1, 2. Mehnia mahwen me uhdahn pahn wiawi ahnsou keren? Dahme kitail sohte anahne wia nan mahwen wet?

 NAN October 30, 1938, aramas rar kei nan Amerika rongorong prokram ehu nan redio. Erein prokramo eh wiewiawi, soun sipai ko me mwomwehda soun pakairki rohng kan pakairkihda me mie me kohsang Mars kohdohng kalowehdi Sampah oh kasohrehla. Aramas tohto sohte wehwehki me met wiahte soai pwoat nan redio. Re medewe me uhdahn mahwen ehu tepida oh masepwehkada. Ekei pil tepida pere pein irail ni soangsoangen ahl akan pwe ren kak onopadahng imwintihtio.

² Ahnsou keren, uhdahn mahwen mehlel ehu pahn wiawi. Ahpw pali laud en aramas akan sohte onohnop ong met. Mahwen wet iei Armakedon, sapwellimen Koht mahwen ong sampah suwed wet. Met kaidehn soai pwoat. Kitail ese me mahwen wet pahn wiawi pwehki Koht ketin padahkihong kitail duwen met nan sapwellime Mahsen, Paipel. (Kaud. 16:14-16) Kitail sohte pahn pei nan mahwen wet. Ahpw Siohwa pahn ketin doadoahngki sapwellime manaman pwehn ketin doarekitailla ni ahl kapwuriamwei ehu.

3. Mehnia kokohp me kitail pahn onopki? Dahme kahrehda kokohp wet kesempwal ong kitail rahnwet?

³ Kokohp en Paipel ehu me kileldi nan Sekaraia irelaud 14 padahkihong kitail soahng tohto duwen mahwen en Armakedon. Mendahki e ntingdi sounpar 2,500 samwalahr ko, kokohp wet uhdahn kesempwal ong kitail rahnwet. (Rom 15:4) E koasoia duwen dahme wiawihong sapwellimen Koht aramas akan sang ahnsou me Krais ketin tepida kakaun nanleng nan pahr 1914. E pil padahkihong kitail soahng kapwuriamwei kan me pahn wiawi ahnsou keren. Kokohp wet padahkihong kitail duwen “wahu kalaimwun ehu” oh “pihl mwakelekel [“pihl en mour,” NW].” (Sek. 14:4, 8) Nan iren onop  wet, kitail pahn sukuhlki dahkot wahu wet oh ia duwen sapwellimen Siohwa tohnkaudok kan arail kak ale pereparail wasao. Kitail pil pahn sukuhlki dahkot pihl en mour oh ia duwen atail kak paiekihda. Imwilahn met, kitail sohte pahn ihte pohnese me kitail anahne nim sang pihl wet, ahpw kitail pil pahn men nim sang pihl wet. Eri, kitail en onopki mwahu kokohp wet.​—2 Pit. 1:19, 20.

4. (a) Iahd “rahn me KAUN-O pahn ket nan sapwellime mwoalen kadeik” pahn tepida? (b) Erein sounpar tohto mwohn pahr 1914, dahme Kristian keidi kan kin kalokalohki? Ia duwen kaun en palien politik oh pelien lamalam ar kin mwekidki met?

⁴ Kokohp nan Sekaraia irelaud 14 tepikihda mahsen pwukat: “Ni rahn me KAUN-O pahn ket nan sapwellime mwoalen kadeik kerendohr.” (Wadek Sekaraia 14:1, 2.) Rahn dahieu met? Rahno iei “rahnen Kaun-o” me tepida nan pahr 1914 ahnsou me Sises ketin wiahla Nanmwarki en Wehin Koht nanleng. (Kaud. 1:10; 11:15) Erein sounpar tohto, Kristian keidi kan kin kalohki me kaimwiseklahn “wehin liki koaros, . . . ar ahnsou” pahn wiawi nan pahr 1914. Re pil kalohki me sang ahnsowo kohdo, apwal nin sampah pahn laudla sang mahs. (Luk 21:24) Ia duwe, “wehin liki” kan kin rong kanahieng mehn kataman wet? Soh, kaunen pelian politik oh pelien lamalam kan kin kapailoke oh kaloke Kristian pwukat. Ni arail wia met, kaun pwukat kin uhdahn kapkapailoke Koht Lapalapo, pwehki Kristian keidi kan wia wiliepen Wehin Koht.​—Ipru 12:22, 28.

