1, 2. (a) Dahme seweseiuk ken pilada papah Koht? (b) Peidek dah kan duwen atail sohso sang rehn Siohwa me iren onop wet pahn sapengala?

 ARAMAS rar kei wiahdahr pilipil mwahu pwehn papah Siohwa Koht oh kahlemengih Sises Krais. (Mad. 16:24; 1 Pit. 2:21) Atail inoukihong Koht atail mour kin wia pilipil kesempwal ehu. Kitail sohte wiahda pilipil wet mwurin atail sukuhlkihte padahk mengei kan sang ekei iren Paipel. Ahpw kitail kin onop Paipel ni keneinei oh kakehlaka atail pwoson duwen sohso me Siohwa ketin inoukihda. E pahn ketikihong sohso wet koaros me kin pousehlahte arail sukuhlki duwen ih oh Sises Krais.​—Sohn 17:3; Rom 12:2.

² Ma kitail men kolokolte atail nanpwungmwahu rehn Siohwa, kitail anahne pousehlahte wiahda pilipil mwahu kan me kin kaperenda ih. Iren onop wet pahn sapengala peidek kesempwal pwukat: Sohso dahieu me kitail ahneki? Ia uwen kesempwal en met ong kitail? Ia duwen atail kak tehk mwahu pwe kitail en alehdi atail sohso? Dahme pahn sewese kitail en wiahda pilipil mwahu kan?

3. (a) Sohso dahieu me me keidi kan pahn alehdi? (b) Sohso dahieu me “sihpw teikan” pahn alehdi?

³ Kristian malaulaukeite me ahneki koapworopwor en sohsohki mour me sohte kak mehla nanleng. Irail pahn ahneki pwais kaselel tohrohr en iang Krais kakaun sapwellime Wehi. (1 Pit. 1:3, 4) Irail kan me “ipwsapahl” iei me pahn ale sohso wet. (Sohn 3:1-3) Ahpw ia duwen irail meh rar kei me wia sapwellimen Sises “sihpw teikan” me kin iang me keidi kan kalohki rongamwahu en Wehin Koht? (Sohn 10:16, NW) Sihpw teikan pahn ale dahme Adam oh Ihp sohte alehdi, me iei mour soutuk nan Paradais nin sampah me sohte lokolok, mehla, de mwahiei. (2 Pit. 3:13; Kaud. 21:1-4) Ni Sises eh ketin langalang pohn tuhkehn kalokoloko, e ketin inoukihong emen ohl me e pahn ale sohso wet. Sises  mahsanih: “I ndaiong uhk ni mehlel rahnwet, Ke pahn iang ie mi nan Paradais.”​—Luk 23:43, NW.

4. Soangen kapai dah kan me kitail ahneki ahnsou wet?

⁴ Ahpw atail sohso pil iangahki ekei kapai me kitail ahneki ahnsou wet. Pwehki kitail pwoson “meirong” me Sises ketin wiahda, kitail ahneki meleilei oh nanpwungmwahu keren rehn Koht. (Rom 3:23-25) Kitail wehwehki mwahu duwen dahme Paipel inoukihda ong ahnsou kohkohdo. Limpoak me riatail Kristian kan nan sampah pwon kin kasalehda ong emenemen kin kahrehiong kitail en uhdahn peren. Oh e wia pwais kaselel ehu en kak kalohki duwen Siohwa. Kitail ahneki kahrepe mwahu kan en kalahnganki atail sohso.

5. Dahme Sehdan kin nantihong wiahiong sapwellimen Koht aramas akan? Dahme kak sewese kitail en soikala ahn Sehdan lidip kan?

⁵ Pwehn tehk mwahu me kitail en dehr luhs sang atail sohso, kitail anahne kanahieng en soikala ahn Sehdan lidip kan. Sehdan kin ahnsou koaros song en kasonge sapwellimen Koht aramas akan pwe ren wiahda pilipil suwed kan oh katihasang arail sohso. (Nemp. 25:1-3, 9) Sehdan ese me e pahn kereniong sohrala, eri e kin nantihong laud pwehn kasonge kitail en wia me sapwung. (Wadek Kaudiahl 12:12, 17.) Ma kitail men “pelianda kehlail en Tepil eh widing suwed kan,” kitail anahne ahnsou koaros kalahnganki atail sohso. (Ep. 6:11) Kitail kak sukuhlki mehkot kesempwal sang mwomwen nein Aisek pwutak meseniho Esau eh kilangwohng eh sohso.

6, 7. Ihs Esau? Sohso dahieu me e uhdahn pahn alehdi?

