Pwukoa en Sapwellimen Koht Manaman ong Pweidahn Kupwure

“Mahsen me I kin kapwilewei . . . pahn kin kapwaiada mehkoaros me I anahne en pweida.”​—AIS. 55:11.

1. Dahme kahrehda en aramas pilahn kan sohte kin pweida ahnsou koaros?

 SIOHWA sohte anahne wiahda pilahn pwehn kapwaiada kupwure kan duwehte me aramas akan kin wia. Karasepe: Ohl oh lih emen ele inengieng douluhl ira en kauwada imwara ihmw kaselel ehu oh ahneki peneinei nsenamwahu. Kahrehda ira anahne doadoahk laud oh wiahda pilahn kan mwowe. Pwehki met, re kin koapworopworki me dahme re inengieng en pweida. Ahpw soahng kan me ira sohte kasik kakete pwarada me duwehte melimel, sohla doadoahk, soumwahu oh mehla. Mepwukat kak kauwehla ara pilahn kan oh dahme re men en wiawi sohte pweida. Ahpw met sohte kin wiawi rehn Siohwa. Sohte pak ehu me kupwure kan sohte kin pweida.

2, 3. (a) Dahme kupwuren Siohwa kin pidada? Ia duwen eh ketin apwalihala irair me pwarada ni ahnsou me Adam oh Ihp dipada? (b) Dahme kahrehda kitail anahne tehk oh idawehn ahl me Koht kin ketin kapwaiada kupwure?

² Ni Siohwa eh pahn ketin kapwaiada kupwure kan, e sohte anahne wiahda pilahn mwowe pwehn kilang ma sapwellime erpit oh kehl kak kapwaiada kupwure kan. (Ep. 3:11) Kupwure kan kin pidada dahme e ketin koasoanehdier ong aramas oh sampah nin tapio, me sampah pwon pahn wiahla paradais me aramas unsek kan pahn kak mour ni meleilei oh nsenamwahu kohkohlahte. (Sen. 1:28) Ni ahnsou me Adam oh Ihp dipada, Siohwa eri ketin apwalihala irairo oh wiahda dahme anahn pwe kupwure kan en uhdahn pweida. (Wadek Senesis 3:15.) Siohwa ketin koasoanehdi me sapwellime lih ni karasaras pahn wiahda kadaudok, de sapwellime Ohl, me pahn kauwehla Sehdan oh kamwahwihala kahpwal koaros me Sehdan kahrehda.​—Ipru 2:14; 1 Sohn 3:8.

³ Sohte mehkot nanleng oh sampah me kak kauhdi Koht pwe en ketin kapwaiada kupwure. (Ais. 46:9-11) Dahme kahrehda kitail kak nda met? Pwehki e kin pidada sapwellimen Siohwa manaman. Manaman wet kin kamehlelehiong kitail me kupwuren Koht “anahne en pweida.” (Ais. 55:10, 11) Eri kitail anahne tetehk  oh idawehn ahl me Koht kin ketin kapwaiada kupwure. Atail mour ahnsou kohkohdo kin poahsoankihda pweidahn kupwure. Patehng met, e kin kakehlaka atail pwoson en kilang duwen Siohwa eh kin ketin doadoahngki sapwellime manaman. Eri, kitail en tehk duwen pwukoa me sapwellimen Siohwa manaman kin wia pwehn kapwaiada kupwure sang mahs, nan atail ahnsou oh pil ahnsou kohkohdo.

Pwukoahn Sapwellimen Koht Manaman Sang Mahs

4. Ia duwen Siohwa eh kin ekis ekis kasalehda kupwure?

⁴ Sang mahs, Siohwa kin ekis ekis kasalehda kupwure. Nin tapio, kasansaldahn Kadaudok me inoupe mie kin “rirsang aramas akan.” (1 Kor. 2:7) E sohte sansalda lao lel sounpar 2,000 mwuri, ni ahnsou me Siohwa pwurehng mahsanih duwen kadaudoko. (Wadek Senesis 22:17, 18. *) Siohwa ketikihong Eipraam inou ehu me pahn pweida ni wehwe laud. Lepin lokaia “pwehki kadaudokomw” kin kasalehda me Kadaudoko pahn ketido nin duwen aramas men me wia kadaudok en Eipraam. Kitail kak kamehlele me Sehdan kin men tetehk ia duwen oaritikpen met eh pahn sansalda. Imwintihtio uhdahn men kauwehla de kasaminehla kadaudok en Eipraam pwehn irehdi kupwuren Koht en pweida. Ahpw met sohte kak wiawi pwehki sapwellimen Koht manaman kin wie doadoahk. Ni ahl dah kan?

