Sises​—Ia Mwomwen Sapwellime Mour

“Ei kapwaiada kupwur en ih me ketin poaroneiehdo, oh wiahda sapwellime doadoahk, iei me ei tungoal.”—SOHN 4:34.

DAHME Sises ketin mahsanih powe kin kasalehda dahme e kin ketin kesempwalki nan eh mour. Sises oh sapwellime tohnpadahk ko wie seiseiloakseli nan nahna kan en Sameria. (Sohn 4:6) Sapwellime tohnpadahk ko medewe me Sises men konotdahr kahrehda re patohwanohng kisin tungoal. (Sohn 4:31-33) Sapwellime pasapeng kin kasalehda ia kahrepen sapwellime mour. Ong ih, wia kupwuren Koht kesempwalsang eh tungoal. Sapwellime mahsen kan oh wiewia kin kasalehda me e kin ketin kapwaiada kupwuren Koht ong ih. Dahme met kin pidada?

▪ Kapakapahrengki oh kawekawehweseli duwen Wehin Koht Paipel kin kawehwehda sapwellimen Sises doadoahk nan eh mour, ni e mahsanih: “Sises eri ketin kakahnseli nan Kalili pwon, kawekawehweseli . . . kapakapahrengki Rongamwahu en Wehin Koht.” (Madiu 4:23) Sises sohte kin ketin kapakapahrengkihte de kalohki Wehin Koht ong meteikan. E pil kin ketin kawehwe ong aramas akan. Met kin sansal sang ni eh kin ketin padahkih oh kamwakid irail ni eh ketin kasalehda kahrepe kan. Wehio iei oaralapen sapwellime mahsen.

Erein sapwellime doadoahk en kalohk, Sises kin ketin padahkihong irail kan me kin rong ih dahkot Wehin Koht oh dahme e pahn wia. Tehk ekei ire mehlel kan duwen Wehio iangahki iren Paipel kan me kasalehda sapwellimen Sises mahsen kan ong ire wet.

▪ Wehin Koht iei koperment en nanleng ehu oh Siohwa ketin idihada Sises pwehn wia Nanmwarki.—MADIU 4:17; SOHN 18:36.

▪ Wehio pahn kasarawihala mwaren Koht oh kahrehiong kupwure en pweida nin sampah duwehte nanleng.—MADIU 6:9, 10.

▪ Sises padahkihong loallap suwedo: “I ndaiong uhk ni mehlel rahnwet, Ke pahn iang ie mi nan Paradais.” Pahn kaundahn Wehin Koht, sampah pwon pahn wiahla paradais ehu.—LUK 23:42, 43, NW.

▪ Wehin Koht pahn kereniong pweida oh kapwaiada kupwuren Koht ong sampah. *—MADIU 24:3, 7-12.

▪ Wiahda manaman kan Aramas kin esehki Sises nin duwen “Sounpadahk” men. (Sohn 13:13) Ahpw, erein sounpar siluh elep en sapwellime doadoahk en kalohk, e ketin wiahda manaman tohto. E ketin wiahda manaman pwukat pwehki kahrepe riau. Keieu, e kin kadehdehda me Koht me ketin kadarodo ih. (Madiu 11:2-6) Keriau, e kin kasalehda dahme e pahn ketin wia nin duwen Nanmwarki en Wehin Koht ni ahnsou kohkohdo me pahn laudsang dahme e ketin wiahdahr. Tehk ekei manaman kan me e ketin wiahda.

▪ E ketin kameleileidi melimel oh kisinieng laud nansedo.—MARK 4:39-41.

▪ E ketin kamwahwihala me soumwahu kan iangahki me maskun, salengepon oh nehtuk.—LUK 7:21, 22.

▪ E ketin kadirehla mwenge pwehn kamwengehda pokon en aramas kan me duhpeklahr.—MADIU 14:17-21; 15:34-38.

▪ Pak siluh eh ketin kaiasada aramas.—LUK 7:11-15; 8:41-55; SOHN 11:38-44.

 Medewehla ia pahn mwomwen mour nin sampah pahn kaundahn soangen Nanmwarki manaman menet!

▪ Kasalehda sapwellimen Siohwa Koht irair Me pid duwen padahkihong meteikan duwen Siohwa, sohte emen me konehng duwehte sapwellimen Koht Ohl me mwarenkihla Sises Krais. Nin duwen mesenih me lapalap sang soahng kan koaros me kepikipikda, Sises ketiket rehn Siohwa nanleng werei sang tohnleng teikan koaros. (Kolose 1:15) Medewehla ahnsou me e sapwellimanki pwehn sukuhlki madamadau en Semeo, kupwure oh sapwellime koasoandi kan.

Ih met me kahrehda e kak mahsanihki: “Sohte emen ese duwen Sapwellimen Kohto, pwe Sahmohte me mwahngih. Pil sohte emen ese duwen Sahm, pwe Sapwellimen Kohtohte, oh irail kan me Sapwellimen Kohto ketin kupwurki en kasalehiong.” (Luk 10:22) Ni ahnsou me Sises ketiket sampah nin duwen aramas emen, e kin ketin nantihong kasalehda sapwellimen Semeo irair kan. Sapwellimen Sises mahsen oh padahk me tohrohr. Sapwellime padahk kan kin poahsoankihda soahng kan me e ketin sukuhlkier ni eh ketiket nanleng rehn Koht Wasa Lapalahpie.—Sohn 8:28.

Ni Sises eh ketiket nin sampah, e ketin doadoahngki dahme e ketin sukuhlkier nanleng duwen Semeo oh uhd padahngki ni ahl ehu me mengei ong aramas akan nin sampah en kak wehwehki oh doadoahngki nan arail mour.

Tehk ahl kesempwal riau me Sises ketin kasalehda duwen Semeo.

▪ Nan sapwellime kapakap e mahsanih: “Ngehi me kahrehiong irail en ese mwaromwi.” Sapwellimen Sises padahk kan kin kasalehda dahme mehlel duwen Siohwa, mwareo, kupwure oh sapwellime koasoandi kan.—SOHN 3:16; 17:6, 26, NW.

▪ Sapwellimen Sises wiewia kan kin kasalehda sapwellimen Siohwa irair kaselel kan. Sises kin ketin kasalehda ni unsek irair en Semeo me kahrehda e kak mahsanihki: ‘Ma ke men ese duwen Semeio, kilangiehte.’—SOHN 5:19; 14:9.

Kitail kin mwekidki laud mwomwen sapwellimen Sises mour. Kitail kak paiekihda laud ma kitail kasawih dahme kahrehda e ketin pwoukihla oh ma kitail mwekid pahrekiong dahme kitail sukuhlki.

[Nting tikitik me mi pah]