me keidi kan me karasaraskihong mehn Suhs. (Sek. 8:23) Re duwehte kisin lepin dinapwo ong Sosep, oh re sohte ahneki koapworopwor en iang Krais kaunda.

Pwihn riau pwukat kin miniminpene oh papah nin duwen sapwellimen Siohwa aramas akan pahn kaundahn Nanmwarkio, Sises Krais, me kokohpo kahdaneki “ei ladu Depit.” (Esek. 37:24, 25) Sises ketin kapakapki me koaros sapwellime tohnpadahk kan pahn wiahla ehu duwehte Semeo kin ket reh oh eh kin pato rehn Semeo. * (Sohn 17:20, 21) Sises pil ketin kohpada me sapwellime pelin sihpw en tohnpadahk keidi kan iangahki sapwellime sihpw teikan pahn “wiahla pwihn sihpw teieu” oh “sileparail pahn mehtehmen.” (Sohn 10:16) Mahsen en Sises uhdahn kasalehda mwahu duwen miniminpenehn sapwellimen Siohwa aramas akan rahnwet sohte lipilipil mehnia koapworopwor me re ahneki ong ahnsou kohkohdo!