5, 6. Ia duwen Siohwa eh ketin doadoahngki sapwellime manaman pwehn pere emenemen kadaudok en Eipraam kan lao lel Kadaudoko?

⁵ Siohwa kin ketin doadoahngki sapwellime manaman pwehn pere emenemen kadaudok en Eipraam kan lao lel Kadaudoko. Siohwa mahsanihong Eipram (Eipraam): “Ngehi perehpomw me pahn apwahpwalihiuk.” (Sen. 15:1) Met kaidehn inou likamw ehu. Karasepe, medewehla dahme wiawi mpen pahr 1919 mwohn Krais, ni ahnsou me Eipraam oh Sara keseula mihla Kerar. Pwehki nanmwarki en Kerar Apimelek sehse me Sara iei en Eipraam pwoud, e ale Sara pwehn pwoudikihda. Ia duwe, Sehdan kin song en irehdihsang Sara en kaipwidi kadaudok en Eipraam? Paipel sohte mahsanih duwen met. Ahpw e padahkihong kitail me Siohwa ketin apwalihala irairo. Nan ouraman ehu, e mahsanihong Apimelek en dehr sair Sara.​—Sen. 20:1-18.

⁶ Kaidehn pakatehieu me Siohwa ketin pereirahla. E ketin doarehla Eipraam oh eh peneinei pak tohto. (Sen. 12:14-20; 14:13-20; 26:26-29) Kahrehda, sounmelkahka men kak koasoiahki Eipraam oh kadaudoke kan: “KAUN-O sohte ketin mweidohng emen en wiakauwe irail; oh e ketin kaloke nanmwarki kan pwehki irail. E ketin mahsanih, ‘Kumwail dehr sair ei ladu pilipil pwukat; kumwail dehr wia mehkot suwed ong nei soukohp akan.’”​—Mel. 105:14, 15.

7. Ni ahl dah kei Siohwa ketin perehla wehin Israel?

⁷ Siohwa ketin doadoahngki sapwellime manaman pwehn pere wehin Israel en mahs me Kadaudok me inoupe mie pahn ipwidi loale. E ketin doadoahngki sapwellime manaman pwehn ketikihong wehin Israel sapwellime Kosonned. Met kin kolokol arail kaudok min oh pere mehn Suhs kan sang kaudok samin me kak kauwehla arail nanpwungmwahu reh, arail tiahk oh paliwararail. (Eks. 31:18; 2 Kor. 3:3) Ni mwehin Sounkopwung kan, sapwellimen Siohwa manaman kin kakehlaka ekei ohl akan en doarehla wehin Israel sang ar imwintihti kan. (Sounkopwung 3:9, 10) Erein sounpar epwiki kei lao Sises me wia kadaudok en Eipraam me keieu kesempwal ketin ipwidi, sapwellimen Koht manaman kin perehla Serusalem, Pedleem oh tehnpas sarawio, koaros me kin wia kisehn pweidahn kokohp kan me pid duwen Sises.

8. Dahme kasalehda me sapwellimen Koht manaman kin pidada mour oh doadoahk en kalohk en sapwellime Ohl?

⁸ Sapwellimen Koht manaman kin pidada mour en Sises oh eh doadoahk en kalohk.  Manaman wet doadoahk rehn Mery ni ahl kapwuriamwei ehu me sohte kin wiawi sangete mahs leledo met. E kahrehda lih soh unsek men en neitikiehdi sapwellimen Koht me unseko oh sohte mi pahn dihp en mehla. (Luk 1:26-31, 34, 35) Mwuhr manaman wet doarehla seri pwelelo Sises sang mehla. (Mad. 2:7, 8, 12, 13) Ni ahnsou me Sises sounpar 30, Koht ketin keikihdi Sises sapwellime manaman, idihada ih en sohsohki dewen nanmwarki Depit oh ketikihong ih pwukoa en kalohk. (Luk 1:32, 33; 4:16-21) Sapwellimen Koht manaman kin kahrehda Sises en wiahda manaman kan me iangahki kamwahwihala me soumwahu kan, kamwenge pokon kan oh kaiasada me melahr akan. Soangen manaman pwukat kin kasalehda kapai kan me kitail kak kasik pahn sapwellimen Sises kaunda.