⁶ Mpen sounpar 4,000 samwalahro, Repeka kaipwidi mpwer ehu, Esau oh Seikop. Mwomwara ni ara kekeirda wekpeseng. “Esau wiahla soupal en kesik mahn emen, ohl en nansapw,” a Seikop wia “ohl pwung men, me kin mi nan impwal kan.” (Sen. 25:27, NW) Seikop wia ohl pwung men pwehki e kin mwahu oh sohte wiewia dihp.

⁷ Ni Esau oh Seikop ara sounpar 15, ara pahpa kahlap Eipraam mehla. Ahpw Siohwa ketin tamataman inou me e ketin wiahiong Eipraam. Mwuhr, Siohwa ketin pwurehng padahkihong Aisek duwen inou wet. Koht ketin mahsanih me wehi koaros en sampah pahn kapaiairailda pwehki kadaudok en Eipraam. (Wadek Senesis 26:3-5.) Ni ahl wet, Koht ketin kasalehda me emen kadaudoken Eipraam ko pahn wia “kadaudok” lelepeko me Senesis 3:15, (NW) kasalehda, me iei Mesaiao. Pwehki Esau iei nein Aisek nah pwutak mesenih, e ahneki pwung en iang mi nan inou wet me Koht ketin inoukihong Eipraam. Kahrehda Mesaiao uhdahn pahn wia kadaudok en Esau. Met wia inou kaselel ehu ong Esau. Ahpw ia duwe, e kalahnganki met?

8, 9. (a) Pilipil dahieu me Esau wiahda me pid eh pwung en sohso? (b) Dahme Esau esehda mwurin sounpar kei duwen pilipil me e wiahdao? Ia duwen eh mwekidki met?

⁸ Ehu rahn ni Esau eh kohsang nansapw, e kilangada Seikop “inihnim kene kisin sali.” Esau eri peki ekis kene oh nda: “I inenen duhpeklahr, kihdo mahs kenei kis konomw sali weitahtahn.” Seikop nda: “I pahn kihwei, ma ke pahn kihong ie omw pwungen sohso.” Pilipil dahieu me Esau wiahda? E nda me eh sohso sohte katepe ong ih oh e pilada dahl en salio sang eh pwung en sohso nin duwen mesenih men. Seikop men kamehlelehla me Esau uhdahn pahn kihong eh pwung en sohso, kahrehda e ndaiong Esau en kaukihla met. Seikop nda: “Nna, kahukihla mahs.” Esau sohte kihong ahnsou pwehn medemedewe mahs, ahpw e netikihla eh pwung en sohso. Mwurin mwo, “Seikop eri kihong kene pilawa oh selie nan dahl ehu. E ahpw tungoalehla oh kohkohla.” Esau kasalehda me e sohte katapanki oh kesempwalki eh pwung en sohso.​—Sen. 25:29-34.

⁹ Sounpar dower powe, ni Aisek eh medewe  me e pahn kereniong mehla, Repeka koasoanehdi me Seikop pahn ale pwung en sohso me Esau netikihong. Ni Esau eh esehda me e wiadahr pilipil pweipwei ehu sang ni eh netikihla eh pwung en sohso, e peki rehn Aisek: “Ipa, menlau pil kapaiaiehda. . . . Ia duwe, sohte kapaiamwahu ehu komw nekinekidohng ie?” Ni Aisek eh padahkihong Esau me e sohte kak wekidala kapai me e kihongehr Seikop, Esau eri sengiseng kowahlap.—Sen. 27:30-38.

10. Ia sapwellimen Siohwa madamadau ong Esau oh Seikop, oh dahme kahrehda?

¹⁰ Dahme kitail kak sukuhlki duwen madamadau en Esau sang dahme wiawio? E kasalehda me eh ineng en paliwar kin kesempwal laudsang eh pahn ale kapai kan me Siohwa ketin inoukihda me pahn kohsang eh sohso. Esau sohte kalahnganki eh pwung en sohso oh sohte uhdahn poakohng Koht. Oh Esau sohte medemedewe duwen dahme eh pilipilo pahn wiahiong kadaudoke kan. Ahpw Seikop weksang ih. E uhdahn kalahnganki eh sohso oh e wiahda pilipil mwahu kan pwehn perehla. Karasepe, mendahki e sohte mengei ong ih, Seikop uhdahn men idawehn kaweid kan me eh pahpa oh nohno kihong ih duwen eh pahn pilada eh pwoud. (Sen. 27:46–28:3) Siohwa ketin kapaiada en Seikop eh peik sang ni eh ketin kahrehiong Mesaiao en wia emen kadaudoke. Ia sapwellimen Koht madamadau ong Esau oh Seikop? Siohwa mahsanih: “Seikop . . . me I kin poakohng, a Esau . . . me I kin kalahdeki.”—Mal. 1:2, 3.

