Sises—Dahme Kahrehda E Ketin Pwoukihla?
Sises—Dahme Kahrehda E Ketin Pwoukihla?
“Pwe pil Nein-Aramas ketido, . . . pwe en . . . tounmeteikihla eh mour pwe en komourala aramas ngeder.”—MARK 10:45.
SISES ketin mwahngih dahme e pahn ketin kasik. E ketin mwahngih me e sohte pahn ketin sapwellimanki mour nsenamwahu kohkohlahte nin sampah. Ahpw e ketin mwahngih me sapwellime mour pahn imwisekla mwadang ni eh sounpar 30 samwa ni mwohmw ehu me sohte mwahu oh e ketin onopadahr ong ahnsou me e pahn ketin pwoula.
Paipel kasalehda uwen kesempwal en pwoulahn Sises. Ehu pwuhk koasoia me pwoulahn Sises pwarada mpen pak 175 nan Palien Pwuhk Sarawi ni Lokaiahn Krihk de Kadehde Kapw. Ahpw dahme kahrehda Sises ketin anahne lelohng lokolok oh mwadang pwoula? Kitail anahne ese, pwehki pwoulahn Sises kak kamwakid laud atail mour.
▪ Dahme Sises ketin kasik Erein kaimwiseklahn pahr en sapwellime mour, Sises ketin kehsehki sapwellime tohnpadahk ko pak kei duwen lokolok oh pwoula me e pahn ketin lelohng. Ni arail kohkohlahng Serusalem pwehn iang kasarawih kaimwiseklahn Pahsohpa me e pahn ketin iang towehda, e ketin mahsanihong sapwellime tohnpadahk 12 ko: “Nein—Aramas pahn pengipengla rehn samworo lapalap akan oh sounkawehwehn Kosonned kan. Re pahn kadeikada pwe en kamakamala, oh pangala rehn mehn liki kan. E ahpw pahn wiahla mehn kepit rehrail; re pahn kendipiong, wokih, oh kemehla.” * (Mark 10:33, 34) Dahme kahrehda e uhdahn ketin mwahngih dahme pahn wiawihong ih?
Sises ketin mwahngih duwen kokohp tohto me mi nan Palien Pwuhk Sarawi ni Lokaiahn Ipru me kohpada ia mwomwen sapwellime mour pahn imwisekla. (Luk 18:31-33) Tehk ekei kokohp kan iangahki iren Paipel kan me kawehwehda ia duwen arail pweida.
Mesaiao pahn . . .
▪ Pengipengkihla mwohni silper 30.—SEKERAIA 11:12; MADIU 26:14-16.
▪ Wowoki oh kendipiong.—AISEIA 50:6; MADIU 26:67; 27:26, 30.
▪ Langada nin tuhke.—MELKAHKA 22:16; MARK 15:24, 25.
▪ Ale kepit ni eh langada.—MELKAHKA 22:7, 8; MADIU 27:39-43.
▪ Kamakamala ahpw sohte tihpwoat pahn timpeseng.—MELKAHKA 34:20; SOHN 19:33, 36.
Sises ketin kapwaiadahr kokohp pwukat oh pil kokohp teikan. E sohte kak ketin pein wia met. Pweidahn kokohp pwukat koaros nan sapwellime mour kin kadehdehda me Koht me ketin kadarodo ih. *
Ahpw dahme kahrehda Sises ketin anahne lokolok oh pwoula?
▪ Sises ketin pwoula pwehn kapwungala ire kesempwal riau Sises mwahngih ire me keieu kesempwal me pwarada nan mwetuwel en Ihden. Adam oh Ihp dukula pahn ngehn emen me uhwongada Siohwa oh ira pilada en sapeikiong Koht. Ara uhwongada Siohwa kahrehda eh miehla peikasalpen sapwellimen Koht pwungen kaunda. Dihp me ira wiahdao kihda pil ehu peidek me ma mie aramas me pahn kak kolokol arail lelepek ong Koht pahn kahpwal kan.—Senesis 3:1-6; Sohp 2:1-5.