9, 10. (a) Ia duwen sapwellimen Koht manaman eh kin sansalda rehn tohnpadahk kan nan mwehin wahnpoaron ko? (b) Dahme kin kasalehda duwen Siohwa eh kin ketin kapwaiada kupwure ni mwehin wahnpoaron ko?

⁹ Sang ni Pendekos nan pahr 33, Siohwa ketin doadoahngki sapwellime manaman pwehn keiekihdi kadaudok en Eipraam teikan sapwellime manaman. Irail pwukat kaidehn uhdahn kadaudok en Eipraam. (Rom 8:15-17; Kal. 3:29) Ni mwehin wahnpoaron ko, e kin sansal me sapwellimen Koht manaman kin doadoahk rehn sapwellimen Sises tohnpadahk ko oh kahrehda irail en ngoangki kalohk oh pil wiahda manaman kapwuriamwei kan. (Wiewia 1:8; 2:1-4; 1 Kor. 12:7-11) Pwehki ar ale kisakis en manaman wet, met kin kasalehda mehkot kapw duwen Siohwa eh kin ketin kapwaiada kupwure. Siohwa solahr kupwurki aramas akan en kaudokiong ih ni ahlohte me e ketin koasoanehdi sounpar epwiki kei mwowe me kin pid tehnpas sarawi en Serusalem. Ahpw e kupwurki mwomwohdisohn Kristian me ahpwtehn wiawihda. Sangete ahnsowo, Siohwa kin ketin doadoahngki mwomwohdiso keidio pwehn kapwaiada kupwure.

¹⁰ Pere, kakehle oh keidi, kin wia ahl ekei me Siohwa kin ketin doadoahngki sapwellime manaman sang mahs pwe kupwure en kin uhdahn pweida. A ia duwen nan atail ahnsou? Ia duwen Siohwa eh ketin doadoahngki sapwellime manaman pwehn utung kupwure? Kitail anahne ese pwe kitail men mweidohng manamano en kaweid kitail. Eri, kitail en tehkpene ahl pahieu me Siohwa ketin doadoahngki sapwellime manaman nan atail ahnsou.

Sapwellimen Koht Manaman nan Atail Ahnsou

11. Dahme kin kasalehda me sapwellimen Koht manaman kin sewese sapwellime aramas akan en mwakelekel? Ia duwen omw kak kasalehda me ke kin mweidohng manamano en kaweid uhk?

¹¹ Keieu, sapwellimen Koht manaman kin sewese sapwellime aramas akan ren mwakelekel. Sapwellime aramas akan me kin papah pahrekiong kupwure oh pahn paiekihda met anahne mwakelekel. (Wadek 1 Korint 6:9-11.) Ekei me wiahla Kristian mehlel kin iang wia soangen tiahk samin me duwehte nenek, kamwahl, oh ohl mwahuki ohl oh lih mwahuki lih mahso. Ineng suwed en wia dihp uhdahn kehlail. (Seims 1:14, 15) Ahpw, emenemen irail pwukat me “mwakelekelsangehr dihp,” kasalehda me re wiahda wekidekla nan arail mour pwehn kaperenda Koht. Dahme kak kahrehiong irail kan me poakohng Koht ren pweida ni ar pelianda ineng suwed kan? 1 Korint 6:11 (NW) mahsanih: “Manaman en atail Koht.” Sang ni omw kin kolokol tiahk mwakelekel, ke kin kasalehda me ke mweidohng manamano en kaweid uhk nan omw mour.

12. (a) Nin duwen kaudiahl me Esekiel kilang, ia duwen Siohwa eh kin ketin kahluwa sapwellime pwihn? (b) Ia duwen omw kin kasalehda me ke kin mweidohng sapwellimen Koht manaman en kaweid uhk?

¹² Keriau, Siohwa kin ketin doadoahngki sapwellime manaman en kahluwa sapwellime pwihn ni ahl me e kupwurki. Nan kaudiahl me Esekiel kilang, sapwellimen Siohwa pwihn en nanleng kin kasalehda duwen kuruma en nanleng me sohte mehkot kak irehdi eh mwekid pwehn kapwaiada kupwuren Siohwa. Dahme kahrehiong kuruma wet en mwekidwei ni soangen ahl ehu? Esekiel koasoia: “Sohte lipilipil wasa me sapwellimen Koht  manaman kin mwekidla ie, re pil pahn mwekid.” (Esek. 1:20, 21, NW) Kitail en tamataman me sapwellimen Siohwa pwihn kin wiawihda ni pwihn riau, ehu nanleng oh meteio nin sampah. Ma sapwellimen Koht manaman kin kahluwa pwihn en nanleng, eri, met pil kin wiawi rehn pwihn en sampah. Sang ni omw kin peik oh loalopwoatohng kaweid me kohsang sapwellimen Koht pwihn en sampah, ke kin kasalehda me ke kin peipeian sapwellimen Koht kuruma en nanleng oh mweidohng manamano en kaweid uhk.​—Ipru 13:17.