5, 6. (a) Dahme imwintihti kan en sapwellimen Koht aramas akan wia? (b) Ihs irail “me luhwehdi kan”?

⁵ Sekaraia kohpada dahme imwintihti kan en sapwellimen Koht aramas akan pahn wia. E koasoia: “Kahnimwo pahn lohdi.” “Kahnimwo,” Serusalem, iei Wehin Koht. Kristian keidi kan me mihmihte sampah wia kisehn Wehi wet. (Pil. 3:20) Kahnimwo “lohdi” nan Mahwen Keieu en Sampah ni ahnsou me brother ko me ahneki pwukoa laud nan sapwellimen Siohwa pwihn selidi nan imweteng nan Atlanta, Georgia, nan Amerika. Wiewiahn imwintihti ko ong Kristian keidi ko sohte pahrek oh kin lemei, re sohte mweidohng ren doadoahngki neirail pwuhk kan, oh song en kauhdi arail doadoahk en kalohk. Mwomwen me imwintihti ko kulihasang dipwisou en ihmw kan nan kahnimwo.

⁶ Mendahki imwintihti kehlail pwukat kaloke sapwellimen Koht aramas akan oh karaun likamwih irail, re sohte kak kauwehla kaudok mehlel. Mie Kristian keidi kan me kolokolte arail lelepek. Nin duwen me Sekaraia koasoia, irail pwukat iei “me luhwehdi kan” me sohte men “wisiksang nan kahnimwo.”

7. Mehn kahlemeng dahieu me Kristian keidi kan kasalehda ong kitail rahnwet?

⁷ Ia duwe, imwintihti ko uhdihsang arail kaloke sapwellimen Koht aramas akan ahnsou me Mahwen Keieu en Sampah imwisekla? Soh. Kalokolok me Sekaraia kohpada pousehlahte wiawi. (Kaud. 12:17) Karasepe, kalokolok laud wiawihong riatail Kristian kan nan Mahwen Keriau en Sampah. Mehn kahlemeng en lelepek me Kristian keidi ko kasalehda kin kangoange kitail rahnwet pwe kitail en dadaurete pahn kahpwal koaros me kitail ele lelohng. Soangen kahpwal pwukat kin iangahki uhwong sang peneinei, wasahn doadoahk oh pil nan sukuhl sang irail kan me kin kapailoke kitail pwehki atail pwoson. (1 Pit. 1:6, 7) Sohte lipilipil wasa me kitail mi ie, kitail kin koasoanehdi teng en lelepekte oh sohte masak sohte lipilipil me kin uhwong kitail. (Pil. 1:27, 28) Ahpw ia duwen eh kak mie perepatail nan sampah ehu me kin kailongki kitail?​—Sohn 15:17-19.

8. (a) Dahme nahna kan nan Paipel kin karasahiong ekei pak? (b) Dahme “Nahnahn Olip” kin karasahiong?

⁸ Kitail sukuhlkiher me nan kokohpo “kahnimwo,” de Serusalem, iei Wehin Koht. Eri, dahme “Nahnahn Olip, palimesehn Serusalem” kin karasahiong? Ia duwen nahna wet eh “pwalpeseng . . . nanpwung” oh wiahla nahna riau? Pil nan Paipel ni lokaiahn Ipru, Siohwa ketin kahdaneki nahna wet me pwalpeseng wiahda riau “ahi nahna pwukat.” Dahme kahrehda? (Wadek Sekaraia 14:3-5.) Nan Paipel, nahna kan kin ekei pak karasahiong wehi de koperment kan. Paipel pil kin kalapw koasoia me kapai oh mehn doarepe kin kohsang sapwellimen Koht nahna. (Ais. 25:6, 7) Eri, Nahnahn Olipo kin karasahiong kaundahn Siohwa pohn sapwellime kapikipik kan koaruhsie.

9. Ia wehwehn Nahnahn Olip eh “pwalpeseng”?

⁹ Kokohpo koasoia me Nahnahn Olip pahn “pwalpeseng.” Ia wehwehn met? E wehwehki me Siohwa ketin wiahda koasoandien kaunda keriau ong kahrepe tohrohr ehu. Koht pil ketin sapwellimaniki koasoandien kaunda wet, oh Sises Krais iei me wia Nanmwarki. Pwehki Siohwa me ketin sapwellimaniki kaunda riau pwukat, kahrehda e ketin kahdaneki nahna riau pwukat “ahi nahna pwukat.”—Sek. 14:4, 5, NW.

