NAN Madiu 13:24-26, Sises mahsanih: “Wehin Koht rasehng aramas emen me kamwerediong kisin war mwahu kei nan eh mwaht. Nipwong ehu, nindokon aramas koaros ar memeir, eh imwintihti men ahpw kohla kamwerehdi weren dihpw suwed kei nanpwungen war mwahu ko, oh kohkohlahsang. War mwahu ko lao wosada oh keirda, oh wa kan pwerla, dihpw suwed ko ahpw pil pwarada.” Ekei sounnting kan kin peikasalki ma karasaras wet uhdahn wiawi, ahpw nting en mehn Rom kan mahs kadehdehda me met mehlel.

Ehu dikseneri en Paipel koasoia me “en kamwerehdi weren dihpw poisin nan mwaht ehu pwehn dupungki emen me suwed . . . wia mwekid mwersuwed ehu pahn kosonned en wehin Rom. Anahnepen wiawihdahn kosonned ehu ong ire wet wia mehn kadehde me mwekid wet kin kalapw wiawi.” Emen me kin samanih oh kawehwe duwen kosonned kan, Alastair Kerr kawehwehda me nan pahr 533, Kaunen Rom Justinian wiahda nah pwuhko Digest, me oaralapihada duwen kosonned en Rom oh pil kasalehda ire mwotomwot kan sang irail kan me kin samanih kosonned ni ahnsou me kosonnedo wiawihda (pahr 100-250). Nin duwen me pwuhko kasalehda (Digest, 9.2.27.14), sounsamanih kosonned Ulpian koasoiahda duwen kopwung ehu me Celsus, sounpolitik en Rom mwohn pahr 200, kopwungki. Mie emen me kamwerehdi weren dihpw suwed nan ahn emen mwaht oh kauwehla war mwahu ko. Pwuhko Digest kasalehda sawas kan me mie ong mehmeno me ahneki mwahto, pwe me mwersuwedo en pwainla dahme e kauwehla.

Soangen wiewia mwersuwed wet me wiawi nan Wehin Rom mahso kadehdehda me dahme Sises ketin mahsaniho kin uhdahn wiawi.

EREIN ahnsowo, Suda mi pahn kaundahn mehn Rom ko. Oh me kin wia wiliepen mehn Rom ko iei kepina men me kaunda karis en sounpei ehu. Dahme kepinao kin keieu nsenohki iei en rikpene daksis ong wehin Rom oh kolokol popohl oh onepek mwahu en Suda. Mehn Rom ko kin men kauhdi soahng suwed kan oh kaloke koaros me kin kauwehla onepek. Likin met, mehn Rom ko kin mweidohng kaunen mehn Suhs ko en apwalihala soahng kan me kin wiawi ehuehu rahn.

Mwoalen Kopwung Lapalapo iei wasa me sounkopwung oh kaun en mehn Suhs kan kin mi ie pwehn apwalihala irair kan me pid arail kosonned. Pil mie mwoalen kopwung tikitik kan nan wasa kan en Suda. Mwoalen kopwung tikitik pwukat ele kin apwalihala pali laud en kopwung kan me pid tiahk mwersuwed oh pil wiewia teikan. Kaunen Rom kan sohte kin iang pidada nan kopwung pwukat. Dahme mwoalen kopwung en mehn Suhs ko sohte ahneki manaman en wia iei en kemehla aramas mwersuwed kan. Met wia mehkot me mehn Rom kan ahneki pwuhng en wia. Ahpw ehu ire me me tohto ese duwe me mehn Rom ko sohte wiahiong mehkot iei ahnsou me tohn Mwoalen Kopwung Lapalapo ar kopwung Stipen oh katehki takai oh kemehla.​—Wiewia 6:8-15; 7:54-60.

Mwoalen Kopwung Lapalap en mehn Suhs ko kin ahneki manaman laud. Ahpw emen me kin samanih pelien lamalam kan, Emil Schürer, koasoia me “dahme kin keieu irehdi arail manaman iei ni kaunen mehn Rom kan ar kak, ni ahnsou sohte lipilipil, kauhdi irail oh pein doula wia kopwungo, ahpw mehlel ma re medewe me mehn Suhs ko uhwong arail kosonned.” Ehu karasepen soangen kopwung wet wiawi ni ahnsou me kaunen sounpei Klaudius Lisias, kapitala wahnpoaron Pohl, me wia emen towe mehlel en Rom.​—Wiewia 23:26-30.