13, 14. (a) Ihs irail me wia “dih wet” me Sises mahsanih? (b) Menlau kihda karasaras ehu me kasalehda sapwellimen Koht manaman eh kin sewese kitail en wehwehkihla padahk mehlel kan en Paipel. (Menlau kilang koakon “Ke Kin Tetehk Duwen Marain me Wie Lalaudla?”)

¹³ Kesiluh, Siohwa kin ketin doadoahngki sapwellime manaman en sewese kitail en wehwehki padahk mehlel kan en Paipel. (Lep. Pad. 4:18) “Ladu lelepek oh loalokong” kin doadoahngki makasihn wet pwehn ekis ekis kasalehda padahk mehlel kan en Paipel. (Luk 12:42) Karasepe, medewehla atail wehwehki duwen irail me wiawihkihda “dih wet” me Sises mahsanih. (Wadek Madiu 24:34. *) Mehnia dih me Sises mahsanih? Iren onop me koasoia “Ketier en Krais—Ia Wehwehn Met ong Uhk?” kawehwehda me Sises kin mahsanih duwen sapwellime tohnpadahk kan me pahn kereniong keikihdi sapwellimen Koht manaman, ahpw kaidehn aramas suwed kan. * Sapwellimen Sises keidi kan me mour ni mwehin wahnpoaron ko oh pil nan atail ahnsou, iei irail me pahn kilang kilel kan oh wehwehki duwen ketier en Sises.

¹⁴ Ia wehwehn met ong kitail? Mendahki kitail sohte kak wehwehki ia uwen werei en “dih wet,” kitail kin tamataman ekei ire kan duwen lepin lokaia “dih”: Met kin dokedoke aramas akan me arail sounpar wekpeseng ahpw kin momour erein ahnsou ehu, karasepe, pahpa men oh nah kan de pahpa kahlap men oh nein nah kan. Met sohte uhdahn werei, oh e pahn imwisekla. (Eks. 1:6) Eri, ia duwen atail wehwehki sapwellimen Sises mahsen duwen “dih wet”? Dahme e mahsanih iei me keidi kan me kilang kilel kan me pwarada nan pahr 1914 kak ahnekipene erein ahnsou ehu rehn me keidi teikan me pahn kilang tepidahn kahn kamakam kowahlap. Dih wet ahneki tapi oh uhdahn pahn imwisekla. Pweidahn soangsoangen kilel kan kin kasalehda ni sansal me kahn kamakam kowahlap pahn kereniong leledo. Sang ni  omw kin ahneki madamadau en karuwaru oh mwasamwasahn, ke kin kasalehda me ke kin tetehk kamwahulahn atail wehwehkihla padahk mehlel en Paipel oh ideidawehn kaweid en sapwellimen Koht manaman.​—Mark 13:37.

15. Dahme kin kasalehda me sapwellimen Koht manaman kin kakehlaka kitail en kalohki rongamwahu?

¹⁵ Kapahieu, sapwellimen Koht manaman kin kakehlaka kitail en kalohki rongamwahu. (Wiewia 1:8) Ma sohte sapwellimen Koht manaman, rongamwahu sohte kak lohkseli wasa koaros nin sampah. Medewehla met. Ele kowe emen me kin inenen namenek de masepwehk, oh kin medewe ‘I sohte pahn kak kalohk ihmw lel ihmw!’ Ahpw met ke kin ngoangki iang doadoahk wet. * Sounkadehdehn Siohwa lelepek tohto kin pousehlahte kalohk mendahki arail kin lelohng uhwong de kalokolok. Sapwellimen Koht manamante me kak kakehlaka kitail en powehdi kahpwal kan me kin kaluwetekitailla oh kak wia mehkan me kitail sohte kak wia sang ni pein atail kehl. (Maika 3:8; Mad. 17:20) Sang ni omw kin iang kalohk ni uwen omw kak koaros, ke kin kasalehda me ke kin mweidohng manamano en kaweid uhk.

Pwukoa en Sapwellimen Koht Manaman ni Ahnsou Kohkohdo

16. Dahme kahrehda kitail kak kamehlele me Siohwa pahn ketin pere sapwellime aramas akan erein ahnsoun kahn kamakam kowahlap?