10. Ia wehwehn “wahu kalaimwun” me mi nanpwungen nahna riauo?

¹⁰ Nin duwen me kokohpo kasalehda, ahnsou me Nahnahn Olipo pwalpeseng, apali pahn tohreklahng paliepeng oh apali ong palieir, aluweluwen Siohwa kan pahn ketiket pohn nahna pwukat. Pwalpeseng wet wiahda “wahu kalaimwun ehu” pahn aluweluwen Siohwa kan. Wahu dahieu met? Wahu wet kin karasahiong wasahn poadoandoar me Koht ketikihda. Duwehte aramas akan ar kin rukula nan wahu ehu nanpwungen nahna riau, ih duwen sapwellimen Siohwa ladu kan pahn poadoandoarla pahn sapwellime kaunda oh kaundahn sapwellime Ohl. Siohwa sohte pahn ketin mweidohng kaudok mwakelekel en sohrala. Iahd me Nahnahn Olipo pwalpeseng? E wiawi nan pahr 1914, ahnsou me Sises ketin tepida kaunda nanleng. Kokohpo pil koasoia me sapwellimen Siohwa aramas akan pahn tangalahng nan “wahu kalaimwun” wet. Iahd me met tepida?

11, 12. (a) Iahd me sapwellimen Koht aramas akan tepida tangalahng nan wahuo? (b) Dahme kasalehda me Siohwa ketin pere sapwellime aramas akan?

¹¹ Sises ketin katamankihong sapwellime tohnpadahk kan mahsanih: “Tohn wehi koaros pahn kailongkin kumwail pwehki ngehi.” (Mad. 24:9) Kailok wet pahn kehlailla sang pahr 1914, ni ahnsou me imwin rahn akan tepida. Erein Mahwen Keieu en Sampah, imwintihti kan kaloke laud Kristian keidi lelepek kan, ahpw re sohte pahn kak kauwehla kaudok mehlel. Nan pahr 1919, sapwellimen Koht aramas akan tepida saledek sang pelien lamalam likamw, me iei Papilon Lapalap. (Kaud. 11:11, 12) * Ih nan pahro me sapwellimen Koht aramas akan tepida tangalahng nan wahuo.

¹² Sangete pahr 1919, Siohwa ketin pousehlahte pere sapwellime tohnkaudok mehlel kan wasa koaros nan sampah. Sounpar kan me douwehr powe, koperment tohto kin song en kauhdi sang Sounkadehdehn Siohwa kan arail kalohk oh sohte mweidohng ren doadoahngki neirail pwuhk kan. Met pil wiewiawihte nan ekei  sahpw. Ahpw Siohwa sohte ketin mweidohng koperment pwukat en kauwehla kaudok mehlel. Sohte lipilipil dahme koperment en aramas pahn wia, Siohwa pahn ketin pousehlahte doadoahngki sapwellime manaman lapalap pwehn ketin pere sapwellime aramas akan.​—Deud. 11:2.

13. Ia wehwehn atail kin mi nan wahu en poadoandoar me Siohwa ketikihda? Dahme kahrehda e uhdahn kesempwal sang mahs kitail en mi nan wahu wet?

¹³ Ma kitail kin pousehlahte lelepek ong Siohwa, kitail kin mi nan wahu en poadoandoar me Siohwa ketikihda. Siohwa oh sapwellime Ohlo sohte pahn ketin mweidohng emen de mehkot en kihsang kitail mehn perepe wet. (Sohn 10:28, 29) Siohwa pahn ketikihong kitail sawas koaros me kitail anahne pwehn loalopwoat ong sapwellime kaunda oh kaundahn sapwellime Ohl. Kitail pahn anahne sapwellimen Koht sawas laudsang mahs nan kahn kamakam kowahlap me pahn kereniong wiawi. Kahrehda met e uhdahn kesempwal sang mahs kitail en mi nan wahu en poadoandoar me Siohwa ketikihda.

14, 15. Ni rahno me Siohwa ketin peiong sapwellime imwintihti kan, dahme pahn wiawihong irail kan me sohte pereparail sang rehn Koht?