11. (a) Dahme kahrehda dahme wiawihong Esau kak wia mehn kasukuhl ong Kristian kan? (b) Ni Pohl eh koasoia dahme Esau wiahda, dahme kahrehda e pil koasoia duwen nenek?

¹¹ Dahme wiawihong Esau kak wia mehn kasukuhl ong kitail. Wahnpoaron Pohl katamankihong Kristian kan ren kanahieng pwe ‘emen rehrail de mour samin [‘nenek,’ NW] de sohte kin wauneki mehkot sarawi duwehte Esau, me netikihla eh sohso pwehki delen mwenge ehu.’ (Ipru 12:16) Mehn kataman wet anahne wia mehn kasukuhl ong kitail. Kitail anahne ahnsou koaros kalahnganki mehkan me sarawi pwe kitail pahn kak pelianda kasongosong oh pere atail sohso. Ahnsou me Pohl koasoia duwen dahme Esau wiahda, dahme kahrehda e pil koasoia duwen mour samin de nenek? Pwehki ma kitail kin mwekid duwehte Esau oh mweidohng atail ineng suwed kan en kaunda kitail, e pahn mengei ong kitail en wiahda dihp kan me duwehte nenek, oh met kin imwikihla atail kak katihasang atail sohso.

12. (a) Ia duwen Sehdan eh kin song en kasonge emenemen kitail? (b) Mehn kahlemeng dah kan nan Paipel me kak sewese kitail ni atail kin lelohng kasongosong en wia me sapwung?

¹² Nin duwen sapwellimen Siohwa ladu kan,  kitail kin wia soahng koaros me kitail kak pwehn soikala irair akan me kak kasonge kitail en wia tiahk samin. Oh ma emen kasonge kitail, kitail kin kapakapki me Siohwa Koht pahn ketin sewese kitail en pelianda kasongosongo. (Mad. 6:13) Kitail kin doadoahk laud pwehn kolokolte atail lelepek nan sampah suwed wet, ahpw Sehdan kin ahnsou koaros song en kaluwetehla atail nanpwungmwahu rehn Siohwa. (Ep. 6:12) Sehdan iei koht en koasoandi suwed wet oh e ese ia duwen eh pahn doadoahngki kasongosong kan pwehn kahrehiong aramas en dukula pahn arail ineng suwed kan. (1 Kor. 10:8, 13) E kin songosong en wia met ong emenemen kitail. Ia duwen ma ke mi nan irair ehu me kasonge iuk en kaitarala omw ineng kan ni ahl sapwung? Soangen pilipil dah me ke pahn wiahda? Ke pahn duwehte Esau me mwadangete dukula pahn kasongosong? De ke pahn pelianda kasongosongo oh tangasang, duwehte me nein Seikop pwutak Sosep wia ahnsou me ahn Podipar eh pwoudo kasonge ih?​—Wadek Senesis 39:10-12.

13. (a) Rahnwet, ia duwen me tohto ar kin duwehte Sosep, oh ia duwen meteikan kin duwehte Esau? (b) Dahme kitail anahne wia pwe kitail en dehr duwehte Esau?

¹³ Riatail Kristian tohto kin lelohng kasongosong kan oh anahne pilada ma re pahn duwehte Esau de ren duwehte Sosep. Me tohto wiahda pilipil loalokong oh kaperenda kupwuren Siohwa. (Lep. Pad. 27:11) Ahpw meteikan pilada ren duwehte Esau oh sohte perehla arail sohso. Tohtohn irail kan me ale peneu kehlail de piskensang mwomwohdiso ehuehu sounpar kin alehdi kaweid pwehki re wiahda dihp me pid nsenen pwopwoud. E uhdahn kesempwal kitail en ‘kaunopada atail mohngiong’ met pwe kitail pahn kehlail ong pelianda kasongosong kan me kohkohdo. (Mel. 78:8, NW) Kitail pahn koasoiapene kahk riau me kitail kak wia pwehn onopada en pelianda kasongosong oh wiahda pilipil mwahu kan mwuhr.