¹⁶ Ni ahnsou kohkohdo, Siohwa pahn ketin doadoahngki sapwellime manaman ni ahl kapwuriamwei kan pwehn kapwaiada kupwure. Keieu, medewehla irair en perepe mwahu. Nin duwen atail kilangehr, Siohwa kin ketin doadoahngki sapwellime manaman en pere emenemen mehn Israel ko oh pil wehin Israel pwon. Kahrehda kitail uhdahn kamehlele me e pahn ketin doadoahngki manamano pwehn pere sapwellime aramas akan erein ahnsoun kahn kamakam kowahlap me kerendohr. Kitail sohte anahne kasarki duwen Siohwa eh pahn ketin apwalih kitail ahnsowo. Ahpw kitail kak kasikasik ahnsou kohkohdo, pwe kitail ese me irail me poakohng Siohwa sohte pahn mi nan wasa me e sohte ketin mahsanih de sapwellime manaman sohte kak lel.​—2 Kron. 16:9; Mel. 139:7-12.

17. Ia duwen Siohwa eh pahn ketin doadoahngki sapwellime manaman nan sampah kapw?

¹⁷ Ia duwen Siohwa eh pahn ketin doadoahngki sapwellime manaman ni ahnsou me sampah kapw pahn leledo? Siohwa pahn ketin doadoahngki manamano en wiahda pwuhk kapw kan me pahn papahkpeseng ni ahnsowo. (Kaud. 20:12) Dahme pwuhk pwukat pahn audaudki? E kasalehda oaritik kan duwen dahme Siohwa kupwurki kitail en wia erein sounpar kid. Ke kin kasikasik en kasawih audepen pwuhk pwukat? Kitail uhdahn kin kasikasik sampah kapwo. E pahn wia ahnsou kaselel ehu en iang mi ni ahnsou me Siohwa pahn ketin doadoahngki sapwellime manaman en kapwaiada kupwure ong sampah oh aramas akan.

18. Dahme ke koasoanehdi teng en wia?

¹⁸ Kitail en dehr manokehla me kupwuren Siohwa uhdahn pahn pweida pwe e kin ketin doadoahngki sapwellime manaman me keieu kehlail nanleng oh sampah pwehn kapwaiada met. Kupwure kin pidada kowe. Kahrehda ken koasoanehdi teng en peki sapwellimen Siohwa manaman ni karakarahk oh mweidohng manamano en kaweid uhk. (Luk 11:13) Ni omw wia met, ke kak koapworopworki en ahneki mour soutuk nan paradais nin sampah me Siohwa kin kupwurki aramas akan en ahneki.

[Nting tikitik kan me mi pah]

Ke Tamataman?

• Ia duwen Siohwa eh kin ketin doadoahngki sapwellime manaman sang mahs pwehn kapwaiada kupwure?

• Ia duwen Siohwa eh kin ketin doadoahngki sapwellime manaman nan atail ahnsou?

• Ia duwen Siohwa eh pahn ketin doadoahngki sapwellime manaman ni ahnsou kohkohdo pwehn kapwaiada kupwure?

[Peidek en Onop]

[Koakon nan pali 22]

Ke Kin Tetehk Duwen Marain me Wie Lalaudla?

Siohwa ketin pousehlahte kawehwehiong sapwellime aramas akan padahk mehlel kan en Paipel. Ia ekei ire kan me kamwahula me Kahn Iroir kin kasalehda?

▪ Sapwellimen Sises karasaras en ihs kin koasoia mehn kasukuhl dah me pid kekeirdahn aramas men en wiahla tohnpadahk en Krais? (Mad. 13:33)​—July 1, 2008, pali 25-26.

▪ Iahd me malipehn Kristian kan ong koapworopwor en nanleng imwisekla?​—January 1, 2008, pali 23, par. 15, 16.

▪ Ni atail kaudokiong Siohwa, ia wehwehn kaudongki sapwellime manaman? (Sohn 4:24)​—February 1, 2003, pali 10.

▪ Ia wasa nan tehnpas sarawi me pokon kalaimwun kin papah ie? (Kaud. 7:15)​—March 1, 2010, pali 29, par. 10, oh dahme ntingdi pohnangin peidek en 10, 11.

▪ Iahd me katohrohrpeseng en sihpw kan oh kuht kan wiawi? (Mad. 25:31-33)​—May 1, 1996, pali 10-20.