IASADA en Sises sohte ihte wia mehkot me wiawi mahsie me rahnwet sohte nohn kesempwal ong kitail. Wahnpoaron Pohl kasalehda kesempwalpen met ni eh ntingihedi: “Krais ketin iasadasangehr me melahr akan; kahrehda, e ketin wialahr tepin kilel [“tepin wahnsahpw,” NW] en irail kan me melahr, duwen ar pahn pil iasada. Pwe duwen mehla eh tepisang aramastehmen, ih duwen iasada sang mehla eh tepido sang aramastehmen. Pwe duwen aramas koaros ar kin mehkihla ar miniminiong Adam, ih duwen koaros pahn iasadahng mour pwehki ar miniminiong Krais.”​—1 Korint 15:20-22.

Sises ketin iasada ni Nisan 16, pahr 33, ni rahn me mehn Suhs ko kin wahla arail meirong en tepin wahnsahpw mwohn Siohwa Koht nan tehnpas sarawio nan Serusalem. Ni eh nda me Sises iei tepin kilel, de ni karasaras tepin wahnsahpw, Pohl kasalehda me pahn mie meteikan me pahn iasada sang mehla.

Dahme Pohl koasoia mwuhr kawehwehda dahme kak wiawi pwehki sapwellimen Sises iasada. Pohl koasoia: “Pwe duwen mehla eh tepisang aramastehmen, ih duwen iasada sang mehla eh tepido sang aramastehmen.” Pwehki dihp oh soh unsek me kitail sohsohki sang Adam, kitail koaros kin mehla. Ahpw, sang ni eh ketikihda sapwellime mour unsek nin duwen meirong ehu, Sises ketin kahrehda aramas akan ren kak iasada, oh ni ahl wet saledeksang dihp oh mehla. Pohl oaralapihada mwahu met ni eh ntingihedi nan Rom 6:23: “Pweinen dihp, iei mehla; ahpw sapwellimen Koht kisakis sapan, iei mour soutuk rehn Krais Sises atail Kaun.”

Pein Sises ketin kawehwehda wehwehn sapwellime pwoula oh iasada ong kitail. E mahsaniheki pein ih: “Ih duwen Nein-Aramas eh uhdahn pahn langada, pwe mehmen me pwosonla ih en ahneki mour soutuk. Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.”—Sohn 3:14-16.

Medewehla​—mour poatopoat me sohte mie medek, lokolok de pahtou! (Kaudiahl 21:3, 4) Ia uwen kaperen en koapworopwor wet! Emen ohl me samanih Paipel koasoia: “Sousou kan ele kin katamankihong emen uwen mour eh mwotomwot, duwehte iasada eh kin kamehlelehiong emen uwen mwotomwot en mehla.” Ei, iasada en Sises wehwehki mour!