Sises ketikihda pasapeng me keieu mwahu ong ire riau pwukat me iei sapwellimen Siohwa pwung en kaunda oh lelepek en aramas. Sang ni eh ketin peik ni unsek “lao lel mehla” nin tuhkeo, Sises ketin utungada sapwellimen Koht pwung en kaunda. (Pilipai 2:8) Sises pil ketin kadehdehda me aramas unsek men kak kolokolte eh lelepek ong Siohwa ni unsek mendahki kahpwal keieu laud kan.
▪ Sises ketin pwoula pwehn pwainla aramas Soukohp Aiseia kohpada me lokoloko oh pwoula me Mesaia me inoupe mie pahn ketin lelohng pahn ketikihda mahkpen dihp en aramas. (Aiseia 53:5, 10) Sises ketin mwahngih duwen met, oh e ketin kupwurki “tounmeteikihla moure, pwe me ngeder en maiauda.” (Madiu 20:28) Sapwellime meirong ritingadahng aramas soh unsek kan ahl ehu ren kak ahneki nanpwungmwahu rehn Siohwa oh pitsang dihp oh mehla. Pwoulahn Sises kahrehiong kitail en kak pwurehng alehdi dahme Adam oh Ihp kasalongehla me iei koapworopwor en mour kohkohlahte nan sampah unsek ehu. *—Kaudiahl 21:3, 4.
▪ Dahme ke kak wia Nan ire pwukat, kitail kasawiher dahme Paipel mahsanihki duwen Sises. Ia wasa e ketisang ie, ia mwomwen sapwellime mour oh dahme kahrehda e ketin pwoukihla. Atail esehla ire mehlel pwukat duwen Sises pahn sewese kitail laudsang ihte kapwungala iren sawehwe me kitail ahneki. Atail mour pahrekiong ire pwukat kak kihong kitail kapai kan. Mour mwahu ni ahnsou wet oh mour soutuk ni ahnsou kohkohdo. Paipel kin padahkihong kitail dahme kitail anahne wia ma kitail men ale soangen kapai pwukat.
▪ Kalaudehla omw sukuhlki duwen Sises Krais oh sapwellime pwukoa nan sapwellimen Siohwa koasoandi.—SOHN 17:3.
▪ Kasalehda omw pwoson Sises ni omw pahn mourki mour ehu me kin kasalehda me ke pwungki Sises en ketin wia omw Sounkomour.—SOHN 3:36; WIEWIA 5:31.
Sounkadehdehn Siohwa kan pahn perenki sewese iuk ken kalaudehla omw sukuhlki duwen Sises Krais, sapwellimen Koht “Iehros,” me kahrehda atail kak ahneki kisakis en “mour soutuk.”—Sohn 3:16.
[Nting tikitik kan me mi pah]
^ par. 5 Sises ketin kalapw mahsanihki pein ih “Nein-Aramas.” (Madiu 8:20) Lepin lokaia wet kin kasalehda me e sohte ketin wia aramaste ahpw pil iei ih me kokohp en Paipel kin kahdaneki “emen me likamwete aramas.”—Daniel 7:13, 14.
^ par. 13 Pwehn kalaudehla omw wehwehki kokohp kan me pweidahr rehn Sises, kilang pali me oaritik kan kileldi ie, pahnangin oaralap, “Sises Krais—Mesaia me Mie Inoupe,” nan pwuhken Dahme Paipel Uhdahn Padahngki? me Sounkadehdehn Siohwa kan wiahda.
^ par. 17 Pwehn kalaudehla omw wehwehki duwen kesempwalpen tomw en pwoulahn Sises, kilang irelaud 5, “Tomwo—Sapwellimen Koht Kisakis me Keieu Laud,” nan pwuhken Dahme Paipel Uhdahn Padahngki?