14. Peidek dah kan me pahn sewese kitail en tateki me suwed oh poakohng me mwahu?

¹⁴ Kahk keieu iei en medemedewe duwen imwila suwed kan en wia dihp. Uwen laud en atail poakohng Siohwa iei uwen laud en atail kalahnganki atail sohso. Ni atail kin poakohng emen, kitail sohte kin men kamedekihala ih. Ahpw kitail kin song en wia uwen atail kak en kaperenda ih. Eri, kitail anahne kihong ahnsou pwehn medemedewe duwen imwila suwed kan en wia dihp, de atail pahn kamedekihala pein kitail oh meteikan ma kitail dukula pahn kasongosong. Kitail en idek rehtail: ‘Dahme ei wiewiahn roporop pahn wiahiong ei nanpwungmwahu rehn Siohwa? Ia duwen ei peneinei pahn mwekidki dihp me I wiahda? Ia duwen riei Kristian kan nan mwomwohdiso arail pahn mwekidki ei wiahda dihp? Ei wiewiao pahn kansensuwedihala meteikan?’ (Pil. 1:10) Kitail pil kak idek: ‘E pahn mie katepen ei wiahda tiahk samin kisin ahnsou kiste oh lelkihong imwila suwed? I uhdahn men duwehte Esau, me sengiseng kowahlap ni eh esehda duwen imwilahn eh wiahda dihp?’ (Ipru 12:17) Ma kitail medemedewe kanahieng duwen peidek pwukat, kitail pahn tateki dahme suwed oh poakohng me mwahu. (Rom 12:9) Ni atail uhdahn poakohng Siohwa, kitail pahn doadoahk laud pwehn pere atail sohso.​—Mel. 73:28.

15. Dahme pahn sewese kitail en kaunopada pwehn pelianda kasongosong koaros oh pere atail nanpwungmwahu rehn Koht?

¹⁵ Kahk keriau iei en kaunopada pein kitail pwehn pelianda kasongosong. Siohwa ketikihongehr kitail ahl tohto pwehn kaunopada kitail en pelianda kasongosong sang sampah oh pere atail nanpwungmwahu reh. Karasepe, e ketin kasalehiong kitail ia duwen atail kak paiekihda atail onop Paipel, mihting kan, doadoahk en kalohk oh kapakap. (1 Kor. 15:58) Ehuehu ahnsou me kitail kin kapakapkiong Siohwa atail pepehm kan, oh pil ahnsou koaros me kitail  kin doadoahk laud nan kalohk, kitail kin kaunopada pein kitail pwehn pelianda kasongosong. (Wadek 1 Timoty 6:12, 19.) Ma kitail men pweida, kitail anahne nantihongete wia soahng pwukat. (Kal. 6:7) Irelaud riau en pwuhken Lepin Padahk kin kasalehda duwen met.

16, 17. Dahme pahn sewese kitail en wiahda pilipil mwahu kan?

¹⁶ Lepin Padahk irelaud 2 kangoange kitail en doadoahk laud pwehn ahneki erpit oh koahiek en lamalam. Irair pwukat me Siohwa ketikihong kitail pahn sewese kitail en pilada dahme pwung oh sapwung oh pahn sewese kitail en kaunda atail ineng kan a kaidehn en kaitarala ineng pwukat ni ahl sapwung. Ahpw kitail kak wia met ihte ma kitail kin men nantihong laud. Paipel kawehwehda: “Samwa, padahngki dahme I padahkihwei, oh dehr manokehla dahme I ndaiong uhk ke en wia. Rong kanahieng ngilen me kupwurokong kan oh nantihong dehdehkihla mehlel. Ei, peki loalokong oh peki erpit ni ngidingid. Rapahki uwen omw kak, rasehng me kin rapahki silper de takai kesempwal me rir kan. Ma ke pahn kapwaiada met, eri, ke pahn esehla dahkot masak KAUN-O oh ke pahn pweida ni omw pahn padahngki duwen Koht. Pwe KAUN-O iei ih me ketikihdo kupwurokong; iei ih me kin ketikihdo loalokong oh dehdehki.”​—Lep. Pad. 2:1-6.

¹⁷ Ma kitail wia dahme iretikitik pwukat kasalehda, kitail pahn kak wiahda pilipil mwahu kan. Kitail kak pelianda kasongosong ihte ma kitail mweidohng mahsen en Siohwa en wekidala dahme mi loalatail, ma kitail pousehlahte kapakapki sapwellime kaweid, oh ma kitail pousehlahte raparapahki sapwellime erpit rasehng atail rapahki takai kesempwal kan.

18. Dahme ke pahn pousehlahte wia, oh dahme kahrehda?

¹⁸ Siohwa ketikihda loalokong, dehdehki, oh erpit ong irail kan me kin nantihong laud pwehn diar mepwukat. Uwen laud en atail kin rapahki oh doadoahngki mepwukat, atail nanpwungmwahu rehn Siohwa Koht pahn pil laudla. Eri, atail nanpwungmwahu keren reh pahn pere kitail ni atail kin lelohng kasongosong. Ma kitail karanih Siohwa oh lemmwiki ih, kitail pahn nantihong pwehn soikala wia dihp. (Mel. 25:14; Seims 4:8) Atail nanpwungmwahu rehn Siohwa oh erpit me e ketikihong kitail pahn sewese kitail en wiahda pilipil loalokong kan me pahn kaperenda ih oh pere atail sohso.