Kaudiahl kan en Wasa me Ngehn akan Kin Mi Ie

SOHTE lipilipil ia uwen werei en omw kilekilengdalahng pahn lahng, ke sohte pahn kak kilangada ngehn emen. Ke sohte kak rongada emen irail. Ahpw ke kak kamehlele me mie ngehn akan. Irail inenen loalokong oh mie adarail oh arail irair kan. Ekei men sewesei kitail a ekei men kamedekih kitail. Irail koaros kin tetehk kitail.

Koht mehlelo iei ngehn ehu. (Sohn 4:24) Mie mware me kin katohre ih sang koht likamw tohto teikan. Mware iei Siohwa. Soun Melkahkao ntingihedi met: “KAUN-O [“Siohwa,” NW] me lapalap oh konehng ale kaping lapalahpie; kitail uhdahn pahn lemwiki laudsang koht teikan koaros. Koht en wehi teikan koaros, iei irail me dikedik en eni, a KAUN-O, iei ih me ketin kapikada nanleng kan. Lingan oh roson kin kapilpene; manaman oh lingan kin kadirehla Tehnpese.”​—Melkahka 96:4-6.

Kaudiahl akan en Koht Mehlelo

Paipel padahkihong kitail me “sohte me kin kilangki Koht mese.” (Sohn 1:18) Kitail sohte kak uhdahn wehwehki mwomwen Koht oh sapwellime lingan duwehte aramas men me maskun sangete eh ipwidi eh sohte kak ese soangsoangen poh kan. Ahpw duwehte sounpadahk mwahu men eh kin kawehwe ire apwal akan ni ahl ehu me pahn mengei ong tohnsukuhl kan en wehwehki, Koht, sang nan sapwellime Mahsen, iei Paipel, pil kin ketin kawehwe mehkan me kitail sohte kak kilang sang mehkan me kitail kak kilang. Siohwa ketin kasalehda kaudiahl kan ong ohl lelepek kan en mahs pwehn sewese kitail en kak wehwehki ia mwomwen nanleng oh ia duwen tohn nanleng ar kin pid atail mour.

Karasepe, ehu kaudiahl me kohwong Esekiel kin kasalehda sapwellimen Siohwa lingan ni eh doadoahngki kisiniei, marain, sapair oh ahia. Nan pil ehu kaudiahl, wahnpoaron Sohn kilangada ketidi en Siohwa nan mwoale oh e kasalehda me silangin Koht “lingaling duwehte kisin takai kesempwal me adaneki sasper oh karnelian; oh ahia ehu me pohe duwehte pohn takai kesempwal me adaneki emerald kapilpene mwoahlo.” Soangen kasansal pwukat kin padahkihong kitail me mwomwen Siohwa me tohrohr oh uhdahn lingan, kaselel oh meleilei.​—Kaudiahl 4:2, 3; Esekiel 1:26-28.

Pil soukohp Daniel kilangada kaudiahl ehu en Siohwa. E kilangada “Kiden aramas [tohnleng kan] me wie papah, oh aramas ngedehrie me aririh.” (Daniel 7:10) Ia uwen kapwuriamwei oh kaselel en kasansalo! En kilangete emen tohnleng nan ehu kaudiahl pahn wia mehkot kapwuriamwei. Na, song medewehla ma ke kilang tohnleng unsek kid kid kei!

 Mpen pak 400 me Paipel kin mahsanih duwen tohnleng kan oh ekei kin doadoahk nin duwen serap oh kerup kan. Lepin lokaiahn Krihk oh Ipru me kawehwehdi lepin lokaia wet “tohnleng” nan Paipel kin wehwehki “meninkeder.” Kahrehda tohnleng kan kak kapehse nanpwungarail oh mahsie re pil kin koasoiong aramas akan. Tohnleng kan kaidehn aramas akan me kin mour nin sampah mahs. Siohwa ketin kapikada ngehn pwukat mahsie mwohn eh ketin kapikada aramas akan.​—Sohp 38:4-7.

Nan kaudiahl en Daniel, tohnleng ngedehrie pokonpene pwehn kilang mwekid kesempwal ehu. Daniel eri kilangada “emen me likamwete aramas” eh patohlahng mwoalen Siohwa pwehn “ale manaman en kaunda wasa, wahu, oh lingan en nanmwarki, pwe tohn wehi kan koaros, keinek koaros, oh me kin lokaiahki soangen lokaia teikan en kin papah ih.” (Daniel 7:13, 14) Ih me “likamwete aramas,” sapwellimanki pwukoa kesempwal ehu nan dewen ngehn akan. Iei ih Sises Krais me ketin iasadahr oh alehdi manaman en kaunda sampah. Sapwellime kaunda pahn kereniongehr wiliandi koperment koaros en aramas oh ketikihsang soumwahu, pahtou, lokolok, semwehmwe oh pil mehla.​—Daniel 2:44.

Tohnleng lelepek ngeder pwukat kin men dahme keieu mwahu en wiawi ong aramas akan kahrehda re perenkihda mehlel ni en Sises eh ketin alehdi manaman en kaunda. Ahpw e me kansensuwed pwe mie ekei ngehn akan me sohte perenkihda met.