¹⁴ Sang met lao lel kaimwiseklahn sampah suwed wet, ahn Sehdan uhwong sapwellimen Koht aramas akan pahn kehlailla. Ahpw ni ahnsou keren, Sehdan pahn wia kaimwiseklahn eh uhwong. Ni rahno, Siohwa pahn ketin peiong oh kasohrehla imwintihti koaros en sapwellime aramas akan. Rahno iei “rahn en sapwellime mahwen” me Sekaraia kohpada. Mahwen wet pahn kasalehda laudsang mahwen teikan koaros uwen lingan en Sounpei menet, Siohwa.​—Sek. 14:3, NW.

¹⁵ Ni rahno me Siohwa ketin peiong sapwellime imwintihti kan, dahme pahn wiawihong irail kan me sohte pereparail sang rehn Koht? Kokohpo koasoia me sohte pahn mie “marain kesempwal” ong irail. Met wehwehki me re sohte pahn ahneki sapwellimen Koht kupwuramwahu. Kokohpo pil pousehlahte koasoia me “oahs kan, kou kan, kamel kan, oh ahs akan—pohn mahn koaros” pahn “tenla.” Met wehwehki me dipwisou en mahwen oh misihn kan me re kin doadoahngki ong mahwen pahn sohla katepe. Sekaraia koasoia me Siohwa pahn ketin kalokehki sapwellime imwintihti kan “soumwahu suwed ehu.” Pwoaren masarail kan oh lowerail kan “pahn matasang.” Kitail sehse ma soumwahu wet uhdahn soumwahu ehu. Ahpw kitail ese me re sohte pahn kak kauweikitailla de pelian Koht. (Sek. 14:6, 7, 12, 15, NW.) “Nanmwarki kan en sampah oh sapwellimarail karis en sounpei kan” koaros pahn uhpalih Sehdan. Ahpw sohte lipilipil ia wasa re mi ie nin sampah, re pahn sohrala. (Kaud. 19:19-21) “Ni rahno paliweren irail kan me KAUN-O ketin kemelahr pahn mwarahkseli sang apali sampah lel apali.”​—Ser. 25:32, 33.

16. Peidek dah kan kitail anahne idek rehtail? Dahme kitail anahne wia erein kahn kamakam kowahlap?

¹⁶ Koaros kin lokolok nan mahwen, pil irail kan me nanti lao kana. Kitail ele pil pahn lokolok erein kahn kamakam kowahlap. Mwein sohte pahn itar kanatail mwenge. Mwein kitail pahn luhs sang pali laud en dahme kitail ahneki. Mwein kitail solahr pahn ahneki pwuhng kan duwehte me kitail ahneki met. Ma kitail ahneki soangen lokolok pwukat, ia mwomwen atail pahn mwekidki? Kitail pahn masepwehkada? Kitail pahn mworusala oh sohla atail koapworopwor? Kitail pahn uhdihsang papah Siohwa? Erein kahn kamakam kowahlap, kitail anahne mi nan wahu en poadoandoar sang  ni atail pahn lelepek ong Siohwa oh sang atail likih me e pahn ketin pere kitail.​—Wadek Apakuk 3:17, 18.

17, 18. (a) Dahme “pihl en mour” kin karasahiong? (b) Dahme “Sehden Mehla” oh “Sehd Mediderenien” kin karasahiong? (c) Dahme kitail men ahnsou koaros wia?

¹⁷ Mwurin Armakedon, “pihl en mour” pahn pwilisang Wehin Krais. “Pihl en mour” kin wehwehki soahng koaros me Siohwa ketikihong aramas akan pwe ren kak mour kohkohlahte. Nan kokohp en Sekaraia, “Sehden Mehla” kin wehwehki aramas akan me memeir nan sousou. “Sehd Mediderenien,” me diren soahng kan me momour, kin wehwehki pokon kalaimwun me pitsang Armakedon. (Wadek Sekaraia 14:8, 9; Kaud. 7:9-15) Pwihn riau wet pahn nim “pihl en mour” sang “pillap en pilen komouro.” Imwilahn met, koaros pahn unsekla oh mour kohkohlahte.​—Kaud. 22:1, 2.

¹⁸ Ahnsou me Siohwa pahn ketin kasohrehla koasoandi suwed wet, e pahn ketin pere kitail oh pahn ketikinkitailahng nan sapwellime sampah kapwo. Mendahki wehin sampah koaros kin kailongki kitail, kitail koasoanehdier teng me kitail pahn loalopwoat ong Wehin Koht oh pahn mihmi nan wahu en poadoandoar me Siohwa ketikihda.