Dahkot Uhdahn Semwehmwe?

SEMWEHMWE douluhl kin keper ong mour. E kin wehwehki sou itar en mwenge, pihl, kahs de karisihn, sohte wasahn kousoan mwahu, sohte itar epwelpen roson mwahu oh sukuhl. E kin lelohng aramas lik me kereniong pahrekiong tohn Amerika pwon. Ahpw, pali laud en aramas akan nan Palikapi en Iurop oh Amerika saikinte kilang aramas men me uhdahn semwehmwe. Eri, kitail tehk ekei irail pwukat.

Mbarushimana kin mi Rwanda nan Aperika rehn eh pwoud oh nah seri limen. Kewenemen en neira serio mehkihla malaria. E koasoia: “Ei pahpao anahne nehkpeseng sapweo nanpwungen kiht meh wenemen. Ei wasao uhdahn tikitik kahrehda I anahne kasaula ei peneinei nan ehu kahnimw. Ngehi oh ei pwoud kin doadoahk nan wasahn wisik edin takai oh pihk. Sohte wenihmwtok en imwato. Se kin idipil sang nan pwarer ehu ni polis stationo. Se kin kalapw mwenge pak ehu nan rahn ehu, ahpw ma se sohte doadoahk eri sohte pil kanat mwenge rahno pwon. I kin kohkohla ekis wasa ma met kin wiawi pwehki I sohte kakohng rong nei seri ko ar kin sengisengki ar men mwenge.”

Victor oh Carmen kin wia doadoahk en kamwahwihala suht. Ira kin mi Bolivia nan wasakis dohsang nan kahnimw kan iangahki neira seri limen. Ira kin rend pere ieu me wiawihkihda prik oh e ohlahr, mpwi oh sohte lioal. Sukuhlo inenen dirala kahrehda Victor anahne wiahda pein en nah serepeino tehpel pwe en kak iang sukuhl. Pwopwoudo kin aluhkihla mwail 6 pwehn weseitiwi mehn kuk oh pwoailihda nimerail pihl. Carmen koasoia: “Sohte at imwen kainen kahrehda se kin anahne kohdihla ni pillap me se kin duhdu oh pil kesehla kihd ieo. Seri ko kin kalapw soumwahukihda.”

Francisco oh Ilídia kin mi wasa ehu me dohsang kahnimw nan Mozambique. Neira seri limmen a emen mehkihla malaria mwurin imwen winio sohte kapidelong ih pwehn ale sawas. Pwopwoudo kin padokedi rais oh pedehde nan ara kisin wasao pwehn mie kanarail mwenge erein sounpwong siluh. Francisco koasoia: “Ekei pak e sohte kin keteu de lipirap akan kin pirapahla wahn at mwahto, kahrehda I kin koadoahkihada kisin sent sang ni ei kin netiki kehl pehri ong sounwia ihmw kan. Se pil kin aluhki awa riau pwehn weseitiwi  nan dihpw ko. Ngehi oh ei pwoudo koaros kin wisik. Ehu mehn kukihada kanat mwenge nan wihko a ehu mehn netila.”

Me tohto kin pehm me mie mehkot sapwung nan sampah wet pwehki emen nanpwungen meh isimen kin mour duwehte Mbarushimana, Victor, oh Francisco, a meh lik kei kin uhdahn kepwehpwe daulihala. Ekei kin song en kamwahwihala kahpwal wet. Iren mwuri kan kin kasalehda dahme irail kin wia oh kasikasik.

 [Kilel nan pali 2, 3]

Carmen oh nah seri riemen idihdipil ni pillap ehu