Imwintihti en Koht oh Aramas

Mwurinte aramas akan ar wiawihda, emen tohnleng ko inengihada aramas en kaudokiong ih oh e pelianda Siohwa kahrehiong  pein ih en wiahla Sehdan. Ahd wet kin wehwehki “sounpelian.” Sehdan iei ngehn me keieu suwed oh e kin uhdahn uhwong Siohwa me wia ngehn me keieu limpoak. Tohnleng teikan iangala Sehdan nan uhwong wet. Paipel kahdaneki irail ngehn saut kan. Duwehte Sehdan, ngehn saut kan wiahla imwintihti en aramas akan. Pali laud en lokolok kan nin sampah, koasoandi sapwung, soumwahu, semwehmwe, oh mahwen kan kin kohsang rehrail.

Mendahki sarawi tohto solahr kin koasoia duwen Sehdan, pwuhken Sohp kin kasalehda soangen ngehn dahmen ih oh dahme e kin men wia. E mahsanih: “Ni rahno eh leledo pwe tohnleng kan en pwarodo mwohn silangin KAUN-O. Sehdan ahpw pil iang uh nanpwungarail.” Ni ahnsowo, Sehdan kose me Sohp kin papah Koht ihte pwehn ale mehkot. Pwehn kadehde me dahme e nda me mehlel, Sehdan kahrehiong Sohp en lelohng kahpwal laud ni eh kemehla nah mahn akan oh nah seri ehk ko. Mwurin mwo, e kahrehiong Sohp en ahnekihda kens suwed ehu wasa koaros ni paliwereo. Soahng pwukat koaros me Sehdan wia sohte pweida.​—Sohp 1:6-19; 2:7.

Mie kahrepen Siohwa eh ketin kanengamahiong Sehdan erein ahnsou reirei. Ahpw e sohte pahn ketin kanengamah kohkohlahte. Kereniong Tepilo pahn sohrala. Miehier soahng kan me wiawi nanleng oh e kileldi nan pwuhken Kaudiahl ong kamwahupatail. E mahsanih: “Mahwen ahpw tepida nanleng. Maikel [Sises Krais me ketin iasadahr] oh ienge tohnleng kan mahweniong drakono [Sehdan], oh drakono oh ienge kan mahweniong Maikel oh ienge ko. Drakono eri lohdi; eri, sohla dehu ehu mweimweiong ih oh ienge ko nanleng. Drakon kalaimwuno eri pisikensang nanleng. Eri, iei ih serpent en mahso, me adaneki Tepil de Sehdan, me kin pitipitih sampah pwon, oh me pisikendiongehr sampah iangahki ienge tohnleng kan koaros.”​—Kaudiahl 12:7-9.

Tehk me Sehdan kin “pitipitih sampah pwon.” E kin pitihki aramas akan padahk likamw kan pwe irail en sohpeisang Siohwa oh sapwellime Mahsen. Ehu padahk likamw me laud iei me dene ni ahnsou me aramas mehla, irail kin kohla nan wasa me ngehn akan kin mi ie. Mie soangsoangen padahk kan me pid duwen met. Karasepe, nan Aperika oh Eisia, me tohto kin kamehlele me ni ahnsoun mehla, aramas kin kohla nan wasahn ngehn akan oh mihla rehn arail peneinei kan me melahr. Padahk en pwurkadorio oh ehl pil kohsang padahk wet me aramas kin momour mwurin mehla.

Aramas Kin Kohdahla Nanleng Mwurin Mehla?

A ia duwen padahk me dene aramas mwahu koaros pahn kohdahla nanleng? Aramas tohto kin kamehlele duwen met. Mehlel me mie ekei aramas mwahu kan me pahn kohdahla nanleng ahpw irail me malaulaute. Re malaulau sang aramas lik kei me melahr. Paipel kasalehda me irail meh 144,000 pahn alahlda sang sampah oh re pahn kaunda sampah nin duwen “samworo” kan oh “nanmwarki” kan. (Kaudiahl 20:4, 6; 14:1, 3) Irail pahn iang ih me likamwete aramas me iei Sises Krais oh irail pahn wiahda koperment ehu nanleng. Met iei Wehin Koht. Koperment wet pahn kasorehla Sehdan oh nah ngehn saut akan oh e pahn wekidala sampah en wiahla paradais ehu. Pali laud en irail kan me melahr pahn iasada oh ahneki koapworopwor en mour kohkohlahte nan Paradais nin sampah.​—Aiseia 65:21-25.

Pwehn kawehwe ni mwotomwot, me tohto kin mi nan dewen ngehn akan. Me keieu lapalap nanpwungarail iei Siohwa Koht, Sounkapikpen mour koaros. Tohnleng ngedehrie kin papah ih ni lelepek. Tohnleng teikan idawehnla Sehdan oh irail kin uhwong Siohwa oh kin pitipitih aramas akan. Patehng met, irail me malaulaute me alahlda sang sampah pwehn alehdi pwukoa tohrohr kan nanleng. Kitail pahn tehk ihs nanpwungarail me kitail kak koasoiong oh ia duwen atail pahn wia met.